အင်းစိန် ဗဟိုအကျဉ်းထောင်ထဲက အမျိုးသမီးအကျဉ်းထောင် အတွင်းမှာ သြဂုတ်လ ၁၁ရက် ည ၉ နာရီအချိန်ခန့်က ဟစ်ကြွေး ဆန္ဒထုတ်ဖော်မှု တစ်ရပ်ဖြစ်ပွားခဲ့ပါတယ်။
အကျဉ်းဦးစီးဌာန ပြောရေးဆိုခွင့်ရ ဒုတိယညွှန်ကြားရေးမှူးဦးချမ်းအေးကျော်က အခုသတင်းအပေါ် ဟုတ်မှန်ကြောင်းပြောဆိုခဲ့ပြီး အင်းစိန်ဗဟို အကျဉ်းထောင်ရှိ အမျိုးသမီးအကျဉ်းထောင်ရဲ့ အိပ်ဆောင်အမှတ်၇မှာ ဖြစ်ခဲ့တာဖြစ်တယ်လို့ ပြောပြပါတယ်။
၂၀၂၁ ခုနှစ်၊ သြဂုတ်လ ၁၁ ရက် ည မြဝတီ၊မြန်မာ့အသံတို့ရဲ့ ည၈နာရီသတင်းထဲ နစကကကြားနာစစ်ဆေးဆဲ ပြစ်မှုဆိုင်ရာအမှုတွေ ပိတ်သိမ်းပေးမယ်ဆိုတဲ့ ကြေညာချက်အပြီး အမှုရင်ဆိုင်နေရဆဲ သူတွေလွတ်မြောက်ပြီး အကျဉ်းကျနေသူတွေ အဘယ်ကြောင့် မလွတ်ပေးရတာလဲဆိုပြီး အကျဉ်းကျအမျိုးသမီး ၃၀ကျော်က သွေးသစ္စာနဲ့ ကမ္ဘာမကြေဆိုကာ ဟစ်ကြွေးဆန္ဒထုတ်ဖော်မှုလုပ်ခဲ့ကြတာလို့ ဦးချမ်းအေးကျော်က ပြောပါတယ်။
ဟစ်ကြွေးဆန္ဒထုတ်ဖော်မှုလုပ်ခဲ့ကြသူတွေက တောင်းဆိုချက်မပါဘဲ ဟစ်ကြွေးဆန္ဒပြမှုသာရှိတယ်လို့ သူကပြောပါတယ်။
ပြီးခဲ့တဲ့ သြဂုတ်၈ရက် ညပိုင်းက မန္တလေးအိုးဘိုထောင်မှာ ဟစ်ကြွေးဆန္ဒထုတ်ဖော်မှုတွေ၊ပြီးခဲ့တဲ့ ဇူလိုင် ၂၃ရက်က ရန်ကုန်အင်းစိန်ထောင် အတွင်းဟစ်ကြွေးဆန္ဒထုတ်ဖော်မှုနဲ့ တောင်းဆိုမှုတွေ ဖြစ်ခဲ့ပါသေးတယ်။
နစကက သြဂုတ်လ ၁၁ရက်ညက ကိုဗစ်အကြောင်းပြချက်နဲ့ ကြေညာချက်ထုတ်ရာမှာ ကြားနာစစ်ဆေးဆဲ ပြစ်မှုဆိုင်ရာအမှုတွေ ပိတ်သိမ်းပေးတာမှာ အကြမ်းဖက်မှုတိုက်ဖျက်ရေးဥပဒေပါပြစ်မှုများ၊ ငွေကြေးခဝါချမှုတိုက်ဖျက်ရေးဥပဒေပါ ပြစ်မှုများ၊ လူကုန်ကူးမှု တားဆီး ကာကွယ်ရေးဥပဒေပါပြစ်မှုများ၊ မူးယစ်ဆေးဝါးနဲ့ စိတ်ကို ပြောင်းလဲစေတတ်သော ဆေးဝါးများဆိုင်ရာဥပဒေပါပြစ်မှုများ (အမိန့်အမှတ် ၁၄၇/၂၀၂၁ ၏အပိုဒ် ၂(စ)နှင့် (ဆ)ပါပြစ်မှုများမပါ)၊ မတရားအသင်းအက်ဥပဒေပါပြစ်မှုများ၊ နိုင်ငံတော် သစ္စာဖောက်ဖျက် ပုန်ကန်မှု(ရာဇသတ်ကြီးပုဒ်မ ၁၂၂)၊ အကြည်အညို ပျက်အောင်ပြုလုပ်မှု ရာဇသတ်ကြီးပုဒ်မ ၁၂၄ (က)အရ စွဲဆိုထားသောအမှုများ၊ ထွက်ပြေးတိမ်းရှောင်နေတဲ့ တရားခံပြေးအမှုများ၊ တရားရုံးမှာ ဦးတိုက်လျှောက်ထား စွဲဆိုထားသောအမှုများ၊ သက်ဆိုင်ရာ တရားစွဲအဖွဲအစည်းက လုံလောက်သော အကြောင်းပြချက်နဲ့ ပိတ်သိမ်းခြင်းမပြုသင့်သည့်အမှုများ၊ ၂၀၂၁ ခုနှစ်၊ စက်တင်ဘာလ ၃၀ ရက်နေ့ မတိုင်မီ သက်ဆိုင်ရာတရားရုံးတွေမှာ လျှောက်ထားတဲ့ အမှုတွေ မှအပ ၂၀၂၁ ခုနှစ်၊ ဖေဖော်ဝါရီလ ၁ ရက်နေ့နဲ့ ယင်းနေ့မတိုင်မီ ပြစ်မှု တစ်ခုခုနဲ့ စပ်လျဉ်းပြီး သက်ဆိုင်ရာတရားရုံးများမှာ စွဲဆိုခံရပြီး ကြားနာစစ်ဆေးဆဲ ပြစ်မှုဆိုင်ရာအမှုအားလုံးကို ပိတ်သိမ်း၍ တရားခံတွေကို အမှုမှလွှတ်ရမယ်လို့ ဆိုထားပါတယ်။
လူသတ်မှု၊ မုဒိမ်းမှု၊ သူတစ်ဦးဦးအားထိခိုက်နစ်နာစေတဲ့ပြစ်မှု၊ လူပုဂ္ဂိုလ်တစ်ဦး သိုမဟုတ် လူပုဂ္ဂိုလ်များရဲ့ ငွေကြေး သို့မဟုတ် ပစ္စည်းဆုံးရှုးနစ်နာစေတဲ့ ပြစ်မှုတွေနဲ့ စပ်လျဉ်းပြီး ကိုယ်တိုင်ထိခိုက်နစ်နာသူက အမှုကိုပိတ်သိမ်းခြင်းမပြုလိုကြောင်း ၂၀၂၁ ခုနှစ်၊ စက်တင်ဘာလ ၃၀ ရက်နေ့ နောက်ဆုံးထားပြီး သက်ဆိုင်ရာတရားရုံးမှာ လျှောက်ထားခြင်း မရှိမှဘဲ အဆိုပါအမှုကို ပိတ်သိမ်း၍ တရားခံ အားလွှတ်ရမယ်လို့ ကြေညာချက်ထဲ ဖော်ပြထားပါတယ်။ဒါ့အပြင် ကိုယ်တိုင်ထိခိုက်နစ်နာသူက အမှုပိတ်သိမ်းခြင်းမပြုလိုကြောင်း လျှောက်ထားသည့်အခါ သက်ဆိုင်ရာတရားရုံးက ရောက်ရှိတဲ့ အဆင့်မှစ၍ အမှုကို ဆက်လက်စစ်ဆေးရမယ်လို့ ဆိုထားပါသေးတယ်။ အမှုကို ပိတ်သိမ်းရာမှာ ကိုယ်တိုင်ထိခိုက် နစ်နာသူ ဆိုတာက နှစ်နာသူကိုယ်တိုင်၊ နှစ်နာသူရဲ့ တရားဝင်ဇနီး၊ ခင်ပွန်းနဲ့ သားသမီး၊ နစ်နာသူ အိမ်ထောင်မရှိဘူးဆိုရင် နစ်နာသူ ကိုယ်တိုင်နဲ့ နစ်နာသူရဲ့ မိဘ၊ မောင်နှမတွေကို ဆိုလိုတာလိုလည်း နစကက ဆိုထားတာတွေ့ရပါတယ်။
