ဂီတ သက်တမ်းနှစ် ၅ဝပြည့် တော့မှာဖြစ်ပေမယ့် ဝါရင့်အဆိုတော်ကြီး ဦးစိန်ဝင်းထွန်းကတော့ အနုပညာနဲ့ ပတ်သက်လို့ နုပျိုလတ်ဆတ်ဆဲဖြစ်ပါတယ်။ သူ တစ်ကိုယ်တော်စီးရီးအတွက် ကြိုးစားလုပ်ဆောင်တယ်။ ပြီးတော့ လာမယ့် ဒီဇင်ဘာလထဲမှာလည်း ရှိုးပွဲကြီးတစ်ခုဆိုဖို့ပြင်ဆင်နေတယ်။ အဲဒီအကြောင်းတွေနဲ့ပတ်သက်ပြီးသူက….
“ကျွန်တော်ကတော့ ၂ဝ၁၇နဲ့ ၂ဝ၁၈မှာ စီးရီးလုပ်နေတယ်။ တချို့တွေကတော့ သိပ်ကြာနေတယ်ဆိုလို့ ပြီးရင်ပြီးတဲ့ အပုဒ်ကို အင်တာနက်ပေါ်တင်ပါတယ်။ အခုလည်း ကျွန်တော်က ရှိုးပွဲတွေကဆက်တိုက်ဆိုဖြစ်နေတယ်။ ဒီဇင်ဘာလ ၂၃ရက် နေ့၊ အမျိုးသားဇာတ်ရုံမှာ ရှိုးပွဲကြီးတစ်ပွဲဆိုဖို့အတွက်ကိုလည်း အခုကတည်းက သီချင်း တိုက်နေပါပြီ။ ၂၃ ရက်နေ့ရှိုးပွဲကတော့ ကျွန်တော်တို့လူကြီးတွေ အားလုံးပေါင်း ၉ ယောက်ပေါ့။ ကျွန်တော် ရယ်၊ ကိုစိုးပိုင်ရယ်၊ စိုင်းဆိုင်မောဝ် အစရှိသဖြင့်ပေါ့လေ။ လူကြီးတွေဆိုမယ့်ပွဲပေါ့။ အဲဒါလေး စီစဉ်ထားတယ်။ ကျွန်တော့်တစ်ကိုယ်တော်စီးရီးခွေကိုလည်း အမြန်ဆုံးထွက်ရှိနိုင်အောင်ကြိုးစားပြီးလုပ် နေပါတယ်”လို့ ပြောပါတယ်။
ကျန်းမာရေး ဒေါင်ဒေါင်မြည် ကောင်းမွန်ဆဲဖြစ်တဲ့ ဦးစိန်ဝင်းထွန်း အနေနဲ့….
” ကျန်းမာရေးကတော့ ဒီလိုပဲ။ ကျွန်တော် လေ့ကျင့်ခန်း မှန်မှန်လုပ်တယ်။ အစားအသောက်ကိုလည်း ချင့်ချိန်ပြီးစားရတာပေါ့။ အဲဒါကြောင့်လည်း ကျွန်တော်အခုထက်ထိ ကျန်းမာနေတာပေါ့။ ကျွန်တော် ကျန်းမာနေသရွေ့ကတော့ ကျွန်တော့်မှာရှိတဲ့ ဂီတအနုပညာတွေကို ထုတ်ဖော်ပြီးတော့ ကျွန်တော့် ပရိသတ်ကို ချပြသွားပါမယ်” လို့ ပြောပါတယ်။ ဦးစိန်ဝင်းထွန်းရဲ့ လူငယ်တွေအပေါ် အကြံပြုစကား ပြောပြရမှာတော့….
“လူငယ်တွေကို တအားဖြစ်စေချင်ပါတယ်။ ဆို၊ က၊ ရေး၊ တီးပွဲတွေလုပ်နေ တယ်။ ဒီဘက်မှာလည်း ပွဲတွေအများကြီးပဲ။ ပြိုင်ပွဲတွေလုပ်တာအရမ်းကောင်းပါတယ်။ ကျွန်တော်က တော့ ဖြစ်စေချင်တာ လူငယ်တွေကို များများမွေးထုတ်စေချင်တယ်။ ဂီတအစည်းအရုံးမှာလည်း လာ ရောက်အကြံဥာဏ်တောင်းနိုင်တယ်။ လာမယ့် ဂီတလောကမှာ အရည်အချင်းရှိတဲ့ လူငယ်တွေများများ ပေါ်ထွက်စေချင်တယ်” လို့ ပြောပြခဲ့ပါတယ်။
မျိုးမောင်
ဓာတ်ပုံ-မင်းမင်းထွန်း
