ရာနှင့်ချီသော ပါလက်စတိုင်းများသည် ဂါဇာမြောက်ပိုင်းတွင် ဆန္ဒပြခဲ့ကြပြီး စစ်ပွဲ အဆုံးသတ်ရေး တောင်းဆိုကာ ဟားမတ်စ် ထွက်သွားဟု ကြွေးကြော်ခဲ့ကြသည်ကို ဆိုရှယ်မီဒီယာပို့စ်များတွင် တွေ့ရသည်။ ၂၀၂၃ ခုနှစ် အောက်တိုဘာလ ၇ ရက်နေ့တွင် အစ္စရေးနယ်မြေအတွင်း ဟားမတ်စ်တို့ ဝင်ရောက်တိုက်ခိုက်ရာမှ အစပြုခဲ့သည့် လက်ရှိဖြစ်နေသော စစ်ပွဲအတွက် စစ်သွေးကြွအုပ်စုကို ရှားရှားပါးပါး လူသိရှင်ကြား ဆန့်ကျင်ပွဲလုပ်ခဲ့ကြခြင်းဖြစ်သည်။
ဂါဇာမြောက်ပိုင်းသည် ဂါဇာကမ်းမြောင်တွင် အပျက်အစီးအများဆုံးဒေသများထဲတွင် ပါဝင်သည်။ လူနေထူထပ်သော ဧရိယာရှိ အဆောက်အအုံအများစုသည် အပျက်အစီးပုံများအဖြစ် သို့ ရောက်ရှိသွားခဲ့ပြီး ဒေသခံများစွာသည် တိုက်ပွဲများမှ လွတ်မြောက်ရေးအတွက် အကြိမ်ကြိမ် ရွှေ့ပြောင်းခဲ့ကြရသည်။
ယင်း ဆန္ဒပြပွဲ သည် ဂါဇာတွင် ၎င်းတို့၏ ထိုးစစ် ပြန်စရန် အစ္စရေး၏ ဆုံးဖြတ်ချက် က အဆင်ပြေကြောင်းကို ပြသခဲ့သည်ဟု အစ္စရေးဝန်ကြီးချုပ် နေတန်ယာဟုက တမုဟုတ်ချင်းပင် ပြောဆိုခဲ့သည်။ ဆန္ဒပြခဲ့သည့်နေရာသည် အပစ်အခတ်ရပ်စဲရေး ကာလတွင် ပေါ်ထွက်လာခဲ့သော ဟားမတ်စ်ရဲများ တဖန်ပြန်ပျောက်ကွယ်သွားသည့် နေရာဖြစ်သည်။
အင်္ဂါနေ့က ဂါဇာ၏ Beit Lahiya ဒေသဖြစ်ဖွယ်ရှိသောနေရာတွင် ဆန္ဒပြသူများက “ထွက်သွား၊ ထွက်သွား၊ ဟားမတ်စ် ထွက်သွား” ဟု ကြွေးကြော်နေကြသည်ကို X ပေါ်တင်ခဲ့သော ပို့စ်များ၌ တွေ့ရသည်။ စစ်ပွဲကြောင့် ပျက်စီသွားသော အဆောက်အအုံများကြားရှိ လမ်းတစ်ခုပေါ်တွင် ချီတက်ဆန္ဒပြနေသော လူများကို တွေ့ရသည်။
“လူတွေက ပင်ပန်းနွမ်းနယ်နေပြီး သွားစရာနေရာ မရှိတော့လို့ စစ်ပွဲဆန့်ကျင်ဖို့ ဆန္ဒအလျောက်ချီတက်ကြတဲ့ ပွဲပဲ” ဟု အမည်မဖော်ရဲသော မျက်မြင်တွေ့ရှိသူတစ်ဦးက ပြောဆိုသည်။
“လူအာလုံး မဟုတ်ပေမယ့် လူများစွာက “ဟားမတ်စ် ထွက်သွား” လို့ ပြောပြီး ဟားမတ်စ်ကို ဆန့်ကျင် ကြွေးကြော်ခဲ့ကြတယ်၊ လူတွေ ပင်ပန်းနေကြပါပြီ၊ သူတို့ကို ဘယ်သူမှ အပြစ်မတင်သင့်ပါဘူး” ဟု သူက ပြောဆိုခဲ့သည်။
ဆန္ဒပြပို့စ်များသည် အင်္ဂါနေ့အနှောင်းပိုင်းတွင် စတင် ပျံ့နှံ့ခဲ့သည်။ ဗီဒီယိုတွင် ပါဝင်သော အဆောက်အအုံများ၊ မီးတိုင်များနှင့် လမ်းအနေအထားများသည် ယင်းဧရိယာ၏ ဂြိုဟ်တုဓါတ်ပုံများနှင့် ကိုက်ညီနေသည်ကို ရိုက်တာက အတည်ပြုနိုင်ခဲ့သည်။ ဆန္ဒပြဗီဒီယို၏ ရက်စွဲကို သီးခြားအတည်ပြုနိုင်ခြင်း မရှိသော်လည်း ဆိုရှယ် မီဒီယာတွင် မျှဝေထားသော ဗီဒီယိုနှင့်ဓါတ်ပုံများတွင် မတ်လ ၂၅ ရက်နေ့၌ ပြုလုပ်ခဲ့သော ဆန္ဒပြပွဲများဟု ဖော်ပြထားသည်။
Ref: အေအိုအယ်လ်