ပြင်းထန်ငလျင်ဒဏ်ကြောင့် ယာယီရပ်နားထားသော ရထားလမ်းပိုင်းများအား အမြန်ဆုံးပြုပြင်ပြီး ပြန်လည်ပြေးဆွဲသွားမည်ဖြစ်ကြောင်း မြန်မာ့မီးရထားမှ သိရသည်။
အလွန်ပြင်းထန်သည့် မြေငလျင်လှုပ်ခတ်ခဲ့မှုကြောင့် စစ်ကိုင်းတိုင်းဒေသကြီး၊ မန္တလေးတိုင်းဒေသကြီး၊ ရှမ်းပြည်နယ်၊ နေပြည်တော်ပြည်ထောင်စုနယ်မြေနှင့် ပဲခူးတိုင်းဒေသကြီးတို့ရှိ မြန်မာ့မီးရထား၏ သမိုင်းဝင်အင်းဝတံတား အပါအဝင် လမ်းများ၊ တံတားများ၊ ဘူတာအဆောက်အအုံများ ပျက်စီးဆုံးရှုံးခဲ့ရသည်။
အဆိုပါရထားလမ်းပိုင်းများ ပျက်စီးဆုံးရှုံးမှု အနေဖြင့် ရန်ကုန်-မန္တလေးရထားလမ်းရှိ ကျောက်တံခါး-တောင်ငူလမ်းပိုင်းတွင် လမ်းပျက်စီးမှု ၂၃ နေရာ၊ တောင်ငူ- နေပြည်တော် လမ်းပိုင်းတွင် လမ်းပျက်စီးမှု ခုနစ်နေရာနှင့် တံတားချို့ယွင်းမှုသုံးခု၊ သာစည်-မန္တလေးလမ်းပိုင်း၌ လမ်းပျက်စီးမှု ၃၀ နေရာနှင့် တံတားချို့ယွင်းမှု ရှစ်ခု၊ သာစည်-မိတ္ထီလာလမ်းပိုင်း၌ တံတားချို့ယွင်းမှုနှစ်ခု၊ ပျဉ်းမနား- တောင်တွင်းကြီးလမ်းပိုင်း၌ လမ်းပျက်စီးမှု ၁၁ နေရာနှင့် တံတားချို့ယွင်းမှု နှစ်ခုတို့ဖြစ်ပွားခဲ့သည်။
ထိုကဲ့သို့ ပျက်စီးဆုံးရှုံးမှုကြောင့် ရန်ကုန်-မန္တလေးလမ်းပိုင်းနှင့် ပျဉ်းမနား-တောင်တွင်းကြီး လမ်းပိုင်းတွင် ပြေးဆွဲလျက်ရှိသော လူစီးရထားများ၊ ကုန်တင်ရထားများအား ယာယီရပ်နားထားခဲ့ရကြောင်း သိရသည်။
ယင်းအပြင် ထိခိုက်ပျက်စီးမှုမရှိသည့် ရန်ကုန်မြို့ပတ်၊ ရန်ကုန်-မော်လမြိုင်၊ ရန်ကုန်-ပြည်၊ ရန်ကုန်-ပဲခူး၊ ပုသိမ်-ကြံခင်း စသည့် လမ်းပိုင်းများတွင် လူစီးရထားများနှင့် ကုန်ရထားများ ပုံမှန်ပြေးဆွဲလျက်ရှိသည်။
ငလျင်ဒဏ်ကြောင့် ချို့ယွင်းပျက်စီးသွားသော လမ်းပိုင်းနှင့်တံတားများ ပြုပြင်ခြင်းများအား မြန်မာ့မီးရထား တိုင်းနယ်မြေအလိုက် လူအင်အား၊ စက်အင်အား၊ ပစ္စည်းအင်အား၊ ထိရောက်သော ထောက်ပံ့ပို့ဆောင်မှုများဖြင့် ဆောင်ရွက်လျက်ရှိရာ ရန်ကုန်-တောင်ငူ- နေပြည်တော်-သာစည်-မန္တလေး လမ်းပိုင်းတစ်ခုလုံးတွင် ရထားများ အမြန်ဆုံးပြန်လည်ပြေးဆွဲနိုင်ရေးအတွက် ကြိုးပမ်းဆောင်ရွက်လျက်ရှိကြောင်း သိရသည်။