ဧပြီ (၂)ရက်မှ ဧပြီ (၁၁) ရက်အတွင်း တိုင်းနှင့် ပြည်နယ်အနှံ့ အချိန်အခါမဟုတ် မိုးရွာနိုင်မည်ဖြစ်ပြီး မိုးလေဝသဖြစ်စဉ်များ ဖြစ်ပေါ်နိုင်သောကြောင့် ပြည်သူများ ကြိုတင်သတိပြုနေထိုင်ကြရန် မိုးလေဝသနှင့်ဇလဗေဒညွှန်ကြားမှုဦးစီးဌာနမှ အချိန်အခါမဟုတ် မိုးရွာနိုင်မည့် သတိပေးချက် အမှတ်စဉ် (၈/၂၀၂၅) အစီရင်ခံတင်ပြအကြံပြုလိုက်ကြောင်း သိရသည်။
ဧပြီ (၂) ရက်၊ ည (၆)နာရီခွဲအချိန် တိုင်းထွာချက်များအရ ကပ္ပလီပင်လယ်ပြင်နှင့် ဘင်္ဂလားပင်လယ်အော်တို့မှ လေနွေးများနှင့် တရုတ်ပြည်မကြီးပေါ်ရှိ လေဖိအားကြီးရပ်ဝန်းဒေသမှ ရွေ့လျားလာသော လေအေးများ တွေ့ဆုံမှု၊ အရှေ့ဘက်မှ ရွေ့လျားလာသော လေပွေလှိုင်းများ၏ အရှိန်တို့ကြောင့်လည်းကောင်း အချိန်အခါမဟုတ် မိုးရွာနိုင်မည်ဟု မိုး/ဇလက ထုတ်ပြန်သည်။
မိုးရွာသွန်းနိုင်မည့် အခြေအနေတို့မှာ ဧပြီ (၂) ရက်၊ ညနေမှ ဧပြီ (၅)ရက်အတွင်း တနင်္သာရီတိုင်းဒေသကြီး၊ ကရင်ပြည်နယ်နှင့် မွန်ပြည်နယ်တို့တွင် နေရာကျဲကျဲမှ နေရာစိပ်စိပ်နှင့် ဧပြီ (၆)ရက်မှ ဧပြီ (၁၁)ရက်အတွင်း နေပြည်တော်၊ ရန်ကုန်တိုင်းဒေသကြီး၊ မန္တလေးတိုင်းဒေသကြီ၊ ပဲခူးတိုင်းဒေသကြီး၊ မကွေးတိုင်းဒေသကြီး၊ စစ်ကိုင်းတိုင်းဒေသကြီး၊ ဧရာဝတီတိုင်းဒေသကြီး၊ ကယားပြည်နယ်၊ချင်းပြည်နယ်၊ ရခိုင်ပြည်နယ်နှင့် ရှမ်းပြည်နယ်တို့တွင် နေရာကွက်ကျားမှ နေရာကျဲကျဲ၊ တနင်္သာရီတိုင်းဒေသကြီး၊ ကချင်ပြည်နယ်၊ ကရင်ပြည်နယ်နှင့် မွန်ပြည်နယ်တို့တွင် နေရာစိပ်စိပ် မိုးထစ်ချုန်းရွာနိုင်ကြောင်း မိုး/ဇလက ထုတ်ပြန်သည်။
အဆိုပါ အခြေအနေတို့အား အကြံပြုပေးချက်အရ ပြည်သူများအနေဖြင့် အချိန်အခါမဟုတ် မိုးရွာခြင်းနှင့်အတူ လေပြင်းများ တိုက်ခတ်ခြင်း၊ မိုးထစ်ချုန်းခြင်း၊ မိုးကြိုးပစ်ခြင်း၊ လျှပ်စီးလက်ခြင်းနှင့် မိုးသီးကြွေခြင်းစသည့် မိုးလေဝသဖြစ်စဉ်များ ဖြစ်ပေါ်နိုင်သဖြင့် ကြိုတင်သတိပြုနိုင်ပါရန် မိုး/ဇလက အသိပေးထုတ်ပြန်ထားသည်။