ပြီးခဲ့သည့် မတ် ၂၈ ရက်မွန်းတည့်ပိုင်းကလှုပ်ခတ်ခဲ့သည့် အင်အားအလွန်ပြင်းထန်သောငလျင်ဒဏ်ကြောင့် ေ-သဆုံး/ထိခိုက်ဒဏ်ရာရရှိမှုများ၊ ပျက်စီးမှုများအား ကူညီကယ်ဆယ်ရေးနှင့်ပြန်လည်ထူ ထောင်ရေးတို့အတွက် ကဏ္ဍအလိုက်ဆောင်ရွက်ရမည့်အချက်များကို နစက ဥက္ကဋ္ဌ၊ ဗိုလ်ချုပ်မှူးကြီးမင်းအောင်လှိုင်က လမ်းညွှန်မှာကြားခဲ့သည်။
ငလျင်ဘေးဒဏ်ကြောင့် ထိခိုက်ပျက်စီးခဲ့ရမှုများကို ပြန်လည်ထူထောင်ရေးလုပ်ငန်းများဆောင်ရွက်ရာ၌ ပြိုကျပျက်စီးသွားသောအဆောက်အဦများနှင့် အပျက်အစီးများအားရှင်းလင်းဖယ်ထုတ်ခြင်းအပိုင်း၊ ပြိုကျပျက်စီးနေဆဲအဆောက်အဦများအား ဘေးအန္တရာယ်မဖြစ်စေရေးစနစ်တကျရှင်းလင်းဖယ်ရှားခြင်းအပိုင်း၊ ပြန်လည်တည်ဆောက်ခြင်းအပိုင်းဟူ၍ အပိုင်း(၃)ပိုင်းဖြင့်ဆောင်ရွက်သွားရမည်ဟု မှာကြားသည်။
ထို့ပြင် ငလျင်ဘေးဒဏ်ကြောင့် ထိခိုက်ပျက်စီးဆုံးရှုံးခဲ့ရသည့် လမ်းတံတားများ၊ နိုင်ငံပိုင်အဆောက်အဦများ ပြန်လည်တည်ဆောက်ရေးနှင့် ပြန်လည်ထူထောင်ရေးလုပ်ငန်းများကို အင်တိုက်အားတိုက်ဆက်လက်ဆောင်ရွက်ရမည်ဖြစ်ကာ ငွေကြေးအင်အား၊ လူအင်အား၊ ယာဉ်ယန္တရားအင်အားများစွာကို သုံးစွဲရမည်ဖြစ်ပြီး ပုဂ္ဂလိတည်ဆောက်ရေးလုပ်ငန်းများကိုလည်း ထောက်ပံ့ပေးရန်လိုအပ်မည်ဟု မှာကြားသည်။
” နိုင်ငံတကာကအကူအညီတွေတောင်းခံရာမှာ ပြန်လည်တည်ဆောက်ရေးအတွက်လိုအပ်တဲ့ ဆောက် လုပ်ရေးသုံးပစ္စည်းများကိုလည်း ထည့်သွင်းတောင်းခံဖို့လိုပါတယ်။ အဆောက်အဦအာမခံလုပ်ငန်းတွေမှာ အာမခံထားရှိမှုတွေကိုလည်း စနစ်တကျစိစစ်ပြီး အာမခံငွေကြေးတွေရရှိဖို့အတွက်ဆောင်ရွက်ပေးသွားရပါမယ်”ဟု နစက ဥက္ကဋ္ဌက မှာကြားသည်။
ထို့အတူ နိုင်ငံတကာမှလာရောက်သည့် ကူညီကယ်ဆယ်ရေးအဖွဲ့များအတွက် နေရေး၊ စားရေး အဆင်ပြေစေရန် စီစဉ်ဆောင်ရွက်ပေးရမည်ဖြစ်ကြောင်း၊ ဆက်သွယ်ရေးလမ်းကြောင်းများ အမြန်ဆုံးယခင်အခြေအနေအတိုင်း ပြန်လည်သွားလာနိုင်ရေးအတွက်လည်း ဆောင်ရွက်ပေးရမည်ဖြစ်ပြီး စစ်ကိုင်း-မန္တလေးလမ်းဟောင်းပေါ်ရှိ စစ်ကိုင်းတံတား (အင်းဝ)ရထားလမ်းကူးတံတားပြိုကျပျက်စီးနေမှုအား အမြန်ဆုံးပြန်လည်ဆယ်တင်၍ ရေလမ်းကြောင်းအမြန်ပြန်ပွင့်အောင် ဆောင်ရွက်ရမည်ဟု မှာကြားသည်။
