ထို လုပ်ငန်းများပြီးစီးပါက ရဲရွာစက်ရုံ၊ ပေါင်းလောင်းစက်ရုံအပါအဝင် ရေအားလျှပ်စစ်စက်ရုံများ ဓာတ်အားပေးရန်အသင့် ဖြစ်နေဟု ဆို
ပြည်တွင်း ငလျင်ဒဏ်ကြောင့် ပျက်စီးသွားသည့် ဓာတ်အားလိုင်းများနှင့် တာဝါတိုင်များကို လျပ်စစ်ဝန်ကြီးဌာနလက်အောက်ရှိ ဝန်ထမ်းများမှ နေ့/ညမနားတမ်း ပြုပြင်နေကြရကြောင်းနှင့် ထို လုပ်ငန်းစဉ်များပြီးစီးပါက ရဲရွာစက်ရုံ၊ ပေါင်းလောင်းစက်ရုံအပါအဝင် ရေအားလျှပ်စစ်စက်ရုံများ ဓာတ်အားပေးရန်အသင့်ရှိနေပြီဖြစ်သည်ဟု ယနေ့ မတ်လ (၃၀)ရက်၌ ဟိုပင် လျှပ်စစ်ဓာတ်အားပေးဌာနက အသိပေးထားသည်။
ယခုဖြစ်ပွားခဲ့သည့် စစ်ကိုင်းငလျင်လှုပ်ခတ်မှုကြောင့် စစ်ကိုင်းအပါအဝင်၊ မန္တလေးမြို့တို့တွင် ငလျင်ဒဏ်အပြင်းထန်ဆုံးခံစားကြရပြီး၊ အဆိုပါငလျင်ကြောင့် နိုင်ငံတော်က လျှပ်စစ်ဓာတ်အားပေးရန် ဖြန့်ကျက်တည်ဆောက်ထားသည့် နိုင်ငံတော်ဓာတ်အားစနစ် Nation Grid ကြီးပြိုလဲ (System breakdown) သွားရကြောင်း အသိပေးရှင်းလင်းချက်တွင်ဖော်ပြထားသည်။
ထို့ကြောင့် ဓာတ်အားသယ်ယူပို့ဆောင်ပေးနေသည့် ဗို့အားမြင့် ဓာတ်အားလိုင်းများ ပျက်စီးခြင်း၊ Transmission Tower များကျိုးကျခြင်း၊ ပင်မဓာတ်အားခွဲရုံကြီးများမှ Main Transformer ကြီးများ ၊ Switchbay accessories များပျက်စီးချို့ယွင်းနိုင်ပြီး၊ တချို့ Transmission Line များ ကြိုးပြတ်ကျခြင်းများရှိနိုင်သည်ဟု ဆိုသည်။
လက်ရှိတွင် ငလျင်ကြောင့် ပြိုကျပျက်စီးသွားသည့် မြို့ရွာများအတွင်း ဖြန့်ဖြူးရေးဓာတ်အားလိုင်းများ၊ ထရန်စဖော်မာများစစ်ဆေးရသည့်လုပ်ငန်းစဉ်များရှိနေကြောင်းနှင့် တချို့ တိုက်တာအဆောက်အဦများ ပြိုကျကာ မီးကြိုးများ ဓာတ်တိုင်များ၊ ထရန်စဖော်မာများကို ပိမိနေစဉ် ဓာတ်အားဖြန့်ဖြူးလိုက်မည်ဆိုပါက Short circuit တွေဖြစ်နိုင်ကြောင်း အသိ ပေးထားသည်။
ယခုအချိန်တွင် သေချာစိစစ်ခြင်းများမပြုလုပ်ဘဲ ဓာတ်အားဖြန့်ဖြူးလိုက်မည်ဆိုပါက ဓာတ်လိုက်မှုအန္တရာယ်များ ကြုံတွေ့နိုင်သလို ကယ်ဆယ်ရေးလုပ်ဆောင်နေသူများ၊ ကယ်ဆယ်ရေးလုပ်သည့် ယာဉ်ယန္တရားများအတွက် အန္တရာယ်ရှိနိုင်ကြောင်း ဆိုထားသည်။
ထို့အပြင် အပျက်အစီးများအကြား ပိတ်မိ /ပိမိနေကာ ကယ်ဆယ်ရေးအလာစောင့်မျှော်နေကြသည့် အသက်ရှင်ကျန်သူများအတွက် အန္တရာယ်ရှိနိုင်သည့်အတွက် ဖြန့်ဖြူးရေးလိုင်းများထရန်စဖော်မာများ စစ်ဆေးပြီးမှသာ လျှပ်စစ် ဓာတ်အား လွှတ်သင့်သည့်အပိုင်း မလွှတ်သင့်သည့်အပိုင်းများ ခွဲခြားစိစစ်၍ လွှတ်ပေးရခြင်းဖြစ်သည်ဟု အသိပေးထားသည်။
ယင်းသို့သော လုပ်ငန်းစဉ်များကြောင့်တစ်နိုင်ငံလုံးအတိုင်းအတာဖြင့် လျှပ်စစ် မီးများမရနေသေးခြင်းဖြစ်သည်ဟုလည်း အသိပေးချက်တွင်ဖော်ပြထား သည်။
ဓာတ်ပုံ- Hopin Ese