ရန်ကုန်၊ ဇွန် ၈
မြန်မာ့ အခြေအနေသည် တရုတ် အကျိုးစီးပွားနှင့် တိုက်ရိုက် သက်ဆိုင်နေသည့် အကြောင်း အပါအဝင် မြန်မာ့အရေးနှင့် စပ်လျဉ်းပြီး တရုတ်နိုင်ငံ အနေဖြင့် အပြုသဘောဆောင်သည့် အခန်းကဏ္ဍမှ ဆက်လက်ပါဝင်ရန် ဆန္ဒရှိဟု အာဆီယံကို ဆိုလိုက်သည့်အကြောင်း မြန်မာနိုင်ငံ ဆိုင်ရာ တရုတ်သံရုံးက ယနေ့တွင် သတင်းထုတ်ပြန်သည်။
တရုတ်နိုင်ငံတွင် ကျင်းပနေဆဲ တရုတ်-အာဆီယံ ဆွေးနွေးဖက် ဆက်ဆံရေး နှစ် ၃၀ ပြည့် အထိမ်းအမှတ် အထူးအစည်းအဝေး အတွင်း တရုတ်နိုင်ငံ နိုင်ငံတော်ကောင်စီဝင် နှင့် နိုင်ငံခြားရေး ဝန်ကြီး Mr. Wang Yi က လက်ရှိမြန်မာနိုင်ငံ အခြေအနေနှင့် စပ်လျဉ်း၍ တရုတ်နိုင်ငံ၏ မူဝါဒ ရပ်တည်ချက်ကို ပြောကြားမှုနှင့် စပ်လျဉ်းပြီး တရုတ်သံရုံး၏ ထုတ်ပြန်ချက်အပြည့်အစုံမှာ…
“ Mr. Wang Yi က မြန်မာနိုင်ငံသည် အာဆီယံ မိသားစုကြီး၏ မိသားစုဝင်ဖြစ်ကြောင်း၊ မြန်မာနိုင်ငံ ပြည်တွင်း အရေးကို ကောင်းမွန်စွာဖြေရှင်းနိုင်ရန် အတွက် အာဆီယံမှ အပြု သဘောဆောင်သည့် အခန်းကဏ္ဍမှ ပါဝင်ခြင်းကို တရုတ်နိုင်ငံမှ ထောက်ခံ အားပေးကြောင်း၊ အာဆီယံ မူဘောင်အောက်၌ “သဘောတူညီချက် ၅ ချက်” ကို ဆက်တိုက် အကောင်အထည်ဖော်ဆောင်ရန် ထောက်ခံ အားပေးကြောင်း၊ တရုတ်နိုင်ငံသည် မြန်မာနိုင်ငံနှင့် တောတောင်ရေမြေချင်း ဆက်စပ်လျက် ရှိသော အိမ်နီးချင်း လည်းဖြစ်ပြီး မြန်မာနိုင်ငံ အခြေအနေသည် တရုတ်နိုင်ငံ၏ အကျိုးစီးပွားနှင့် တိုက်ရိုက် သက်ဆိုင်နေကြောင်း၊ တရုတ်နိုင်ငံသည်လည်း မြန်မာနိုင်ငံ အခြေအနေကို များစွာဂရုပြုလျက် ရှိပြီး မိမိ၏ နည်းလမ်းဖြင့် အပြုသဘောဆောင်သည့် အခန်းကဏ္ဍမှ ဆက်လက် ပါဝင်သွားရန် ဆန္ဒရှိကြောင်း၊ တရုတ်နိုင်ငံနှင့် အာဆီယံသည် မြန်မာနိုင်ငံ အရေးနှင့် စပ်လျဉ်း၍ ရပ်တည်ချက်နှင့် ထင်မြင် ယူဆချက်များ ယေဘုယျအားဖြင့် တူညီကြောင်း၊ မိမိတို့သည် အာဆီယံနှင့် ဆက်လက်ပူးပေါင်း၍ မြန်မာ့နယ်ပယ် အသီးသီးအား ပြည်သူလူထု အကျိုးစီးပွားကို အဓိက ထားပြီး တည်တည်ငြိမ်ငြိမ် ထိန်းထိန်းသိမ်းသိမ်း လုပ်ဆောင်ကြရန်၊ အကြမ်းဖက်မှု အသီးသီးကို ဖယ်ရှားရန် အတူတကွ တွန်းအားပေး လိုကြောင်း၊ မြန်မာ့နယ်ပယ် အသီးသီးအား ဖွဲစည်းပုံ အခြေခံဥပဒေနှင့် တရားဥပဒေ မူဘောင်အောက်၌ နိုင်ငံရေး ဆွေးနွေး မှုများ ဆောင်ရွက်၍ ဒီမိုကရေစီ အသွင်ကူးပြောင်းရေး လုပ်ငန်းကို ပြန်လည်စတင်ရန် အတူတကွ အားပေးလိုကြောင်း၊ မြန်မာနိုင်ငံသို့ ကပ်ရောဂါဆိုင်ရာ အကူအညီများ အတူတကွ ပေးအပ်၍ မြန်မာနိုင်ငံ ကပ်ရောဂါအခြေအနေ ပြန့်နှံမည့် အလားအလာအား ထိန်းချုပ်ပြီး ပြည်သူ လူထု၏ အသက်နှင့် ကျန်းမာရေးကို အာမခံချက် ရှိစေမည် ဖြစ်ကြောင်း၊ မြန်မာနိုင်ငံ စီးပွားရေးပြန်လည် ဦးမော့လာရေး၊ ပြည်သူ လူထုဘဝ ကောင်းမွန်လာရေး အတွက် အတူတကွ ထောက်ခံ အားပေး၍ အခြေခံလူထုကို အကျိုးစီးပွား ဖြစ်ထွန်းစေမည် ဖြစ်ကြောင်း၊ နိုင်ငံ အသီးသီးအား “ကုလသမဂ္ဂ ပဋိညာဉ်စာတမ်း” ရည်ရွယ်ချက်နှင့် မူဝါဒများကို လိုက်နာရန် အတူတကွ တိုက်တွန်းပြီး တစ်ဖက်သက် ကန့်သတ် အရေးယူမှုနှင့် မသင့်လျော်သည့် ကြားဝင်မှုများ မဖြစ်စေရန် ဆောင်ရွက်မည်ဖြစ်ကြောင်း၊ အထက်ပါ “သဘောတူညီချက် ငါးချက်” သည် တရုတ်နိုင်ငံနှင့် အာဆီယံ၏ တတ်နိုင်သမျှ ဆောင်ရွက်နိုင်မှုဖြစ်ပြီး မြန်မာနိုင်ငံ အတွက်လည်း များစွာ အရေးပါကြောင်း၊ အပြန်အလှန် ဆက်စပ်နေပြီး ပြိုင်တူ ဆောင်ရွက်နိုင်ကြောင်း၊ လက်ရှိ အတွက်လည်း အာရုံစိုက်ပြီး ရေရှည် အတွက်လည်း ထည့်သွင်း စဉ်းစားထားကြောင်း၊ နှစ်ဦးနှစ်ဖက်၏ သဘောတူညီမှုနှင့် ကြိုးပမ်းရန် ဦးတည်ချက်လည်း ဖြစ်သင့်ကြောင်း ပြောကြားပါသည်”ဟု သံရုံးက ဆိုသည်။
အဆိုပါ အစည်းအဝေးသို့ နစက ကိုယ်စားလှယ် နစက နိုင်ငံခြားရေး ဝန်ကြီး ဦးဝဏ္ဏမောင်လွင် လည်း ဖိတ်ကြားချက်အရ တက်ရောက် လျှက်ရှိနေသည်။
