အမေရိကန်သည် ဟူသီများကို “ကြာမြင့်စွာ” ရေရှည်ထိုးစစ်ဆင်ရန် အစီအစဉ်ရှိကြောင်း အမေရိကန်သမ္မတ ဒေါ်နယ်ထရမ့်ကပြောကြားခဲ့သည်။
“ဒီတိုက်ခိုက်မှုတွေဟာ အလွန်အောင်မြင်ပါတယ်၊ ကျွန်တော်တို့မျှော်လင့်ထားတာထက်တောင် ပိုအောင်မြင်ပါတယ်။ ကျွန်တော်တို့ဟာ သူတို့ကို အလွန်ပြင်းထန်စွာ၊ အလွန်အောင်မြင်စွာ တိုက်ခိုက်နိုင်ခဲ့ပြီး ဒါကို ရေရှည် ဆက်လုပ်သွားမှာဖြစ်ပါတယ်” ဟု ထရမ့်က အိမ်ဖြူတော်တွင် သတင်းထောက်များအား ပြောကြားခဲ့သည်။
မတ်လ ၁၅ ရက်နေ့တွင် အမေရိကန်တပ်ဖွဲ့များသည် သမ္မတဒေါ်နယ်ထရမ့်၏ အမိန့်အရ ယီမင်နိုင်ငံရှိ ဟူသီစခန်းများကို ကြီးမားသော တိုက်ခိုက်မှုများ စတင်ဆင်နွဲခဲ့သည်။ အမေရိကန်ဗဟိုကွပ်ကဲရေးဌာနက ဤလုပ်ရပ်သည် အမေရိကန်အကျိုးစီးပွားကို ကာကွယ်ရန်နှင့် ရေကြောင်းလွတ်လပ်ခွင့်ကို ပြန်လည်ရရှိရန် ရည်ရွယ်ကြောင်း ပြောကြားခဲ့သည်။
တုံ့ပြန်သည့်အနေဖြင့် ဟူသီတို့ကလည်း အနီးရှိ အမေရိကန်လေယာဉ်တင်သင်္ဘော USS Harry S. Truman ကို ဒုံးကျည်များနှင့် ဒရုန်းများဖြင့် နှစ်ကြိမ်တိုက်ခိုက်ခဲ့သော်လည်း သင်္ဘောပျက်စီးမှုနှင့်ပတ်သက်၍ မည်သည့်ဖက်ကမျှ သတင်းမထုတ်ပြန်ခဲ့ကြချေ။