ငလျင်ဘေးဒဏ်သင့်ခဲ့သည့် နေပြည်တော်အတွင်း နိုင်ငံတကာမှကယ်ဆယ်ရေးအဖွဲ့ဝင်များနှင့်အတူ ကူညီကယ်ဆယ်ရေးလုပ်ငန်းများဆောင်ရွက်နေမှုအား နစက ဥက္ကဋ္ဌ၊ နိုင်ငံတော်ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်မှ ယနေ့ မတ် ၃၀ ရက်နံနက်ပိုင်းက ကြည့်ရှုအားပေးခဲ့သည်။
နစက ဥက္ကဋ္ဌသည် ငလျင်ဘေးဒဏ်ကြောင့် လမ်း တံတားပျက်စီးမှုများအား ယာယီသွားလာနိုင်ရန်လမ်းပြင်ဆင်နေမှုများ၊ ဥတ္တရသီရိအထွေထွေရောဂါကုဆေးရုံကြီးပျက်စီးခဲ့ရမှုတို့ကိုကြည့်ရှုစစ်ဆေးပြီး ဆေးရုံအတွင်း၌ ပိတ်မိနေသူများအား အမြန်ဆုံးပြန်လည်ဆွဲထုတ်နိုင်ရေးနှင့် အဆောက်အဦထိခိုက်ပျက်စီးမှုအားအမြန်ဆုံးရှင်းလင်းဖယ်ရှားနိုင်ရေးဆောင်ရွက်ရန်မှာကြားကာ မြန်မာနိုင်ငံမှကူညီကယ်ဆယ်ရေးဝန်ထမ်းများနှင့်အတူ ကူညီကယ်ဆယ်ရေးလုပ်ငန်းများအတူတကွပူးပေါင်းဆောင်ရွက်ပေးနေသည့် ငလျင်လှုပ်ပြီး ၁၈ နာရီအတွင်း မြန်မာနိုင်ငံသို့ ပထမဆုံးရောက်ရှိလာသော တရုတ်နိုင်ငံ၊ ယူနန်ပြည်နယ်ကယ်ဆယ်ရေးဆေးကုသမှုအဖွဲ့မှအဖွဲ့ဝင်များအား နှုတ်ဆက်၍ ကျေးဇူးတင်စကားပြောကြားခဲ့သည်။
ယူနန်ပြည်နယ်ကယ်ဆယ်ရေးဆေးကုသမှုအဖွဲ့စတင်ရောက်ရှိချိန်မှစ၍ မြန်မာနိုင်ငံမှကယ်ဆယ်ရေးအဖွဲ့ဝင်များနှင့်ပူးပေါင်း၍ ဥတ္တရသီရိအထွေထွေရောဂါကုဆေးရုံကြီးအတွင်း ပိတ်မိနေသူများအား ကယ်ဆယ်မှုများပြုလုပ်ခဲ့ကုသဖြင့် ယနေ့ မတ် ၃၀ ရက်နံနက် ၄ နာရီခန့်တွင် သက်ကြီးအမျိုးသမီးတစ်ဦးအား အသက်ရှင်လျက်ကယ်ထုတ်ပေးနိုင်ခဲ့ပြီး ကူညီကယ်ဆယ်ရေးလုပ်ငန်းများကို ဆက်လက်ဆောင်ရွက်ပေးလျက်ရှိသည်။
ထို့နောက် နစက ဥက္ကဋ္ဌသည် ပျဉ်းမနားမြို့၊ ခေမာသီဝံကျောင်းတိုက်အတွင်းရှိ ဓမ္မာရုံတော် ငလျင် ဘေးဒဏ်ကြောင့်ပြိုကျပျက်စီးခဲ့မှုအား ကူညီကယ်ဆယ်ရေးနှင့် အပျက်အစီးများဖယ်ရှားရှင်းလင်းခြင်းလုပ်ငန်းများဆောင်ရွက်နေမှုအား ကြည့်ရှုစစ်ဆေးပြီး ကူညီကယ်ဆယ်ရေးအဖွဲ့များအား အားပေးစကားပြောကြားကာ သက်တော်(၉၂)နှစ်၊ ဝါတော် (၇၂)ဝါရှိ ခေမာသီဝံကျောင်းတိုက်၏ ဦးစီးပဓာန နာယကဆရာတော် အဘိဓဇ ဘဒ္ဒန္တ တေဇနိယ အားဖူးမြော်ကြည်ညိုပြီး ကျန်းမာရေးအခြေအနေများကိုမေးမြန်းလျှောက်ထားကာ လှူဖွယ်ပစ္စည်းများဆက်ကပ်လှူဒါန်းခဲ့သည်။
ငလျင်ဘေးဒဏ်သင့်ခဲ့သည့် ဒေသများအားလုံး၌ ကူညီကယ်ဆယ်ရေးနှင့် ပြန်လည်ထူထောင်ရေးလုပ်ငန်းများကို အစိုးရအဖွဲ့မှတာဝန်ရှိသူများ၊ တပ်မတော်သားများ၊ မြန်မာနိုင်ငံရဲတပ်ဖွဲ့ဝင်များ၊ မီးသတ်တပ်ဖွဲ့ဝင်များ၊ စေတနာ့ဝန်ထမ်းများ၊ ဒေသခံပြည်သူ များအားလုံး စုပေါင်း၍ အင်တိုက်အားတိုက် ဆောင်ရွက်ပေးလျက်ရှိကြောင်း သတင်းရရှိ သည်။