ရန်ကုန်မြို့တွင် (၂)ရက်အတွင်း ကားမီးလောင်မှု (၂)ကြိမ်ဖြစ်ပွားခဲ့ကြောင်း မီးသတ်တပ်ဖွဲ့ သတင်းများအရ သိရသည်။
ယနေ့ ဧပြီ (၁)ရက်၊ နေ့လယ် (၁)နာရီ မိနစ် (၂၀)အချိန်ခန့်၊ မင်္ဂလာတောင်ညွှန်မြို့နယ်၊ ကန်တော်လေး အရှေ့ရပ်ကွက်၊ သိမ်ဖြူလမ်းတွင် ရပ်ထားသည့် အိမ်စီးကား (၁)စီး အပူလွန်ကဲကာ မီးလောင်မှု ဖြစ်ပွားခဲ့ပြီး ဘေးတွင်ကပ်လျက်ရပ်ထားသည့် အိမ်စီးကား (၁)စီးကိုပါ မီးကူးစက်လောင်ကျွမ်းမှု ဖြစ်ပွားခဲ့ကြောင်း ဒေသခံများထံမှ သိရသည်။
အဆိုပါ ကား (၂)စီး မီးလောင်မှု ဖြစ်ပွားကြောင်း သတင်းအရမင်္ဂလာတောင်ညွှန်မြို့နယ်မီးသတ်စခန်းမှ မီးသတ်ယာဉ်(၁)စီးနှင့် တာမွေမြို့နယ်မီးသတ်စခန်းမှ မီးသတ်ယာဉ်(၁)စီး ထွက်ခွာငြှိမ်းသတ်ခဲ့ကြောင်း သိရသည်။
ထိုသို့ ထွက်ခွာငြှိမ်းသတ်ခဲ့ရာ နေ့လယ် (၁)နာရီ (၂၅)အချိန် မီးငြှိမ်းသတ်နိုင်ခဲ့ပြီး တစ်စီးမှာ မီးလောင်ကျွမ်းဆုံးရှုံးခဲ့ရပြီး ကျန်တစ်စီးမှာ အနည်းငယ် ထိခိုက်ပျက်စီးဆုံးရှုံးခဲ့ရကြောင်း သိရသည်။
အဆိုပါ ကား (၂)စီးလုံးမှာ ပိုင်ရှင် တစ်ဦးတည်းဖြစ်ကြောင်းနှင့် မီးလောင်မှုဖြစ်အချိန်တွင် ကားပိုင်ရှင်မှာ မရှိဘဲ ဖြစ်စဉ်ကြောင့် လူထိခိုက်ဒဏ်ရာရရှိမှု မရှိကြောင်း သိရသည်။
အလားတူ ယမန်နေ့ ဧပြီ (၃၁)ရက်၊ ညနေ (၄)နာရီ၊ မိနစ် (၅၀)အချိန်ခန့်ကလည်း သင်္ဃန်းကျွန်းမြို့နယ်၊ (၂၄)ရပ်ကွက်၊ သံသုမာလမ်းတွင် YBS ယာဉ်(၁)စီး မီးလောင်မှုဖြစ်ပွားရာ သင်္ဃန်းကျွန်းမြို့နယ် မီးသတ်စခန်းမှ မီးငြှိမ်းသတ်ယာဉ်(၂)စီး၊ ရေသယ်ယာဉ်(၁)စီး၊ သာကေတမြို့နယ်မီးသတ်စခန်းမှ မီးငြှိမ်းသတ်ယာဉ်(၁)စီး၊ သန္ဓေမီးသတ်တပ်ဖွဲ့ဝင်များဖြင့် ထွက်ခွာငြှိမ်းသတ်ခဲ့ပြီး ညနေ (၄)နာရီ (၅၈)မိနစ်အချိန် မီးငြှိမ်းသတ်နိုင်ခဲ့ပြီး ဖြစ်စဉ်ကြောင့် လူထိခိုက်ဒဏ်ရာ ရရှိမှုမရှိကြောင်း သိရသည်။