တပ်မတော်စွမ်းရည်သတ္တိဆိုင်ရာ ဂုဏ်ထူးဆောင်တံဆိပ်ဖြစ်သည့် သူရဲကောင်းမှတ်တမ်းဝင်တံဆိပ်ချီးမြှင့်ပေးအပ်ပွဲအား ယနေ့ မတ် ၂၇ ရက်နံနက်ပိုင်းက နေပြည်တော်ရှိ ဇေယျာသီရိဗိမာန်၌ကျင်းပရာ နစက ဥက္ကဋ္ဌ၊ နိုင်ငံတော်ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်တက်ရောက်ခဲ့သည်။
ထိုသို့ တက်ရောက်ပြီးနောက် မိမိတို့နိုင်ငံသည် သူရဲကောင်းများစွာပေါ်ထွက်ခဲ့သည့် အစဉ်အလာကောင်းသမိုင်းကြောင်းများရှိသည့် နိုင်ငံတစ်ခုဖြစ်သည်ကို အထောက်အထားခိုင်ခိုင်လုံလုံဖြင့်ရှိနေကာ အမျိုး၊ ဘာသာ၊ သာသနာကို ထိပါးလာချိန်တိုင်း မြန်မာပီပီခေါင်းငုံ့မခံဘူးဟူသည့် ဇာတိနှင့်အစဉ်အလာကို မြန်မာ့သူရဲကောင်းအဆက်ဆက်က ကမ္ဗည်းမော်ကွန်းထိုးခဲ့ကြသည်ကို စံပြုအတုယူဖွယ် တွေ့မြင်နိုင်သည်ဟု ပြောကြားခဲ့သည်။
ထို့ပြင် မိမိတို့တပ်မတော်သားများသည် တိုင်းပြည်နှင့်လူမျိုးကိုထိပါးလာသည့် အဖျက်ရန်စွယ်မှန်သမျှကို သူရသတ္တိအပြည့်ဖြင့်ယှဉ်ပြိုင်အနိုင်ယူခဲ့ကြသကဲ့သို့ ပြောင်းလဲတိုးတက်လာသည့် နည်းပညာများကိုလည်း ဆင့်ပွားတီထွင်နိုင်စွမ်းရှိအောင်ကြိုးစားပုံဖော်နိုင်ခဲ့ကြသည်ဟု ပြောသည်။
ထို့ကြောင့်ရဲစွမ်းသတ္တိအရာတွင်သာမက သိပ္ပံနှင့် နည်းပညာနယ်ပယ်များ၌ ထူးချွန်သူများကိုလည်း ဘွဲ့တံဆိပ်များပေးအပ်ချီးမြှင့်လျက်ရှိရာ ယနေ့အခမ်းအနားတွင် တပ်မတော်စွမ်းရည်သတ္တိဆိုင်ရာ ဂုဏ်ထူးဆောင်တံဆိပ်များဖြစ်သည့် သူရဲကောင်းမှတ်တမ်းဝင်တံဆိပ်ရရှိသူ(၂၂)ဦးကို ချီးမြှင့်ပေးအပ်သွားမည်ဟု ပြောသည်။
ထို့အတူ နိုင်ငံတော်အနေဖြင့် လူမှုရေး၊ စီးပွားရေး၊ သိပ္ပံနှင့်နည်းပညာ၊ အားကစားကဏ္ဍများအပြင် တိုင်းပြည်တည်ငြိမ်အေးချမ်းရေးနှင့် ဖွံ့ဖြိုးရေးတို့အတွက်ကိုလည်း နယ်ပယ်အစုံမှ တိုင်းပြည်အကျိုး အားသွန်ခွန်စိုက်သယ်ပိုးနေသူများကို ထိုက်သင့်သည့်ဂုဏ်ပြုမှုများပြုလုပ်ပေးလျက်ရှိသည်ဟုလည်း ဗိုလ်ချုပ်မှူးကြီးမင်းအောင်လှိုင်က ပြောကြားခဲ့သည်။
ထို့နောက် ဗိုလ်ချုပ်မှူးကြီးမင်းအောင်လှိုင်မှ သူရဲ ကောင်းမှတ်တမ်းဝင်တံဆိပ်ရရှိသူ ဗိုလ်ချုပ်(၁)ဦး၊ ဗိုလ်မှူးကြီး(၃)ဦး၊ ရဲမှူးချုပ်(၁)ဦး၊ ဒု-ဗိုလ်မှူးကြီး (၂)ဦး၊ ဗိုလ်မှူး(၃)ဦး၊ ဗိုလ်မှူး/ဗိုလ်ကြီး(၂)ဦး၊ ဗိုလ် ကြီး(၃)ဦး၊ တပ်ခွဲတပ်ကြပ်ကြီး(၁)ဦး၊ တပ်ကြပ် ကြီး(၂)ဦး၊ တပ်ကြပ်(၂)ဦး၊ ဒု-တပ်ကြပ်(၂)ဦးတို့အား ဆုတံဆိပ်များပေးအပ်ချီးမြှင့်ကာ လဖက်ရည်ဝိုင်းဖြင့်တည်ခင်းဧည့်ခံခဲ့သည်။