အမေရိကန်ပြည်ထောင်စုသည် လူသားချင်းစာနာထောက်ထားမှု အကူအညီကို အလုံးအရင်းဖြင့်ပေးနေသော ဝန်ထုပ်ဝန်ပိုးကို ထမ်းတော့မည်မဟုတ်ဟု နိုင်ငံခြားရေးဝန်ကြီး မာကို ရူဘီယိုက ဧပြီ ၄ ရက်တွင် ပြောကြားလိုက်ပြီး အခြား ချမ်းသာသော နိုင်ငံများအနေဖြင့် ငလျင်ဒဏ်သင့်မြန်မာအတွက် အကူအညီများ ကို တိုးမြှင့်ပေးရန် တောင်းဆိုခဲ့သည်။
“ကျွန်တော်တို့က ကမ္ဘာ့အစိုးရ မဟုတ်ပါဘူး၊ လူသာချင်းစာနာမှု အကူအညီတွေကို သူများတွေ ပေးသလိုပဲ ပေးသွားမှာပါ၊ ကျွန်တော်တို့ တတ်နိုင်သမျှ အကောင်းဆုံး လုပ်ဆောင်သွားပါမယ်” ဟု ရူဘီယိုက ဘရပ်ဆဲလ်တွင် သတင်းထောက်များကို ပြောကြားခဲ့သည်။
အမေရိကန်သမ္မတ ဒေါ်နယ်ထရမ့်ပ်သည် ၎င်း၏ ရာထူးသက်တမ်း ပထမရက်တွင်ပင် အမေရိက၏ နိုင်ငံရပ်ခြားအကူအညီအားလုံးကို ရက် ၉၀ ယာယီဆိုင်းငံ့မိန့် ထုတ်ခဲ့သည်။ အဆိုပါ လုပ်ဆောင်ချက်နှင့် ကမ္ဘာတစ်ဝန်း နိုင်ငံတကာ ဖွံ့ဖြိုးတိုးတက်ရေး အမေရိကန်အေဂျင်စီ၏ အစီအစဉ်အများအပြားကို ရပ်ဆိုင်းလိုက်ခြင်းကြောင့် အသက်ကယ် အစားအစာနှင့် ဆေးဝါး အကူအညီပေးပို့မှုများကို ထိခိုက်စေကာ ကမ္ဘာလုံးဆိုင်ရာ လူသားချင်းစာနာထောက်ထားမှု ကယ်ဆယ်ရေးလုပ်ငန်းများကို ပရမ်းပတာဖြစ်စေခဲ့သည်။
ကမ္ဘာတစ်ဝန်း လူသားချင်းစာနာမှု အကူအညီများ၏ ၆၀ မှ ၇၀ ရာခိုင်နှုန်းကို အမေရိကန်ပြည်ထောင်စုက ဝင်ထမ်းပေးသင့်သည်ဆိုသော မျှော်လင့်ချက်သည် မမျှတကြောင်းနှင့် ကမ္ဘာတွင် ပေးကမ်းလို့ရသည့် ချမ်းသာသောနိုင်ငံများစွာရှိနေကြောင်းကို အထူးအားဖြင့် တရုတ်နှင့် အိန္ဒိယနိုင်ငံတို့ကို ကိုးကား၍ အမေရိကန်နိုင်ငံခြားရေးဝန်ကြီးက ပြောကြားခဲ့သည်။
“ကျွန်တော်တို့က ကမ္ဘာမှာ အချမ်းသာဆုံးနိုင်ငံတစ်ခုပါ၊ ဒါပေမဲ့ ကျွန်တော်တို့ အရင်းအမြစ်တွေက အကန့်အသတ်မရှိနေတာမျိုး မဟုတ်ဘူး၊ ကျွန်တော်တို့မှာ နိုင်ငံတော်ကြွေးမြီ ကြီးကြီးမားမားလဲ ရှိနေပါတယ်၊ ဦးစားပေးရမယ့် အခြားအရာများစွာလဲ ရှိပါတယ်၊ ဒါတွေအားလုံးကို ပြန်စဥ်းစားရမယ့်အချိန်ရောက်နေပါပြီ၊ ဒါကြောင့် ကျွန်တော်တို့ ရှိနေပါမယ်၊ တတ်နိုင်သလောက် ကူညီပေးမှာပါ၊ ကျွန်တော်တို့မှာ ဂရုစိုက်ရမယ့် အခြားအရာတွေလည်း ရှိနေပါတယ်” ဟု သူက ပြောသည်။
ထို့အပြင် “တရုတ်က အရမ်းချမ်းသာတဲ့ နိုင်ငံပါ၊ အိန္ဒိယလည်း ချမ်းသာပါတယ်၊ ကမ္ဘာမှာ အခြားနိုင်ငံတွေလည်း များစွာရှိတဲ့အတွက် လူတိုင်း ကဝင်ကူသင့်ပါတယ်” ဟု ဆက်လက်ပြောဆိုခဲ့သည်။
မတ် ၂၈ ရက်က ပြင်းအား ၇ ဒဿမ ၇ ရှိ ငလျင်လှုပ်ခတ်ခဲ့သော ငလျင်သည် မြန်မာနိုင်ငံတွင် ရာစုနှစ်တစ်ခုအတွင်း အပြင်းထန်ဆုံး ငလျင်ဖြစ်ခဲ့ပြီး ဆေးရုံများ၊ လူနေတိုက်တာ အဆောက်အအုံများ ပြိုကျကာ အစားအစာ၊ ရေနှင့် အမိုးအကာများ ပြတ်တောက်ခဲ့ရသည်။
Ref: သည်စထရိတ်တိုင်းမ်စ်