ပြီးခဲ့သည့်နှစ် နိုဝင်ဘာလအတွင်းက ဖမ်းဆီးခံခဲ့ရသည့် ထိုင်း ငါးဖမ်းသင်္ဘောသား လေးဦးနှင့် ပတ်သက်၍ ထိုင်းအစိုးရက အကြိမ်ကြိမ် တောင်းဆိုမှုများလုပ်ခဲ့သဖြင့် မြန်မာအစိုးရက ၎င်းတို့ကို လွတ်ငြိမ်းချမ်းသာခွင့်ပေးလိုက်သည်ဟု သိရသည်။
၎င်းတို့ လေးဦးကို လွတ်ငြိမ်းချမ်းသာခွင့်ပေးကြောင်း ကြာသပတေးနေ့တွင် မြန်မာအစိုးရက ကြေညာခဲ့ခြင်းဖြစ်သည်။
ထိုင်းနိုင်ငံ လူ့အခွင့်အရေး စောင့်ကြည့်အဖွဲ့မှ Sunai Phasuk က လွတ်ငြိမ်းချမ်းသာခွင့် အမိန့်စာကို X ဆိုရှယ်မီဒီယာပေါ်တွင် သောကြာနေ့က မျှဝေဖော်ပြခဲ့သည်။ အဆိုပါ အမိန့်ကို နိုင်ငံတော် စီမံအုပ်ချုပ်ရေးကောင်စီအတွင်းရေးမှူး ဗိုလ်ချုပ်ကြီး အောင်လင်းဒွေးက လက်မှတ်ရေးထိုးထားသည်ဟု ဆိုသည်။
၎င်းတို့ လေးဦးကို လွတ်ငြိမ်းခွင့်ပေးလိုက်ကြောင်းကို ထိုင်းနိုင်ငံခြားရေးဝန်ကြီး မာရစ် ဆန်ဂီယမ်ပွန်ဆာက ဝန်ကြီးချုပ် ပေတုံတန်ရှင်နာဝပ်ထရာထံ သတင်းပေး အကြောင်းကြားခဲ့သည်။ လွတ်ငြိမ်းခွင့်ပေးခြင်းကို ကြိုဆိုပါကြောင်း ဝန်ကြီးချုပ်က X ပေါ်တင် ပြောဆိုခဲ့ပြီးနောက် မစ္စတာ Sunai က ယခုကဲ့သို့ ပို့စ်တင် ဖော်ပြခဲ့ခြင်းဖြစ်သည်။
“ထိုင်းနဲ့ မြန်မာနိုင်ငံအကြား ကောင်းမွန်သော ဆက်ဆံရေးကို ထောက်ရှု၍ ထိုင်းငါးဖမ်းသင်္ဘောသား လေးဦးကို မြန်မာအစိုးရက လွတ်ငြိမ်းချမ်းသာခွင့် ပေးလိုက်ကြောင်းကို မတ် ၂၇ ရက်မှာ နိုင်ငံခြားရေးဝန်ကြီးက အသိပေးလာတာကြောင့် ကျွန်မ အရမ်းပဲဝမ်းသာမိပါတယ်” ဟု မစ္စ ပေတုံတန်က ရေးသားဖော်ပြခဲ့သည်။
Ref: ဘန်ကောက်ပို့စ်