အခုလက်တလောမှာ အဆိုတော် ဂျက်ဆန်ထွန်းက ‘မင်းရဲ့အနားမှာ’ အယ်လ်ဘမ်အသစ်ကို သြဂုတ်လ ၁ ရက်နေ့ကစတင်ပြီး ဖြန့်ချိခဲ့ပြီဖြစ်ပါတယ်။ အဆိုပါ အခွေလေး အကြောင်းနဲ့သူပြင်ဆင်ထားတဲ့ဂီတအနု ပညာ ပုံစံကို အခုလို ပြောပြခဲ့ပါတယ်။
“ဒီအခွေလေးကို ကျွန်တော် နဂိုသွားတဲ့ ပုံစံ အတိုင်း ပြုလုပ်ထားတယ်။ ဦးကိုင်ဇာတို့ ဆိုထားတဲ့ သီချင်းကို ဗားရှင်းပြောင်းပြီး ဆိုထားတယ်။ ဒီအခွေ အတွက် DVD ကို ထိုင်း၊ကိုရီးယားတွေမှာ လည်း ရိုက်ကူးထားတယ်။ သီချင်း၉ပုဒ် ပါဝင်ပြီး ပရိသတ် အတွက် လက်ဆောင် အနေနဲ့ ‘ မင်းရဲ့အနားမှာ’ သီချင်းကို Cappella ဗားရှင်းနဲ့ ဆိုထားတယ်။ ဒီအခွေကို ၃နှစ်လောက်ကြာ သွားတယ်။ အကောင်းဆုံးဖြစ်အောင် လုပ်ရင်းနဲ့ ကြာသွားတယ်ဆိုတော့ ရိုက်ကူးတဲ့ သီချင်းတစ်ပုဒ်စီတိုင်း ကို ကျွန်တော်သေချာလေး စိတ်နှစ်ပြီး လုပ်ထားပါတယ်”လို့ ဂျက်ဆန်ထွန်းက ဆိုပါတယ်။
ဂျက်ဆန်ထွန်းက သီချင်း ဟောင်းတွေကို ပရိသတ်လက်ခံမယ့် ပုံစံမျိုးပြောင်းပြီး သီဆိုနေတဲ့ အကြောင်းနဲ့ အနုပညာလှုပ်ရှားမှု အရမ်းမမြန်ဆန်တဲ့ အတွက် ပရိသတ်တွေအမြင်မှာ အနုပညာအလုပ် ရပ်လိုက်တာ မဟုတ်ကြောင်းကိုတော့ ….
“ကျွန်တော့်ကို ပရိသတ်စပြီး မှတ်မိစေတာက သီချင်းဟောင်းတွေ ပြန်ဆိုတဲ့အတွက် မှတ်မိလာစေ တယ်။ ပြန်ဆိုတော့ ဆိုတာကလည်း ဟိုခေတ် ဟိုအခါက သိပ်မအောင်မြင်ခဲ့တဲ့ သီချင်းဆိုရင် တာဝန်သိပ်မကြီး ဘူး။ ဒါပေမဲ့ အောင်မြင်ခဲ့တဲ့ သီချင်းဆိုရင် ကိုယ်လက်ထဲ ရောက်မှပဲ တစ်ခုခုလွဲချော်သွားမှာကို ကြိုတင်ပြီး ပြင်ဆင်ထားရတယ်။ အဓိက ဒီသီချင်းကို ပရိသတ် ဘယ် လိုမျိုးလက်ခံနိုင်လဲဆိုတာကို သေချာစဉ်း စားပြီးတော့ လုပ်ဖြစ်တယ်။ ကျွန်တော်က အနုပညာလှုပ်ရှားမှု အရမ်းကြီးတော့ မမြန်ဘူး။ လှုပ်ရှားမှုတွေကို ဖြည်းဖြည်းနဲ့ မှန်မှန်ပဲ သွားနေပါတယ်။ ကျွန်တော်ကြားထဲ မှာ ရပ်ပြီးမှ ပြန်လုပ်တာတော့ မရှိဘူး။ အခွေလုပ်ရင်လုပ် မလုပ်ရင် နယ်ရှိုးတွေသွားဆိုတာတွေရှိပါတယ်”လို့ ဆိုပါတယ်။
သြဂုတ်လ ၂၆ရက်နေ့မှာ ကျင်းပမယ့် EUSHIDO ပွဲအတွက် အဆိုတော် ဂျက်ဆန်ထွန်းက ဘယ်မှာမှ မတင် ဆက်ခဲ့ဖူးတဲ့ မသီဆိုရသေးတဲ့သီချင်း အသစ်တွေသီဆို ဖျော်ဖြေဖို့ ပြင်ဆင်နေတယ်လို့ သိရပါတယ်။
ချယ်ရီ
