နေရောင်ခြည်စွမ်းအင်ကို သိုလှောင်ရန် ဘက္ထရီများ ဝယ်ယူရေးနှင့် ၎င်းတို့၏ စွမ်းအင်ကုန်ကျစရိတ်ကို လျှော့ချရန်အတွက် အိမ်ပိုင်ရှင် နိုင်ငံသားများကို သြစတြေးလျဒေါ်လာ ၂ ဒဿမ ၃ ဘီလျံ ကူညီပေးသွားမည်ဟု သြစတြေးလျဝန်ကြီးချုပ် အန်တိုနီ အယ်လ်ဘာနီးစ်က တနင်္ဂနွေနေ့တွင် ကတိပြုလိုက်သည်။
သဘောထားစစ်တမ်းများအရ အယ်လ်ဘာနီးစ်၏ ဗဟိုလက်ဝဲယိမ်း လေဘာပါတီသည် ပီတာ ဒပ်တွန်ဦးဆောင်သည့် အတိုက်အခံ လစ်ဘရယ်နေရှင်နယ် နှင့် သူတင်ကိုယ်တင်အနေအထား ဖြစ်နေသည်။ ဒပ်တွန်သည် ဓါတ်ငွေ့တင်ပို့မှု အချို့ကို ပြည်တွင်းစားသုံးသူများအတွက် လမ်းကြောင်းပြောင်းထောက်ပံ့ရန် သဘာဝဓါတ်ငွေ့ရည် ထုတ်လုပ်သူများကို တွန်းအားပေးသည့် ဓါတ်အားခလျှော့ချရေးအစီအစဉ်ဖြင့် မဲဆွယ်သည်။
သူ၏ အဆိုပြုချက်သည် အိမ်ထောင်စုများအတွက် ပုံမှန်စွမ်းအင်သိုလှောင်ဘက္ထရီတစ်ခု တပ်ဆင်စရိတ်ကို သြစတြေးလျဒေါ်လာ ၄၀၀ သို့မဟုတ် ၃၀ ရာခိုင်နှုန်းခန့် သက်သာစေလိမ့်မည်ဟု တနင်္ဂနွေနေ့ကသတင်း ထုတ်ပြန်ချက်တွင် အယ်ဘာနီးစ်က ပြောကြားခဲ့သည်။
“အိမ်ထောင်စုတွေအတွက် လိုအပ်တဲ့အချိန်မှာ သုံးနိုင်ဖို့ ဘက္ထရီကို အိမ်မှာတပ်ဆင်ပြီး ဆိုလာပြားတွေကနေ ဓါတ်အားသိုလှောင်သွားမှာပါ” ဟု ဝန်ကြီးချုပ်က ပြောသည်။
အစိုးရ၏ အဆိုအရ လက်ရှိတွင်သြစတြေးလျနိုင်ငံ၌ အိမ်ထောင်စု သုံးခုလျှင်တစ်ခုသည် ဆိုလာပြားများရှိထားသော်လည်း အိမ်ထောင်စု (၄၀) တွင် တစ်စုနှုန်းသာ ဘက္ထရီရှိသည်ဟု သိရသည်။
အဆိုပါ အစီအမံသည် ရွေးချယ်ထားသူ တစ်စုအတွက်သာ အထောက်အကူ ဖြစ်နိုင်ပြီး အိမ်ငှားရမ်းနေထိုင်သူများနှင့် ပင်စင်စားများအတွက် အနည်းငယ်သာ အကူအညီဖြစ်နိုင်သည်ဟု နိုင်ငံခေါင်းဆောင် ဒေးဗစ်လစ်တဲလ်ပရောက်ဒ် က အေဘီစီရုပ်သံကို ပြောကြားခဲ့သည်။
အတိုက်အခံတို့၏ အစီအစဉ်တွင်မူ သြစတြေးလျ အရှေ့ဘက်ကမ်းရိုးတန်းရှိ ဓါတ်ငွေ့တင်ပို့သူများသည် ပြည်တွင်းဈေးကွက်သို့ ၁၀ ရာခိုင်နှုန်းမှ ၂၀ ရာနှုန်း ထောက်ပံ့ပေးရန် တွန်းအားပေးမည်ဖြစ်သည်။ ရေရှည်အစီအစဉ်အရလည်း ကွန်ဆာဗေးတစ် ညွန့်ပေါင်းအဖွဲ့သည် သြစတြေးလျနိုင်ငံကို နျူကလီးယားစွမ်းအင်သုံးစွဲသွားရန် လိုလားကြသည်။
Ref: Market Screener