မြန်မာနိုင်ငံဆန်စပါးအသင်းချုပ်(MRF)မှ အင်အား အလွန် ပြင်းထန်သော မြေငလျင် ဘေးဒဏ် သက်ရောက်မှုခံရသူများနှင့် ဒေသများအား ကူညီရန် ရည်ရွယ်ပြီး “MRF Operation AID – Action in Disaster” အရေးပေါ်လှုပ်ရှားမှုအဖွဲ့(Task Force) အသစ်တစ်ခုကိုစတင်ဖွဲ့စည်း တာဝန်ပေး ဆောင်ရွက်နေပြီ ဖြစ်ကြောင်း ထုတ်ပြန်ထားသည်။
ထိုသို့ လုပ်ဆောင်သွားမည့် အစီအစဉ်တွင် မြန်မာနိုင်ငံဆန်စပါးအသင်းချုပ်၊ ညီနောင်အသင်းများနှင့် ဆန်စပါးလုပ်ငန်းကဏ္ဍ မှ မိသားစုများ၏ လူအင်အား၊ အရင်းအမြစ်များနှင့် ပူးပေါင်းမှုစွမ်းအားများ၊ လူသားချင်း စာနာထောက်ထားမှုများကို အပြည့်အဝ အသုံးချပြီး အရေးပေါ် အခြေအနေတွင် စားရေရိက္ခာ အထောက်အပံ့ အကူအညီပေးရေးနှင့် ရေရှည်ပြန်လည်ထူထောင်ရေးလှုပ်ရှားမှုများပါဝင်ကြောင်း သိရသည်။
ယင်းအဖွဲ့အနေဖြင့် နိုင်ငံတော်အစိုးရ၊ တိုင်းဒေသကြီး/ ပြည်နယ် အစိုးရများ၊ UMFCCI နှင့် စီးပွားရေး အသင်းအဖွဲ့များ၊ လူမှုရေး အသင်းအဖွဲ့များနှင့် ပူးပေါင်းဆောင်ရွက်မည်ဖြစ်သည်။
ထို့အပြင် ကယ်ဆယ်ရေးစခန်းများ၊ စုရပ်များသို့ ပြောင်းရွှေ့နေထိုင်ရသူများအတွက် အရေးပေါ် အစားအစာနှင့် လိုအပ်မှုများအတွက် ချက်ချင်းကူညီမှုများ စီစဉ်ပေးခြင်း၊ထိခိုက်ပျက်စီး ပြိုပျက်နေသော အဆောက်အဦများ၊ အပျက်အစီးများအား Volunteer လုပ်အားပေး လုပ်သားများ၏ အကူအညီဖြင့် ကူညီရှင်းလင်းပေးခြင်းနှင့် မြို့ရွာများ၊ ရပ်ကွက်များတွင် လိုအပ်သည့် အကူအညီများအား ဆောင်ရွက်ပေးသွားမည် ဖြစ်သည်။
အလားတူ နိုင်ငံတကာ အဖွဲ့အစည်းများ၊ မိတ်ဖက်များနှင့် ပူးပေါင်း၍ Humanitarian Assistance များ၊ ရေတို/ရေရှည် အကူအညီများ၊ လုပ်ငန်းစဉ်များအပေါ် ပေါင်းစပ်ညှိနှိုင်းပေးခြင်းနှင့် ကူညီဆောင်ရွက်ပေးရန်တို့ကို ပြုလုပ်သွားမည်ဖြစ်ကြောင်း သိရသည်။