နေပြည်တော်အပါအဝင် တိုင်းနှင့်ပြည်နယ်အချို့၌ အင်အားအလွန်ပြင်းထန်သောငလျင်လှုပ်ခတ်ခဲ့ပြီးနောက် ေ-သဆုံးထိခိုက်ဒဏ်ရာရရှိမှုများနှင့် ပျက်စီးဆုံးရှုံးမှုများရှိခဲ့သော်လည်း နေပြည်တော်၊ ဒက္ခိဏသီရိမြို့နယ်၌တည်ထားကိုးကွယ်ထားသည့် မာရဝိဇယဗုဒ္ဒရုပ်ပွားတော်မြတ်ကြီးနှင့် ဗုဒ္ဓဥယျာဉ်ပရိဝုဏ်တော်အတွင်းရှိ သာသနိကအဆောက်အဦအနည်းငယ်သာထိခိုက်ပျက်စီးခဲ့ကြောင်း သိရသည်။
အဆိုပါ သာသနိကအဆောက်အဦများအား နစက ဥက္ကဋ္ဌ၊ နိုင်ငံတော်ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်မှ ယနေ့ ဧပြီ ၁ ရက်နံနက်ပိုင်းက လှည့်လည်ကြည့်ရှုခဲ့ပြီး မာရဝိဇယဗုဒ္ဓရုပ်ပွားတော်မြတ်ကြီးတည်ဆောက်ရေးလုပ်ငန်းများ စတင်ဆောင်ရွက်စဉ်ကပင် ရေရှည်တည်တံ့ခိုင်မြဲစေရေးအတွက် တည်ဆောက်ခဲ့သည့် အခြေအနေများကို ပြောကြားခဲ့သည်။
သဘာဝဘေးဒဏ်ခံနိုင်မှုရှိစေရေး စနစ်တကျတွက်ချက်ခဲ့မှုနှင့် ခေတ်မီနည်းပညာများအသုံးပြုတည်ဆောက်ခဲ့မှုတို့ကြောင့် ပြင်းထန်ငလျင်ဖြစ်ပေါ်ချိန်တွင် ဆင်းတုတော်ကြီးနှင့် ပလ္လင်တော်ကြီးတို့ တိမ်းစောင်းခြင်း၊ နိမ့်ကျခြင်း၊ တွဲဆက်ထားသည့်အပိုင်းများကွဲအက်ခြင်းတို့(လုံးဝ)မရှိခဲ့ခြင်းဖြစ်ကြောင်းလည်း ပြောသည်။
ထို့ပြင် အခြားသာသနိကအဆောက်အဦများတွင် ထိခိုက်ပျက်စီးမှုအနည်းဆုံးဖြစ်ခဲ့သည်မှာ မိမိတို့အတွက် များစွာဝမ်းမြောက်ဂုဏ်ယူရမည်ဖြစ်ပြီး တည်ထားပူဇော်ရာတွင်ပါဝင်ခဲ့သည့် အင်ဂျင်နီယာပညာရှင်များကိုကျေးဇူးတင်ကြောင်းလည်း ထည့်သွင်းပြောကြားသည်။
တာဝန်ရှိသူများအနေဖြင့်အနည်းငယ်မျှသောထိခိုက်ပျက်စီးမှုများကို ပြုပြင်ဆောင်ရွက်ရာတွင်လည်း စနစ်တကျဖြင့် ပြုပြင်ဆောင်ရွက်ရေး ကြပ်မတ်ဆောင်ရွက်ရန်နှင့် ရေရှည်တည်တံ့ခိုင်မြဲမှုရှိစေရေးအတွက် စနစ်တကျဖြင့်ဆက်လက်ထိန်းသိမ်း ဆောင်ရွက်သွားရန်လည်း မှာကြားခဲ့ကြောင်း သိရသည်။