နေပြည်တော် ဩဂုတ် ၄
ယခုနှစ် မိုးရာသီကာလမှာ မိုးရွာသွန်းမှု များပြားကောင်းမွန်တာကြောင့် ရေလှောင်တမံတွေအတွင်း ရေဝင်ရောက်မှုများပြားလျက်ရှိနေကာ ရေလှောင်တမံ ရေထွက်ပေါက်တွေကနေ ရေကျော်နေတဲ့ ရေလှောင်တမံ ၁၈ ခု ထိရှိနေတယ်လို့ စိုက်ပျိုးရေး၊ မွေးမြူရေးနှင့် ဆည်မြောင်း ဝန်ကြီးဌာနက သိရပါတယ်။
ဒီနှစ် မိုးရာသီမှာ မိုးဦးကျချိန် မှစ၍ နိုင်ငံတစ်ဝန်းမိုးရွားသွန်းမှု များပြားလျက်ရှိတာကြောင့် နိုင်ငံတစ်ဝန်းမှာရှိတဲ့ ရေလှောင်တမံတွေ အတွင်း ဆည်ရေ ဝင်ရောက်မှုမှာလည်း များပြားလနေတာပါ။ ယခင်နှစ် မိုးရာသီကာလနှင့်ယှဉ်ပါက လည်း ယခုနှစ်မှာ ရေလှောင်တမံတွေ အတွင်း ဆည်ရေဝင်ရောက်မှုမှာ ၅၀ % နှုန်းအထိ ပိုမိုများပြားလျက်ရှိပြီး ရေလှောင်တမံရေပိုလွှဲမှ ရေကျော်နေတဲ့ ရေလှောင်တမံပေါင်း ၁၈ ခုထိ ရှိနေတာပါ။
” ဩဂုတ် ၃ ရက်နေ့ထိကို ရေပိုလွှဲက ရေကျော်နေတဲ့ ရေလှောင်တမံက ၁၈ ခု ထိ ရှိနေပါတယ်။ နိုင်ငံတစ်ဝန်းမှာ ရှိတဲ့ ဆည်တွေထဲက ၁၈ ခုပါ။ မနှစ်ကဆို ရေကျော်တဲ့ ရေလှောင်တမံက ၇ ခု ပဲ ရှိခဲ့တာပါ။ အများကြ်ိးကျော်တာလဲမဟုတ်ပါဘူး။ ဒီနှစ်က ဧရာဝတီတိုင်းထဲက ရေလှောင်တမံ တစ်ခုဆိုရင် ၄ ပေ လောက်ထိ အများဆုံး ရေကျော်နေတာပါ။ ကျန်တာတွေကတော့ ၁ ပေ၊ ၂ ပေ၊ ၃ ပေ စသဖြင့်ပေါ့။ ဒီလိုရေကျော်တာ ကနှစ်တိုင်းမိုးရာသီဆို ဖြစ်နေကြပါ။ စိုးရိမ်စရာမရှိပါဘူး။ ဆည်အနီးအနားက ဒေသခံတွေအတွက်လဲ အန္တရာယ် သတိပေး အလံတွေစိုက်ထူပေးထားပါတယ်” လို့ဆည်မြောင်းနှင့်ရေအသုံးချမှုစီမံခန့်ခွဲရေးဦးစီးဌာနက တာဝန်ရှိသူတစ်ဦးက ပြောပါတယ်။
ထိုသို့ ရေပိုလွှဲမှ ရေကျော်နေတဲ့ ရေလှောင်တမံ ၁၈ ခုရဲ့ အနီးတဝိုက်တွင်နေထိုင်တဲ့ ဒေသခံပြည်သူတွေအတွက် အန္တရာယ်ရှိမရှိ သိရှိနိုငိစေရန် အချက်ပေးသည့် အလံတိုင်များ စိုက်ထူပေးထားကြောင်း၊ ပထမအခြေအနေအနေဖြင့် ရေပိုလွှဲမှ ရေစတင်ကျော်နေသည့် အတွက် အစိမ်းရောင်အလံများ စိုက်ထူပေးထားပြီး ပိုမိုများပြားလာပါက အဝါရောင်အလံနဲ့ အန္တရာယ်အဆင့်ရောက်လာပါက အနီရောင် အလံများ စိုက်ထူပေးသွားဖို့စီစဉ်ထားတယ်လို့ သိရပါတယ်။
နိုင်ငံတစ်ဝန်းမှာ ဆည်မြောင်းနှင့်ရေအသုံးချမှု စီမံခန့်ခွဲရေးဦးစီးဌာန ထိန်းသိမ်းထားသည့် ရေလှောင်တမံပေါင်း ၂၄၅ ခု ရှိတယ်လို့ သိရပါ တယ်။