ဥရောပသမဂ္ဂမှ ငလျင်ကယ်ဆယ်ရေးပစ္စည်းတန်ချိန်(၈၀)ပါသည့် လေယာဉ်သည် ဒိန်းမတ်နိုင်ငံ၊ ကိုပင်ဟေဂင်မြို့မှ ရန်ကုန်သို့ ပျံသန်းလာပြီဖြစ်ကြောင်း သတင်းဖော်ပြချက်များအရ သိရသည်။
ဥရောပသမဂ္ဂအနေဖြင့် Humanitarian Air Bridge လူသားချင်းစာနာထောက်ထားမှုဆိုင်ရာ စီမံကိန်းကို စတင်လိုက်ပြီဖြစ်ပြီး ဧပြီလ(၂)ရက်တွင် ပထမဆုံး ပျံသန်းသည့် ခရီးစဉ်အနေဖြင့် ကိုပင်ဟေဂင်မှ ရန်ကုန်သို့ စတင်ပျံသန်းထွက်ခွာလာပြီဖြစ်သည်။
ယင်းနှင့်အတူ ရွက်ဖျင်တဲများ၊ ကလေးသူငယ်များအတွက် အကာအကွယ်ပစ္စည်းများ၊ ကျန်းမာရေးနှင့် ရေနှင့်သန့်ရှင်းရေး သုံးပစ္စည်းများအပါအဝင် တန်ချိန် ၈၀ ရှိသည့် ဥရောပသမဂ္ဂမှ ထောက်ပံ့ရေးပစ္စည်းများကို ယူနီဆက်ဖ်ထံ ပေးပို့သွားမည်ဖြစ်သည်။
အဆိုပါ ထောက်ပံ့ပစ္စည်းများကို ဥရောပသမဂ္ဂ၏ မိတ်ဖက်အဖွဲ့အစည်းများမှ စုဆောင်းလက်ခံရရှိရေးနှင့် ဖြန့်ဝေရန်အတွက် မန္တလေးသို့ ပို့ဆောင်သွားမည်ဖြစ်ကြောင်း သိရသည်။