အမေရိကန်ပြည်ထောင်စုသို့ တင်သွင်းသည့် သွင်းကုန်အားလုံးကို အခြေခံနှုန်း ၁၀ ရာခိုင်နှုန်းမှစ၍ အခွန်ကောက်သွားမည်ဖြစ်ကာ အမေ၏ရိက၏ အကြီးဆုံး ကုန်သွယ်ဖက်အချို့အပါအဝင် အခြားဒါဇင်နှင့် ချီသောနိုင်ငံများကို ပိုမိုမြင့်မားသော အခွန်စည်းကြပ်မှုများ သတ်မှတ်မည်ဟု အမေရိကန်သမ္မတ ဒေါ်နယ်ထရမ့်ပ်က ဧပြီ (၂) ရက်တွင် ကြေညာလိုက်သည်။ ယင်းကြေညာချက်ကြောင့် ကမ္ဘာ့ဈေးကွက်များကို တုန်လှုပ်သွားစေပြီး ကုန်သွယ်ရေးစစ်ပွဲကို ပိုမိုပြင်းထန် စေမည်ဖြစ်သည်။
အခွန်းစည်းကြပ်မှု နှုန်းများကို မြှင့်တင်ခြင်းသည် ကမ္ဘာ့အကြီးဆုံး စားသုံးသူဆိုင်ရာစီးပွားရေးဝန်းကျင်တွင် အတားအဆီးသစ်များ ပေါ်ပေါက်လာစေပြီး ကမ္ဘာအစီအစဉ်ကို ပုံဖော်ပေးသည့် ဆယ်စုနှစ်များစွာ ကုန်သွယ်မှု ဖြေလျှော့ပေးခြင်းလုပ်ငန်းစဉ်ကို ပြောင်းပြန်လှန်ပစ်မည်ဖြစ်သည်။ ကုန်သွယ်ဖက်များသည် ၎င်းတို့ကိုယ်ပိုင် အစီအစဉ်များဖြင့် တန်ပြန်စည်းကြပ်မှုများ လုပ်လာမည်ဟု မျှော်လင့်ရကာ စက်ဘီးမှသည် စပျစ်ရည်အထိပါဝင်သော အားလုံးသော ကုန်စည်များ သိသိသာသာ ဈေးမြင့်တက်လာနိုင်သည်။
တရုတ်နိုင်ငံမှ သွင်းကုန်များသည် ယခင် သတ်မှတ်ထားသည့် ၂၀ ရာခိုင်နှုန်းထက် ကျော်လွန်သော (၃၅) ရာခိုင်နှုန်း စည်းကြပ်မှုအသစ်နှင့် ထပ်မံရင်ဆိုင်ရမည်ဖြစ်ကာ စုစုပေါင်း စည်းကြပ်မှုအသစ်သည် (၅၄) ရာခိုင်နှုန်း ရှိလာမည်ဖြစ်သည်။ အမေရိက၏ အနီးကပ်ဆုံး မဟာမိတ်များသည်လည်း အခွန်းစည်းကြပ်မှုမှ ကင်းလွတ်ခွင့်မရှိဘဲ ဥရောပသမဂ္ဂမှ သွင်းကုန်များအပေါ် (၂၀) ရာခိုင်နှုန်းနှင့် ဂျပန်သွင်းကုန်များအပေါ် (၂၄) ရာခိုင်နှုန်း သတ်မှတ်ထားသည်။
အဆိုပါ မြင့်မားသော စည်းကြပ်မှုများသည် ဧပြီ (၉) ရက်တွင် အသက်ဝင်မည်ဖြစ်ကာ နိုင်ငံပေါင်း (၆၀) ခန့်တွင် သက်ရောက်မှုရှိမည်ဖြစ်ကြောင်း အမည်မဖော်လိုသော အိမ်ဖြူတော် အရာရှိတစ်ဦးက ပြောကြားခဲ့သည်။ အခြေခံအကောက်ခွန် ၁၀ ရာခိုင်နှုန်းသည် ဧပြီလ (၅) ရက်နေ့တွင် အသက်ဝင်မည်ဖြစ်ကြောင်းလည်း အဆိုပါ အရာရှိက ပြောဆိုခဲ့သည်။
အပြန်အလှန် စည်းကြပ်ခွန်များသည် အမေရိကန်ကုန်ပစ္စည်းများအပေါ် စည်းကြပ်ခွန်နှင့် အကောက်ခွန်မဟုတ်သော အခြားအတားအဆီးများကို တုန့်ပြန်ခြင်းဖြစ်သည်ဟု မစ္စတာ ထရမ့်ပ်က ပြောကြားခဲ့သည်။ အခွန်စည်းကြပ်မှု အသစ်များကြောင့် ပြည်တွင်း ကုန်ထုတ်လုပ်မှု မြင့်တက်လာမည်ဖြစ်သည်ဟုလည်း သူကပြောခဲ့သည်။
“အနီး၊ အဝေးက မိတ်ဆွေ၊ ရန်ဘက် နှစ်မျိုးလုံးသော နိုင်ငံတွေက ဆယ်စုနှစ်များစွာ ငါတို့နိုင်ငံကို လုယက်၊ အဓမ္မကျင့်၊ ခိုးယူတာတွေ လုပ်ခဲ့ကြတယ်” ဟု အိမ်ဖြူတော် နှင်းဆီဥယျာဉ်တွင် ပြုလုပ်သော အခမ်းအနား၌ မစ္စတာ ထရမ့်ပ်က ပြောကြားခဲ့သည်။
ယခင်ကပင် သွင်းကုန်အများအပြားအပေါ် အခွန် (၂၅) ရာခိုင်နှုန်း ကောက်ခံမှုကို ရင်ဆိုင်နေရသော အမေရိက၏ အကြီးဆုံး ကုန်သွယ်ဖက်နှစ်နိုင်ငံဖြစ်သော ကနေဒါနှင့် မက္ကဆီကိုတို့သည် ဧပြီ ၂ ရက်က ကြေညာလိုက်သော ထပ်တိုးအခွန်စည်းကြပ်မှုများကို ရင်ဆိုင်ရတော့မည်ဖြစ်သည်။
Ref: သည်စထရိတ်တိုင်းမ်စ်