ငလျင်ဒဏ်သင့် ခံစားနေရသော မြန်မာပြည်သူများနှင့်အတူ တစ်သားတည်းရပ်တည်နေကြောင်း အမေရိကန် နိုင်ငံခြားရေးဝန်ကြီး မာကိုရူဘီရိုက ယနေ့တွင် ပြောကြားသည်။
ယနေ့ ဧပြီ(၁၃)ရက်တွင် ကျရောက်သည့် ၂၀၂၅ ခုနှစ် မြန်မာအတာသင်္ကြန်ပွဲတော်နှင့် နှစ်သစ်ကူးအခါသမယအချိန်တွင် အမေရိကန်နိုင်ငံခြားရေးဝန်ကြီး မာကိုရူဘီရိုက နှစ်သစ်ကူးဆုမွန်ကောင်းအနေဖြင့် ထိုသို့ အသိပေးပြောကြားခဲ့ခြင်းဖြစ်သည်။
အမေရိကန်သံရုံးမှတဆင့် ထုတ်ပြန်လာသည့် အသိပေးချက်တွင် ယခုနှစ် မတ်လ (၂၈) ငလျင်အပြီး၌ ဝမ်းနည်းပူဆွေးမှုနှင့် ပျက်စီးဆုံးရှုံးမှုများတွေ့ကြုံခဲ့ကြရသည့် လူပေါင်းများစွာနှင့်အတူ မိမိတို့ တစ်ပေါင်းတစ်စည်းတည်း ရှိနေကြောင်းနှင့် ခက်ခဲသောကာလအတွင်း မြန်မာပြည်သူများနှင့်အတူ အမေရိကန်ပြည်ထောင်စုက တစ်သားတည်းရပ်တည်နေသည်ဟု ရေးသားဖော်ပြထားသည်။
ထိုပြင် အမေရိကန် ပြည်ထောင်စုအနေဖြင့် အသက်ကယ်ဆယ်ရေးဆိုင်ရာ လူသားချင်းစာနာထောက်ထားမှု အကူအညီများပေးအပ်ခြင်းနှင့် ပြန်လည်ထူထောင်ရေးဆိုင်ရာ ကြိုးပမ်းမှုများကို ပေးအပ်ရာတွင် နိုင်ငံတကာအသိုက်အဝန်းနှင့် ဆက်လက်ပူးပေါင်းသွားမည်ကြောင်း ဆိုထားသည်။
အလားတူ အခက်အခဲနှင့် ရင်ဆိုင်ရသည့်အခါ မြန်မာပြည်သူများ၏ သတ္တိနှင့် သဒ္ဓါတရားတို့မှာ ယခင်ထက်ပင် ပိုမိုထင်ရှားပေါ်လွင်ကြောင်း၊ အသစ်တဖန်ဖြစ်တည်ခြင်းနှင့် ပိုမိုကောင်းမွန်သည့် မနက်ဖြန်အတွက် မျှော်လင့်ချက်များကို သင်္ကြန်က မိမိတို့ကို ဆင်ခြင်မိစေကြောင်းလည်း ဆိုသည်။
မြန်မာနိုင်ငံကို ဒီမိုကရေစီ လမ်းကြောင်းပေါ်သို့ ပြန်လည်ရောက်ရှိရန် လုပ်ဆောင်နေသူများကို အားပေးကူညီသွားရန် မိမိတို့ ဆက်လက်သံန္နိဋ္ဌာန်ချ ထားပြီး ဒေသတွင်း ငြိမ်းချမ်းရေးနှင့် လုံခြုံရေးတို့အတွက် ဆက်လက်ပူး ပေါင်းဆောင်ရွက်သွားမည်ဟုလည်း ကန် နိုင်ငံခြားရေးဝန်ကြီး မာကိုရူဘီရိုက ပြောကြားထားသည်။