နေပြည်တော် ဇူလိုင် ၂၇ကိုဗစ်(၁၉) တတိယလှိုင်း ကူးစက်မှုကို အလူးအလဲခံနေရတဲ့ မြန်မာပြည်အနေနဲ့ ရွှေကိုမလို၊ငွေကိုမလို လေကိုသာ လိုတယ်ဆိုတဲ့ အခြေအနေမျိုး ရောက်နေပြီလို့ ပရဟိတ အသင်းတာဝန်ရှိသူတွေက ညီူးညူနေကြပါတယ်။
အိမ်တိုင်း၊ရွာတိုင်း၊မြို့တိုင်းမှာ အောက်ဆီဂျင်ဆိုတဲ့ အသံတွေ ညံညံစီအောင် ထွက်ပေါ်နေပြီး အောက်စီဂျင် မရတော့လို့ ဆုံးပါးသွားရတဲ့ အသက်တွေကလည်း နေ့စဉ်နဲ့အမျှ ရှိနေပါတယ်။
တစ်နိုင်ငံလုံး အတိုင်းအတာနဲ့ လိုအပ်နေတဲ့အောက်ဆီဂျင်ပမာဏကို အစိုးရ ဖက်ကလည်း ဝန်နဲ့အားမမျှ ဆိုသလိုမျိုး ဖြည့်တင်းနေတဲ့ ပမာဏနဲ့ လိုအပ်နေတဲ့ အခြေအနေက အများကြီးကွာခြားနေတယ်လို့ လူမှုကူညီရေးအသင်းတွေက ဝေဖန်နေကြပါတယ်။
တချိန်က လူငယ်စီးပွားရေးသမားတစ်ဦးဖြစ်ပြီး ခုချိန်မှာတော့ ကိုယ်တိုင်လည်း ကိုဗစ်ကူးစက်ခံထားရပေမယ့် လူနာတွေအတွက် အောက်ဆီဂျင်ရအောင်ရှာဖွေပေးနေတဲ့ ကိုသီဟပိုင် (နေစေး)ကတော့ လတ်တလော အောက်ဆီဂျင်လိုအပ်နေတဲ့အခြေအနေကို အခုလိုရှင်းပြခဲ့ပါတယ်။
“ကျွန်တော်တို့အခု မွန်ပြည်နယ်အထိ ဆင်းပြီးအောက်ဆီဂျင်လာဖြည့်တာပါ။အိုးတွေလည်းအသင့်ယူလာပြီးကျိန်းသေ ရမယ်လို့ သေချာလို့ရောက်လာပေမယ့် အခုမရတော့ပါဘူး။လိုအပ်ချက်ဆိုတာထက် ပိုသွားပါပြီ။အောက်ဆီဂျင်က အသက် ဖြစ်သွားပါပြီ။ ခုချိန်မှာ ကျွန်တော်တို့ သဘာဝတရားရိပ်သာမှာ အောက်စီဂျင် လိုအပ်နေတဲ့သူတွေအတွက် အောက်ဆီဂျင်မပေးနိုင်တော့ပါဘူး၊ ဘဝကူး ကောင်းအောင် ဆရာတော်ရဲ့ တရားနဲ့ဘဲ ကုသဖြေသိမ့်နိုင်ပါတော့မယ်”လို့ သူပါဝင်ဆောင်ရွက်နေတဲ့ သဘာဝတရားရိပ်သာရဲ့ အောက်ဆီဂျင် လိုအပ်ချက် အခြေအနေကို ကိုနေစေးက ရှင်းပြခဲ့ပါတယ်။
ဈေးကွက်အတွင်းမှာလည်း အောက်ဆီဂျင်အိုးနဲ့အရည်တွေက ဝယ်မရလောက်အောင်ဖြစ်နေပြီး ကိုဗစ်လူနာတွေအနေနဲ့ မလိုအပ်သေးဘဲ အောက်ဆီဂျင်အိုးတွေ စုဆောင်းသိမ်းဆည်း နေတာကလည်း အခုလို အောက်စီဂျင်ပြသနာကို ကြီးထွားစေတယ်လို့ ပရဟိတ အသင်းတွေ က သုံးသပ်ကြပါတယ်။
နစက အနေနဲ့ နယ်စပ်ကနေ အောက်ဆီဂျင်အရည်တွေ ကိုဆက်တိုက်တင်သွင်းခွင့်ပြုနေပေမယ့်လည်း ဆေးရုံတွေအတွက်ဘဲ လိုအပ်ချက် ကို ဦးစားပေး နိုင်ပြီး ပရဟိတအသင်းတွေအနေနဲ့ လိုအပ်သလောက်အောက်စီဂျင်ရှာမရတဲ့ အနေအထား ဖြစ်နေကြပါတယ်။
လက်တလောအနေအထားတွေအရ ပြည်ပက ဝင်လာမယ့်အောက်စီဂျင်စက်တွေနဲ့၊ ဆက်စပ်ပစ္စည်းတွေ အပါအဝင်၊ အောက်စီဂျင် အရည်တွေက လာမယ့် ဩဂုတ်လ လယ်လောက်ရောက်မှာသာ ပြည်တွင်းလိုအပ်ချက်ကို ဖြည့်ဆည်းနိုင်မယ့်အနေအထားမျိုး ရှိနေတာကြောင့် ပြည်သူတွေအနေနဲ့ ကိုဗစ်ကူးစက်မခံရဖိုဂရုပြုဆင်ခြင်ကြပါလို့ လူမှုကူညီရေး အသင်းတွေက တိုက်တွန်းနေပါတယ်။
