အလွန်ပြင်းထန်သည့် ငလျင်ဒဏ်ကြောင့် စက်သုံးဆီများ အရေးပေါ်လိုအပ်ပါကချက်ခြင်းဖြန့်ဖြူးပေးနိုင်ရန် စီမံဆောင်ရွက်ထားကာ ပျက်စီးမှုများပြားသည့် နေပြည်တော်နှင့် မန္တလေးတိုင်းတို့၌ စက်သုံးဆီအရောင်းဆိုင်(၂၅၄)ဆိုင်ဖွင့်လှစ်ရောင်းချပေးလျက်ရှိသည်ဟု စွမ်းအင်ဝန်ကြီးဌာနက အသိပေးခဲ့သည်။
နေပြည်တော်နှင့် မန္တလေးတိုင်းတို့အပါအဝင် တိုင်းနှင့်ပြည်နယ်အချို့ရှိ စက်သုံးဆီအရောင်းဆိုင်အချို့တွင် အဆောက်အဦများပြိုကျပျက်စီးခြင်း၊ မြေအောက်သိုလှောင်ကန်များအပါအဝင် ဆီပန့်နှင့်ဆက်သွယ်ထားသော မြေအောက်ဆီပိုက်လိုင်းများ ပျက်စီးချို့ယွင်းခြင်း၊ စက်သုံးဆီဖြန့်ဖြူးရာတွင်အသုံးပြုသည့် မီးစက်အချို့ပျက်စီးချို့ယွင်းခဲ့ကာ လျှပ်စစ်မီးလိုင်းများပြတ်တောက်မှုဖြစ်ပေါ်ခဲ့ကြောင်း သိရသည်။
ထို့ကြောင့် တာဝန်ရှိသူများက ပြန်လည်ပြင်ဆင်မှုများပြုလုပ်ခဲ့ကြသဖြင့် နေပြည်တော်၌ စက်သုံးဆီအရောင်းဆိုင်(၁၀၅)ဆိုင်အနက် အရောင်းဆိုင်(၉၀)ခန့်၊ မန္တလေးတိုင်းစည်ပင်နယ်နမိတ်အတွင်းရှိ စက်သုံးဆီအရောင်းဆိုင်(၁၆၄)ဆိုင်တို့အား ပြန်လည်ဖွင့်လှစ်ရောင်းချပေးလျက်ရှိကာ ကျန်ရှိသည့် စက်သုံးဆီအရောင်းဆိုင်များကိုလည်း ပြင်ဆင်မှုများပြုလုပ်လျက်ရှိကြောင်း သိရသည်။
ထို့ပြင် စွမ်းအင်ဝန်ကြီးဌာနမှ ပြည်တွင်းစက်သုံးဆီဖူလုံမှုရှိစေရန်ကြိုတင်စီမံထားမှုအရ သီလဝါသို လှောင်ကန်စခန်းများတွင် ရက်သတ္တပတ်(၁)ပတ်စာခန့်သိုလှောင်ထားပြီး ဆီတင်သင်္ဘောများသည် Jetty များတွင်(၄)စီး၊ ပင်လယ်ဝတွင်(၃)စီး၊ လမ်း ခရီးတွင်(၃)စီးနှင့် ပြည်ပနိုင်ငံများတွင် စက်သုံးဆီ တင်ဆောင်နေသည့်သင်္ဘော(၁၁)စီးရှိနေ၍ စက်သုံးဆီပြတ်လပ်မှုဖြစ်ပေါ်နိုင်မည်မဟုတ်ဘဲ ပုံမှန်ဖြန့် ဖြူးမှုများအပြင် အရေးပေါ်လိုအပ်ပါကချက်ခြင်းဖြန့်ဖြူးပေးနိုင်ရန် စီမံဆောင်ရွက်ထားကြောင်း သိရသည်။
ထို့အတူ ရန်ကုန်တိုင်းရှိ စက်သုံးဆီအရောင်းဆိုင်များမှာ ငလျင်ဒဏ်ကြောင့်ပျက်စီးချို့ယွင်းမှုမျှမရှိသဖြင့် ပုံမှန်အတိုင်းဖြန့်ဖြူးရောင်းချလျက်ရှိ၍ ပြည်သူများအနေဖြင့် လတ်တလောအခြေအနေကြောင့် စက်သုံးဆီပြတ်လပ်မှုဖြစ်ပေါ်မည်ဟု စိုးရိမ်စိတ်ဖြင့် မလိုအပ်ဘဲတန်းစီဝယ်ယူခြင်း၊ အပိုသိုလှောင်ထားခြင်း မပြုလုပ်ကြပါရန်နှင့် လိုအပ်သလောက်သာဝယ်ယူသုံးစွဲကြရန် စွမ်းအင်ဝန်ကြီးဌာနက အသိပေးနှိုးဆော်ခဲ့သည်။