ရုပ်သံတစ်ခုမှာ MC ရာထူးတာဝန်ဘဝကနေ သရုပ်ဆောင်ဘက်ကိုကူးရင်း ဇာတ်ကားတွေ ရိုက်ကူးဖြစ်လာခဲ့တဲ့သူကတော့ မာန်ဟိန်းပဲဖြစ်ပါတယ်။ သူ့ရဲ့ အနုပညာသက်တမ်းက အခုဆိုရင် ၈ နှစ်တာကာလကို ရောက်ရှိလို့လာခဲ့ပါပြီ။ သူ MC အနေနဲ့ စလုပ်တော့ မင်းခန့်တာ နာမည်နဲ့စလုပ်ခဲ့တာဖြစ်ပြီး သရုပ်ဆောင်ဘက်ကို ကူးပြောင်းဖြစ်တဲ့ အချိန်မှာတော့ မာန်ဟိန်းနာမည်နဲ့ လုပ်ဖြစ်လာပါတယ်။
“ကျွန်တော်က မာန်ဆိုတဲ့ စကားလုံးလေးသဘောကျတယ်။ အနုပညာမာန်ပေါ့။ မာန်ဆိုတာက မာန ကနေလာတာကိုး။ အနုပညာမာနတော့ နည်းနည်းကြီးချင်တာပေါ့။ အဲဒီမာန်ကို သဘောကျလို့ မာန်ဟိန်းဆိုပြီးပြောင်းလိုက်တာပါ” လို့ နာမည် ပြောင်းလဲလိုက်မှုနဲ့ ပတ်သက်လို့မာန်ဟိန်းက ပြောပါတယ်။ သူ့အနေနဲ့ အနုပညာသက်တမ်း ၈ နှစ်တာ ကာလအတွင်းမှာ ရုန်းကန်ကြိုးစားခဲ့ရပြီး အခုအချိန်အထိလည်း နေရာတစ်နေရာရဖို့ ကြိုးစားနေရတုန်းပဲဖြစ်ပါတယ်။
“၈ နှစ်အတွင်းမှာ ပရိသတ်ဆိုတာလည်း မရှိပါဘူး။ အကုန်လုံးက အမျိုးတွေ သူငယ်ချင်းတွေချည်းပါပဲ။ သူတို့တွေထားတဲ့ နေရာတစ်ခုကို ကျွန်တော်တို့ မရသေးပါဘူး။ အခုအချိန်မှာ ကိုယ့် ကိုယ်ကိုယ်အားရကျေနပ်လားဆိုရင် မကျေနပ်ဘူး။ တစ်အား အားငယ်ခဲ့တာတွေလည်းရှိတယ်။တစ်ယောက် တည်းငိုခဲ့ရတဲ့အချိန်တွေလည်း အများကြီးပဲ။ စိတ်ဓာတ် တွေ အကြီးအကျယ်ကျခဲ့တဲ့ အချိန်တွေလည်း အများကြီးပဲ။ ဒါပေမဲ့လည်း လဲရင်ပြန်ထ ဒါဘဝပဲ လေ။ ဘယ်လောက်အထိ ခက်ခဲဦးမလဲပေါ့။ ကိုယ်ကလည်း အရင်တုန်းကတည်း ဒီအလုပ်ကြီးပဲ လုပ်လာခဲ့တော့ ဒီအလုပ်ပဲ လုပ်တတ်တယ်။ ဒီအလုပ်ပဲလုပ်ချင်တယ်။ ဒါပဲဆက်လုပ်နေဦးမှာပါ။တစ်ချိန်ချိန်တော့ ဇွဲရယ်၊ လုံ့လရယ်၊ ဝိရိယရယ်က ပေးလာတဲ့နေရာ တစ်ခုတော့ ကျွန်တော်တို့ ရမှာပါ။ အဲဒီနေရာလေးကိုပဲ ကျေနပ်ပါတယ်။ ဒါပေမဲ့ လက်ရှိမှာတော့ကိုယ့်ဘဝကိုယ်ကို ဘယ်လိုမှကျေနပ်ဖွယ်ရာ မရှိပါဘူး။ ကျွန်တော်တို့ အောက်ခြေမှာပဲ ရှိနေပါသေးတယ်။ တော်တော်ကြီးကို အနှိမ်ခံနေရတုန်းပါပဲ”လို့ မာန်ဟိန်းက သူ့ရဲ့လက်ရှိအနုပညာဖြတ်သန်းမှု ကိုပြောပြပါတယ်။ သူ့အနေနဲ့ ဖြတ်လျှောက်အနေနဲ့ ဗီဒီယိုဇာတ်ကားတွေ ပါဝင်ရိုက်ကူးရင်း သရုပ်ဆောင်ဘဝကို စတင်ခဲ့တာဖြစ်ပြီး အခုအချိန်မှာတော့ ဇာတ်ပို့ဇာတ်ရန်နေနဲ့ နေရာတစ်နေရာ ရရှိခဲ့ပြီး ရိုက်ကူးခွင့်ရခဲ့တဲ့ ဇာတ်ကားကတော့ ၁ဝ ကားကျော် လောက်ရှိခဲ့ပြီလည်း ဖြစ်ပါတယ်။အခုလက်ရှိအချိန်မှာတော့ သူက ရုပ်သံတစ်ခုနဲ့ စာချုပ်ချုပ်ထားပြီး အဆိုပါရုပ်သံကရိုက်ကူးနေတဲ့ ဇာတ်လမ်းတွဲတွေမှာ ပါဝင်သရုပ်ဆောင်ရိုက်ကူးနေပါတယ်။
လင်းအက္ခရာ
