မန္တလေးမြို့၊ အောင်မြေသာစံမြို့နယ်Sky Villa Condo ငလျင်ဒဏ်ကြောင့် ပြိုကျမှုဖြစ်စဉ်အတွင်း (၃)ရက်ကြာ ပိတ်မိနေသည့် သုခဒိုင်းမွန်းစိန်တိုက်ပိုင်ရှင် ရုပ်အလော-င်းအား ယနေ့ မတ်လ(၃၁)ရက်တွင်ရှာဖွေတွေ့ရှိခဲ့ပြီး၊ ယနေ့တွင်ပင် မီးသဂြိုဟ် ပြီးစီးခဲ့ပြီဖြစ်ကြောင်း သုခဒိုင်းမွန်းစိန်တိုက်နှင့် နီးစပ်သူတစ်ဦးက ပေါ်ပြူ လာနယူးစ်ကိုပြောသည်။
အသက်(၅၀)အရွယ်ခန့်ရှိသူ သုခဒိုင်းမွန်းစိန်တိုက်ပိုင်ရှင် ဒေါ်မိုးသီတာရွှေအား ယနေ့တွင် မန္တလေးမြို့ ကြာနီကန်သုဿန်၌ မီးသဂြိုဟ်၍ အရိုးပြာကို ဂူသွင်းမြှပ်နှံသွားမည်ဖြစ်ကြောင်း ဆိုသည်။
” သဂြိုဟ်ပြီးပါပြီ။ မီးသဂြိုဟ်ပြီးရင် ဂူသွင်းမှာပါ။ ကြာနီကန် မှာ”ဟု ၎င်းက ရှင်းပြသည်။
ယနေ့တွင် သုခဒိုင်းမွန်းစိန်တိုက်၏ တရားဝင် လူမှုကွန်ရက်စာမျက်နှာတွင်လည်း ဝမ်းနည်းကြောင်းအထိမ်းအမှတ် အနက်ရောင်ပရိုဖိုင်ကို ချိန်းထားပြီး၊ “မျှော်လင့်ထားတာတွေက မျှော်လင့်ထားတဲ့အတိုင်းမဖြစ်လာခဲ့ဘူး မဟုတ်ခဲ့ပြန်ဘူး” ဟု ရေးသားမျှဝေထားသည်ကိုတွေ့ရသည်။
လက်ရှိတွင် သုခဒိုင်းမွန်းစိန်တိုက်ပိုင်ရှင် ဒေါ်မိုးသီတာရွှေ၏ ကျန်ရှိမိသားစုဝင်များကို ဆက်လက်ရှာဖွေနေဆဲဖြစ်ကြောင်း ဆိုသည်။
ငလျင်ဒဏ်ကြောင့် ပြိုကျခဲ့သည့် Sky Villa ကွန်ဒိုအား ယခု မတ်လ (၂၉)ရက်က ကယ်ဆယ်ရေးအဖွဲ့ဝင်များက ဝင်ရောက်ရှာဖွေကယ်ဆယ်ရာ၌ အသံများကြားခဲ့ရသည့်အတွက် မိသားစုဝင်များ အသက်ရှင်လျက် ကယ်တင်နိုင်လိမ့်မည်ဟု ကနဦး ခန့်မှန်းထားခဲ့ကြကြောင်း သိရသည်။
သုခဒိုင်းမွန်း စိန်တိုက် လူမှုကွန်ရက်စာမျက်နှာမှလည်း “သတင်းကောင်းလေးပြောပါရစေရှင့် မေမိုးအသံကိုကြားရပါပြီနော်။ ထုတ်တန်းတွေကြောင့်အခုချိန်ထိတော့ပြန်လည်ထွက်ရှိနိုင်ဖို့ကြိုးစားနေပါတယ်ရှင့်။ခွင့်ပြုချက်ကြောင့်တင်ခဲ့ခြင်းဖြစ်ပါတယ်ရှင့်”ဟု အသိပေးထားခဲ့သေးသည်။
ဓာတ်ပုံ-Pyae Sone