မတ်လ (၂၄) ရက်မှ (၂၆) ရက်အထိ (၃) ရက်တာ ကျင်းပသည့် ငြိမ်းချမ်းရေးဆွေးနွေးပွဲတွင် ဖွဲ့စည်းပုံပြင်ဆင်ရေးနှင့် ပတ်သက်သည့် အကြောင်းအရာများကို ထည့်သွင်းဆွေး နွေးကြပြီး ဖွဲ့စည်းပုံ အသစ်ရေးဆွဲရန် မလိုကြောင်း ဆွေးနွေးပွဲတက်ရောက်လာသူများက ဆွေးနွေးအကြံပြုခဲ့ကြကြောင်း NSPNC အဖွဲ့ဝင် ဒုတိယဗိုလ်ချုပ်ကြီး ဝင်းဗိုလ်ရှိန်(ငြိမ်း) က ပြောသည်။
၂၀၂၅ ငြိမ်းချမ်းရေးစကားဝိုင်းကို NSPNC က ဦးဆောင်ကျင်းပခြင်းဖြစ်ပြီး စစ်ဘက်အရပ်ဘက် တာဝန်ရှိသူများ၊ နစက အဖွဲ့ဝင်များ၊ ပြည်ထောင်စုဝန်ကြီးများ၊ တိုင်းရင်း သားလက်နက်ကိုင်အဖွဲ့များ၊ နိုင်ငံရေးပါတီများ၊ ပြင်ပ ပညာရှင်များ၊ စီးပွားရေးလုပ်ငန်းရှင်များ၊ လေ့လာသူများ တက်ရောက်ကာ အဖွဲ့(၂) ဖွဲ့ခွဲ၍ ဆွေးနွေးကြခြင်းဖြစ်သည်။
နိုင်ငံတော် ဖွံ့ဖြိုးတိုးတက်ရေးနှင့် နိုင်ငံစီးပွားရေးကဏ္ဍ အလားအလာများကို ဦးစားပေးဆွေးနွေးကြသည့် အဖွဲ့(၂) ၏ (၃) ရက်တာ ဆွေးနွေးချက်များတွင် ဖွဲ့စည်းပုံပြင်ဆင်ရေး ကိစ္စရပ်များကိုလည်း ထည့်သွင်းဆွေးနွေးကြပြီး ပါဝင်ဆွေး နွေးကြသူများက ဖွဲ့စည်းပုံ အသစ်ရေးဆွဲရန် မလိုအပ်ကြောင်း ဆွေးနွေးခဲ့ကြသည်ဟု မတ်လ (၂၆) ရက် နေ့လယ်ပိုင်းက ကျင်းပသည့် ကျင်းပသည့် ဆွေးနွေးပွဲပိတ်ပွဲ အခမ်းအနားတွင် အငြိမ်းစား ဒုတိယ ဗိုလ်ချုပ်ကြီး ဝင်းဗိုလ်ရှိန်က ပြောကြားခဲ့ခြင်း ဖြစ်သည်။
” ဖွဲ့စည်းပုံအခြေခံဥပဒေ ပြင်ဆင်ရေးပေါ့၊ ဒီမှာတော့ ကျွန် တော်တို့ အားလုံး ဆွေးနွေးခဲ့တဲ့ထဲမှာ ဖွဲ့စည်းပုံအခြေခံဥပဒေကတော့ အသစ်ရေးဆွဲဖို့ မလိုအပ်ဘူးလို့ ကျွန်တော်တို့ အားလုံးက ဆွေးနွေးခဲ့ပါတယ်။ သို့သော်လည်းပဲ ဒီဖွဲ့စည်းပုံအခြေခံဥပဒေကို ကျွန်တော်တို့ ပြင်ရမယ်၊ ပြင်တဲ့အချိန်မှာ အဓိက အရေးကြီးတာ အာဏာခွဲဝေမှုကိစ္စရပ်ပေါ့။ ပြည်ထောင်စုနဲ့ တိုင်းဒေသကြီးနဲ့ပြည်နယ်တွေကြားမှာ အာဏာခွဲဝေမှုကိစ္စရပ်ကိုတော့ အဓိက ဆွေးနွေးခဲ့တာ ရှိပါတယ်” ဟု ဒုတိယဗိုလ်ချုပ်ကြီး(ငြိမ်း) ဝင်းဗိုလ်ရှိန်က ပြောသည်။
