ပြီးခဲ့သည့် မတ်လ (၂၈) ရက်က မန္တလေးနှင့် စစ်ကိုင်းမြို့အနီးကို ဗဟိုပြု၍ လှုပ်ခတ်ခဲ့သည့် ၇.၇ ရစ်ခ်ျတာစကေးရှိ အင်အားပြင်း ငလျင်ကြောင့် ပြိုကျပျက်စီးခဲ့သည့် မန္တလေးမြို့၊ အောင်မြေသာစံမြို့နယ်ရှိ Sky Villa Condo ပြိုကျမှုကြောင့် အသက်ဆုံးရှုံးခဲ့ရသူများကို ဆက်လက်ရှာဖွေလျက်ရှိရာ ယနေ့ ဧပြီလ (၇) ရက်တွင် ရုပ်အလောင်း (၈) လောင်း ထပ်မံတွေ့ရှိခဲ့ကြောင်း သိရသည်။
အဆိုပါ အဆောက်အဦး အပျက်အစီးများကြား၌ ပိတ်မိနေသူများကို မြန်မာနိုင်ငံမီးသတ်တပ်ဖွဲ့မှ ရှာဖွေကယ်ဆယ်ရေးတပ်ဖွဲ့ဝင်များနှင့် တရုတ်နိုင်ငံမှ Blue Sky Rescue အဖွဲ့ဝင်များနှင့် ပူးပေါင်းရှာဖွေနေခြင်းဖြစ်ပြီး အမျိုးသမီးရုပ်အလောင်း (၆) လောင်းကို ပထမဦးစွာ တွေ့ရှိခဲ့ကြောင်း မြန်မာနိုင်ငံ မီးသတ်တပ်ဖွဲ့က သတင်းထုတ်ပြန်သည်။
ထို့နောက်ဆက်လက်ရှာဖွေရာ နေ့လယ် (၁၂) နာရီ (၂၈) မိနစ်တွင် အမျိုးသမီး ကလေးရုပ်အလောင်း (၁) လောင်း၊ (၁၂) နာရီ (၃၆) မိနစ်တွင် နောက်ထပ်ရုပ်အလောင်း (၁) လောင်း ထပ်မံတွေ့ရှိခဲ့ကြောင်း သိရသည်။
အဆိုပါ Sky Villa Condo သည် အောင်မြေသာစံမြို့နယ် ၊ ၆၂ လမ်းပေါ်ရှိ ရေစစ်ကန်အနီးတွင် တည်ရှိသည့် (၁၁) မြင့် လူနေအဆောက်အဦး ဖြစ်သည်။
ဆောက်လုပ်သူ ကန်ထရိုက်တာနှင့် တာဝန်ရှိသူများက အဆိုပါ အဆောက်အဦးအား ငလျင်ဒဏ်ခံအဆောက်အဦးဟုပြော ဆိုရောင်းချခဲ့ပြီး ယခုငလျင်လှုပ်ခတ်မှုတွင် အဆောက်အဦး အများစုပြိုကျပျက်စီးသွားပြီး အချို့မှာမြေအောက်သို့ ကျွံဝင်သွားသည့် အခြေအနေဖြစ်သည်။
ယင်းအဆောက်အဦး ပြိုကျပျက်စီးမှုသည် ယခုငလျင်တွင် လူအေ-သအပျေ-ာက် အများဆုံး ပြိုကျပျက်စီးမှုဖြစ်ပွားခဲ့သည့် အဆောက်အဦးဖြစ်သည်။
ဓာတ်ပုံ – မြန်မာနိုင်ငံ မီးသတ်တပ်ဖွဲ့