” အဲဒီ ရထားလမ်းအပြင် တခြားငလျင်ဘေးဒဏ်ကြောင့် ယိုယွင်းမှုတွေဖြစ်ပေါ်ခဲ့ရတဲ့ ရထားလမ်းတွေကိုလည်း အမြန်ဆုံးပြန်လည်ပြေးဆွဲပေးနိုင်ဖို့ဆောင်ရွက်ရပါမယ်။ ကူညီကယ်ဆယ်ရေးလုပ်ငန်းတွေကို ပိုမိုထိရောက်စွာဆောင်ရွက်နိုင်ဖို့အတွက် ထိခိုက်ပျက်စီးမှုတွေဖြစ်ပေါ်ခဲ့ရတဲ့ လေယာဉ်ပြေးလမ်းတွေကိုလည်း အမြန်ဆုံးပြန်လည်ပြုပြင်ဖွင့်လှစ်ပေးရပါမယ်။ ယိုယွင်းပျက်စီးမှုတွေဖြစ်ပေါ်ခဲ့ရတဲ့ လမ်းတံတားတွေကို ဆောက်လုပ်ရေးဝန်ကြီးဌာနနဲ့ စစ်အင်ဂျင်နီယာညွှန်ကြားရေးမှူးရုံးတို့ပူးပေါင်းပြီး အမြန်ဆုံးပြန်လည်ကောင်းမွန်အောင် ဆောင်ရွက်ပေးရပါမယ်”ဟု နစက ဥက္ကဋ္ဌက မှာကြားသည်။
ထို့အတူ ကူညီကယ်ဆယ်ရေးလုပ်ငန်းများ ဆောင်ရွက်ရာတွင် လိုအပ်သည့်တန်ချိန်များစွာကို မတင်နိုင်သည့် ကရိန်းကားများကိုလည်း ငလျင်ဘေးဒဏ်သင့်ဒေသများသို့ အမြန်ဆုံးစေလွှတ်ရမည်ဖြစ်ကာ ရှေးဟောင်းယဉ်ကျေးမှုအမွေအနှစ်အဆောက်အဦများထိခိုက်ပျက်စီးခဲ့ရမှုများကို ပြန်လည်တည် ဆောက်ရေးလုပ်ငန်းများဆောင်ရွက်ရာ၌ ရေရှည်တည်တံ့ခိုင်မြဲမှုရှိစေရေးနှင့် ခိုင်ခိုင်မာမာဖြစ်စေရေးတို့ကို စနစ်တကျတွက်ချက်ဆောင်ရွက်ရမည်ဟု မှာကြားသည်။
” မန္တလေးနန်းမြို့ရိုးတစ်လျှောက် ထိခိုက်ပျက်စီးမှုက ၄၀ ရာခိုင်နှုန်းခန့်ရှိပါတယ်။ ပြန်လည်ပြုပြင်တည်ဆောက်ရာမှာ ရှေးမူလက်ရာမပျက်ဆောင်ရွက်ရပါမယ်။ အုတ်ရိုးပြုပြင်မှုကို အရည်အသွေးမြင့်၊ စံချိန်မီအုတ်တွေသုံးပြီး မိုးမကျမီပြုပြင်ပြီးစီးနိုင်ဖို့ဆောင်ရွက်ရပါမယ်။ မန္တလေးမြို့တွင်းက ဘုန်းတော်ကြီးကျောင်းတွေမှာ အဆောက်အဦနေရာအနည်းငယ်အတွင်း သံဃာတော်တွေ အများအပြားသီတင်းသုံးနေထိုင်နေကြရပါတယ်။ ဒါ့ကြောင့် သံဃာတော်အားလုံးရဲ့ ဆွမ်းကွမ်းနဲ့ ဝေရာဝစ္စကိစ္စတွေအားလုံးအဆင်ပြေစေဖို့ သင့်လျော်တဲ့စီမံမှုတွေဆောင်ရွက်ပေးရပါမယ်”ဟု နစက ဥက္ကဋ္ဌက မှာ ကြားသည်။
ထို့ပြင် ယခုလှုပ်ခတ်ခဲ့သည့် ငလျင်ဆိုင်ရာအချက်အလက်နှင့်ဖြစ်ပေါ်မှုများကို စနစ်တကျမှတ်တမ်းပြုစုထားရှိပြီး ထုတ်ပြန်မှုများဆောင်ရွက်ပေးရမည်ဖြစ်ကာ ကူညီကယ်ဆယ်ရေးနှင့် ထောက်ပံ့ရေးပစ္စည်းများပေးအပ်ရာတွင်လည်း ငလျင်ဘေးဒဏ်သင့်ခဲ့ရသူများအားလုံး၊ ရသင့်ရထိုက်သူများ အားလုံးရရှိစေရေး စနစ်တကျစာရင်းပြုစုပြီး စားရေး၊ သောက်ရေးအဆင်ပြေအောင်ဆောင်ရွက်ပေးရမည်ဖြစ်ကာ စာရင်းများမထပ်စေရေးနှင့် ကျန်နေခဲ့ရသူများမရှိစေရေးတို့အတွက် မျှမျှတတဖြစ်စေရန်တာဝန်ရှိသူများအားလုံးက ကြပ်ကြပ်မတ်မတ်ဖြင့် စနစ်တကျ စာရင်းကောက်ယူပြုစုဆောင်ရွက်ရမည်ဖြစ်ကာ မိမိတို့အနေဖြင့် ပြန်လည်ထူထောင်ရေးဆိုင်ရာများကို များစွာဆောင်ရွက်ရမည်ဖြစ်ရာ ဦးစားပေးအဆင့်အလိုက် အမြန်ဆုံးဆောင်ရွက်ပေးရမည်ဟု မှာကြားခဲ့သည်။