ထိုသို့ ဆွေးနွေးရာတွင် ဖွဲ့စည်းပုံအခြေခံဥပဒေ ပြဋ္ဌာန်းချက်ပါ ဥပဒေပြုရေးနှင့် အာဏာခွဲဝေရေးကဏ္ဍများပါဝင်သည့် ဇယား(၁) / ဇယား(၂) နှင့် ပတ်သက်သည့်ကဏ္ဍများကို အသေးစိတ်ထည့်သွင်းဆွေးနွေးကြကြောင်း ၎င်းကဆိုသည်။
ထို့ပြင် စီးပွားရေးနှင့် နိုင်ငံတော် ဖွံ့ဖြိုးတိုးတက်ရေးကဏ္ဍ၊ ဒီမိုကရေစီနှင့် ဖက်ဒရယ်ပြည်ထောင်စုကို ပုံဖော်ခြင်း၊ ရွေးကောက်ပွဲ လုံခြုံရေး၊ တည်ငြိမ်ရေးနှင့် တရားဥပဒေစိုးမိုးရေးကဏ္ဍများကို (၃) ရက်တာ ကာလအတွင်း ကျယ်ကျယ်ပြန့်ပြန့်ဆွေးနွေးကြကြောင်း သိရသည်။
ဖွဲ့စည်းပုံ ပြင်ဆင်ရေးနှင့် ပတ်သက်၍ ယခုဆွေးနွေးပွဲ မတိုင်မီကပင် NCA လက်မှတ်ရေးထိုးထားသည့် တိုင်းရင်းသား လက်နက်ကိုင်အဖွဲ့များ၊ နိုင်ငံရေးပါတီ အစုအဖွဲ့မှ တာဝန်ရှိသူများနှင့် အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ(NSPNC) တို့ ဆွေး နွေးမှုများ လုပ်ဆောင်လျက်ရှိပြီး ပြင်ဆင်သင့်သည့် အချက် (၄၀) ကျော်ကို ပြင်ဆင်ရန် သဘောတူညီမှုရရှိထားပြီးဖြစ်ကြောင်းလည်း သိရသည်။
အဖွဲ့(၂)၏ ဆွေးနွေးမှုများအနေဖြင့် ငြိမ်းချမ်းရေးနှင့် ဖွံ့ဖြိုးတိုးတက်ရေး ကြိုးပမ်းရာတွင် စီးပွားရေး ဖွံ့ဖြိုးတိုးတက်မှု၏ အရေးပါမှု၊ ပဋိပက္ခလျော့ချရေး ကာလအတွင်း စီးပွား ရေးကြံ့ကြံ့ခံမှု ၊ ဖွဲ့စည်းပုံ အခြေခံဥပဒေ ပြင်ဆင်ရေး၊ ဒီမိုကရေစီနှင့် ဖက်ဒရယ်ပြည်ထောင်စုပုံဖော်ခြင်း ၊ ရွေးကောက်ပွဲ လုံခြုံရေး၊ တည်ငြိမ်ရေးနှင့် တရားဥပဒေစိုးမိုးရေး စသည့် ခေါင်းစဉ်များဖြင့် Speaker (၅)ဦးက ဦးဆောင်ဆွေးနွေးကြပြီး ဆွေးနွေးပွဲ တက်ရောက်သူများက အပြန်အလှန်ဆွေးနွေးကြကြောင်း သိရသည်။