မြန်မာနိုင်ငံဆီကုန်သည်နှင့် ဆီလုပ်ငန်းရှင်များအသင်း အလုပ်အမှုဆောင်အဖွဲ့သည် ငလျင်ဘေးအန္တရာယ်ကြုံတွေ့နေရသူများကို တတ်စွမ်းသမျှကူညီဆောင်ရွက်ပေးရန် ဆုံးဖြတ်ထားကြပြီး ကျပ်သိန်းတစ်သောင်းဝန်းကျင်အထိ လှူဒါန်းသွားရန် ရည်ရွယ်ထားကြောင်း အသိပေးထုတ်ပြန်ချက်အရ သိရသည်။
မတ်လ ၃၀ ရက်နေ့ အလုပ်အမှုဆောင် အထူးအစည်းအဝေးဆုံးဖြတ်ချက်တွင် အသင်း၏ ရံပုံငွေမှ ကျပ်သိန်း ၃၀၀၀ကို မတည်ထားပြီး ငလျင်ဘေးကိုဆိုးရွားစွာ ခံစားခဲ့ရသော မန္တလေးမြို့နှင့် မန္တလေးတိုင်းဒေသကြီးအတွင်းမှ မြို့များ၊ စစ်ကိုင်း၊ နေပြည်တော်နှင့် တောင်ကြီး၊ အင်းလေး၊ အောင်ပန်းမြို့များရှိ ငလျင်ဒဏ် ခံစားပြီး လိုအပ်နေသူများအား ချက်ခြင်းကူညီပေးသွားမည် ဖြစ်ကြောင်း သိရသည်။
အလှူငွေ ကျပ်သိန်း ၅၀၀၀ အပြင် ငါးဆယ်သား ဆီဘူးပေါင်း တစ်သိန်း (ကျပ်သိန်းလေးထောင်ခန့်တန်ဖိုး) အားလည်း ချက်ခြင်းဘူးသွတ်လျက်ရှိပြီး ငလျင်ဒဏ်ခံသည့်ဒေသများမှ သက်ဆိုင်ရာတာဝန်ရှိသူများနှင့် ဆက်သွယ်ပြီး လှူဒါန်းသွားကြမည်ဖြစ်ကြောင်း သိရသည်။
အလားတူ အသင်းအလုပ်အမှုဆောင်များ၊ အသင်းဝင်များ ငလျင်ဒဏ်မခံစားရသောဒေသများမှ လက်လီလက်ကားဆီရောင်းချသူများစသည့် အသင်းဝင်များအားလုံးကလည်း ငလျင်ဒဏ်ခံစားရသည့် စားသုံးသူပြည်သူများအတွက် ကိုယ်ချင်းစာစိတ်ဖြင့် အလှူငွေများ ထည့်ဝင်လှူဒါန်းကြရန် နှိုးဆော်တိုက်တွန်းထားသည်။
ပါဝင်လှူဒါန်းလိုသူများအနေဖြင့် ဝ၉-၄၄၄၄၃၇၂၉၅၊ ၀၉-၇၅၇၄၈၂၉၁၂ နှင့် ၀၉-၇၅၆၅၇၅၂၁၆ သို့ဆက်သွယ်၍ လည်းကောင်း၊ ကမ္ဘောဇဘဏ် ရှိ အသင်း၏ အကောင့်- 00451300404584301 ( KBZ )နှင့် A Bank ရှိ အသင်း၏ အကောင့် -0014011100010537 ( A Bank) တို့သို့လည်း အလှူငွေများ ထည့်သွင်းနိုင်ကြောင်းသိရပြီး အလှူရှင်များ၏ အမည်၊ ဆိုင်အမည်၊ ဖုန်းနှင့် စသည့် အချက်အလက်များကိုပါ ထည့်သွင်းဖော်ပြပေးရန်လည်း မေတ္တာရပ်ခံထားသည်။