မဟာမြတ်မုနိဘုရားကြီးသို့ နစက ဥက္ကဋ္ဌသွားရောက်ဖူးမျှော်၊မန္တလေးမြို့နှင့် ကျောက်ဆည်မြို့ပျက်စီးခဲ့မှုများကို ရဟတ်ယာဉ်များဖြင့် ကြည့်ရှု

ငလျင်ဒဏ်ကြောင့်ပျက်စီးမှုအချို့ရှိခဲ့သည့် မဟာမြတ်မုနိဘုရားကြီးနှင့် သာသနိကအဆောက်အဦးများကို မူလလက်ရာမပျက် စနစ်တကျပြန်လည်ပြုပြင်ရန် နစက ဥက္ကဋ္ဌ၊ နိုင်ငံတော်ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်က ယနေ့ ဧပြီ ၆ ရက်မွန်းလွဲပိုင်းက မန္တလေးမြို့သို့ရောက်ရှိ၍ မဟာမြတ်မုနိဘုရားကြီးအား ဖူးမြှော်ကြည်ညိုစဥ် မှာကြားခဲ့ခြင်းဖြစ်သည်။

နစက ဥက္ကဋ္ဌမှ ငလျင်ဒဏ်ကြောင့် မဟာမြတ်မုနိဘုရားကြီး၏ မြေခခဲ့ရသော စိန်ဖူးတော်၊ ငှက်မြတ် နားတော်တို့၌ အလှူရှင်များလှူဒါန်းထားသည့် ရတနာ၊ ရွှေ၊ ငွေ၊ ကျောက်သံပတ္တမြားနှင့် စိန်ဖူးတော်များ၊ ကွာကျခဲ့သည့် ရှေးဟောင်းလက်ရာ နံရံဆေးရေးပန်းချီများ၊ပိဋကတ်တိုက်တော်ကြီးအတွင်းရှိ ရှေးဟောင်းပိဋကတ်တော်များ ထိန်းသိမ်းထားရှိမှု၊ ကြေးရုပ်ပြတိုက်အတွင်းရှိ ရှေးဟောင်းကြေးရုပ်ကြီးများ ထိန်းသိမ်းထားရှိမှုတို့ကိုကြည့်ရှုစစ်ဆေးပြီးနောက် ထိခိုက်မှုများကို အမြန်ဆုံးပြန်လည်ပြုပြင်မွမ်းမံခြင်းနှင့် ထိန်းသိမ်းခြင်းများဆောင်ရွက်ရန်မှာကြားခဲ့သည်။

ပြိုကျနေဆဲဖြစ်သည့် အန္တရာယ်ရှိအဆောက်အဦများကို စနစ်တကျဖြိုဖျက်ရန်၊ ပြုပြင်မှုများကို အပိုင်းလိုက်စနစ်တကျဆောင်ရွက်ရန်လည်း မှာကြားခဲ့သည်။

နစက ဥက္ကဋ္ဌမှ ငလျင်ဒဏ်ကြောင့် ထိခိုက်ပျက်စီးခဲ့ရမှုများအား တပ်မတော်သားများနှင့် စေတနာ့ဝန်ထမ်းများက ရှင်းလင်းဖယ်ရှားနေမှုကိုကြည့်ရှုအားပေးကာ ချီးမြှင့်ငွေများပေးအပ်ခဲ့သည်။

ထို့နောက်မန္တလေးမြို့အတွင်း ငလျင်ဒဏ်ကြောင့် ထိခိုက်ပျက်စီးခဲ့ရမှုများ၊ ကျောက်ဆည်မြို့အတွင်း ငလျင်ဒဏ်ကြောင့် ထိခိုက်ပျက်စီးခဲ့မှုများကို ရဟတ်ယာဉ်များဖြင့် ကြည့်ရှုစစ်ဆေးခဲ့သည်။