အမေရိကန်သမ္မတ ဒေါ်နယ်ထရမ့်ပ်၏ အခွန်စည်းကြပ်မှုများကို အရှေ့တောင်အာရှဒေသက တုန့်ပြန်နိုင်ရေး ညှိနှိုင်းဆောင်ရွက်မှုများကို မလေးရှားနိုင်ငံက ဦးဆောင်သွားမည်ဟု ဝန်ကြီးချုပ် အန်ဝါအီဘရာဟင်မ်က ပြောကြားလိုက်သည်။
“အာဆီယံဥက္ကဌအနေနဲ့ မလေးရှားနိုင်ငံဟာ ဒေသရဲ့စည်းလုံးညီညွတ်မှုကိုပြဖို့၊ ပွင့်လင်းပြီး ပြန်လည်ရုန်းထနိုင်တဲ့ ထောက်ပံ့ရေးကွင်းဆက်တွေကို ထိန်းသိမ်းဖို့နဲ့ နိုင်ငံတကာစင်မြင့်မှာ ခိုင်မာတဲ့ အာဆီယံရဲ့ စုပေါင်းအသံကို ရှင်းလင်းစွာ ကြားစေဖို့ ကြိုးပမ်းဆောင်ရွက်မှုတွေကို ဦးဆောင်သွားပါမယ်” ဟု ဧပြီ ၆ ရက်က ဖေ့စ်ဘုတ်အပါအဝင် သူ၏ ဆိုရှယ်မီဒီယာချန်နယ်များတွင် တင်ခဲ့သော ဗီဒီယိုမိန့်ခွန်း၌ အန်ဝါက ပြောကြားထားသည်။
ဒေသဆိုင်ရာ စုပေါင်းတုန့်ပြန်မှုနှင့်ပတ်သက်၍ ဗီယက်နမ်ဝန်ကြီးချုပ် Pham Minh Chinh နှင့် သူဖုန်းပြောဆိုခဲ့သည်ဟုလည်း သီးခြားပို့စ်တစ်ခုတွင် မစ္စတာ အန်ဝါက ပြောဆိုသည်။ အင်ဒိုနီးရှား သတင်းဌာနများက ဖော်ပြချက်အရ အင်ဒိုနီးရှားသမ္မတ ပရာဘိုဝို ဆူဘီယန်တိုသည် ဧပြီ ၆ ရက် ညနေပိုင်းတွင် မစ္စတာ အန်ဝါနှင့် တွေ့ဆုံရန် ရှိနေသည်ဟု ဆိုထားသည်။
ဒေသတွင်း ၁၀ နိုင်ငံစုပေါင်းထားသော အာဆီယံအဖွဲ့ဝင်နိုင်ငံများသည် အမေရိက၏ အခွန်စည်းကြပ်မှုဒဏ်ကို အခံရဆုံးနိုင်ငံများတွင် ပါဝင်နေသည်။ ယင်းတွင် ဗီယက်နမ်နှင့် ကမ္ဘောဒီဒယား သွင်းကုန်များအပေါ် ၄၆ နှင့် ၄၉ ရာခိုင်နှုန်းစီ အသီးသီးသတ်မှတ်ထားပြီး မလေးရှားသည် ၂၄ ရာခိုင်နှုန်း သတ်မှတ်ခံရသည်။
ဒေသတွင်း လုပ်ဖော်ကိုင်ဖက်များကဲ့သို့ပင် မလေးရှားသည် အခွန်စည်းကြပ်မှုများကို လက်တုန့်ပြန်ခြင်း မပြုဘဲ စေ့စပ်ညှိနှိုင်းမှုလုပ်ရန် ကြိုးပမ်းနေခဲ့သည်။ သို့ရာတွင် အမေရိကန်ကုန်ပစ္စည်းများအပေါ် အခွန်စည်းကြပ်မှု ၄၇ ရာခိုင်နှုန်း သတ်မှတ်ထားသည်ဆိုသော ထရမ့်ပ်အစိုးရအဖွဲ့၏ ပြောဆိုချက်ကို မလေးရှားက ငြင်းဆိုထားသည်။
Ref: သည်စထရိတ်တိုင်းမ်စ်