ရန်ကုန်၊ ဩဂုတ် ၂၅
မြန်မာနိုင်ငံဆိုင်ရာတရုတ်သံရုံးမှ ယနေ့ ဩဂုတ်လ ၂၄ရက်နေ့တွင် မြန်မာနိုင်ငံ ကျန်းမာရေးဝန်ကြီးဌာနသို့ အောက်ဆီဂျင်စက် အလုံးရေ ၁၄၀ လုံး လှူဒါန်းပေးအပ်ခဲ့ပြီး လွှဲပြောင်းပေးသည့်စာလွှာကို မြန်မာနိုင်ငံဆိုင်ရာတရုတ်သံအမတ်ကြီး Mr. Chen Hai နှင့် မြန်မာနိုင်ငံ ကျန်းမာရေးဝန်ကြီးဌာန ပြည်ထောင်စုဝန်ကြီး ဒေါက်တာသက်ခိုင်ဝင်းတို့က Video စနစ်ဖြင့် လက်မှတ်ရေးထိုးခဲ့ကြောင်းသိရသည်။
Mr. Chen Hai က တရုတ်နိုင်ငံအစိုးရမှ မြန်မာနိုင်ငံသို့ အကူအညီပေးအပ်သည့် နောက်ထပ် အောက်ဆီဂျင်စက် အလုံးရေ ၁၀၀၀ လည်း သြဂုတ်လ ၂၁ ရက်နေ့တွင် ဝမ်တိန်နယ်စပ်ဂိတ်သို့ ရောက်ရှိခဲ့ပြီး မကြာမီမှာ မြန်မာနိုင်ငံသို့ ပိုဆောင်ရောက်ရှိမည်ဖြစ်ကြောင်း၊ မြန်မာနိုင်ငံမှ ကိုဗစ်-၁၉ ကပ်ရောဂါ တတိယလှိုင်း ခုခံတိုက်ဖျက်နေသော အရေးကြီးကာလတွင် တရုတ်နိုင်ငံမှ ကူညီထောက်ပံ့ပေးသော အောက်ဆီဂျင်စက်များက မြန်မာနိုင်ငံ ကပ်ရောဂါ ကာကွယ်ထိန်းချုပ်ကုသရေးနှင့် ပြည်သူများ၏ကျန်းမာရေးအတွက် တက်ကြွသော အခန်းကဏ္ဍမှ ပါဝင်နိုင်လိမ့်မည်ဟု မျှော်လင့်ပါကြောင်း ပြောကြားခဲ့သည်။
မြန်မာနိုင်ငံသို့ ကာကွယ်ဆေး အလုံးရေ ၅.၆ သန်း ထောက်ပံ့ပေးခဲ့ပြီး ၎င်းအနက် ကာကွယ်ဆေး အလုံးရေ ၂.၉ သန်းသည် အကြွင်းမဲ့ လှူဒါန်းပေးအပ်ခြင်း ဖြစ်ကြောင်း၊ နောက်ထပ် ကာကွယ်ဆေး အလုံးရေ ၃ သန်းကိုလည်း မကြာမီရက်ပိုင်းတွင် လွှဲပြောင်းပေးအပ် မည်ဖြစ်ကြောင်း၊ ယူနန်ပြည်နယ် တရုတ်-မြန်မာ အထူးလမ်းကြောင်းမှ အောက်ဆီဂျင်အရည် စသည့်ပစ္စည်းများ အဆင်ပြေချောမွေ့စွာ အတားအဆီးမရှိ မြန်မာနိုင်ငံသို ရောက်ရှိရေးအတွက် အာမခံချက်ပေးပြီးကူညီ၍ ပြီးခဲ့သည့်အပတ်တွင် ကျင်းပသည့် “အာဆီယံမှ မြန်မာနိုင်ငံသို့ လူသားချင်းစာနာထောက်ထားမှုအကူအညီများ ပေးအပ်ရန် ကတိပြုခြင်း ညီလာခံ” ၌ မြန်မာနိုင်ငံသို့ ကာကွယ်ဆေး အလုံးရေ ၁ သန်းနှင့် တရုတ်ယွမ်ငွေ သန်း ၂၀ တန်ဖိုးရှိ ကပ်ရောဂါတိုက်ဖျက်ရေးပစ္စည်းများ ထပ်မံအကူအညီပေးမည် ဟုထပ်မံပြော ကြားခဲ့သည်။
ပြည်ထောင်စုဝန်ကြီး ဒေါက်တာသက်ခိုင်ဝင်းက တရုတ်နိုင်ငံကယခုအကြိမ် အောက်ဆီဂျင်စက် ၁၄၀ လုံး လှူဒါန်းပေးအပ်ပြီး မကြာမီတွင် အောက်ဆီဂျင်စက် ၁၀၀၀ လုံး နောက်ထပ်လှူဒါန်းမည်ကို ကျေးဇူးတင်ရှိကြောင်းနှင့် မြန်မာနိုင်ငံ ကပ်ရောဂါကာကွယ်ထိန်းချုပ်ရေးနှင့် အများပြည်သူကျန်းမာရေး အာမခံမှုအတွက် ကြီးမားသည့်အကူအညီပေးအပ်ခဲ့ခြင်းတိုကြောင့် အထူးကျေးဇူးတင်ရှိကြောင်း ပြောကြား ခဲ့သည်။
ထိုနောက် ၎င်းမှ မြန်မာနိုင်ငံကပ်ရောဂါတတိယလှိုင်း ကာကွယ်ထိန်းချုပ်မှုတွင် အတိုင်းအတာတစ်ခုအထိတိုးတက်မှုရရှိပြီးဖြစ်ကာ ယခုနှစ်ကုန်၌ ပြည်သူလူထု ၅၀% ကိုဗစ်-၁၉ ကာကွယ်ဆေးထိုးနှံပြီးစီးရန် ကြိုးပမ်းဆောင်ရွက်လျက် ရှိကြောင်းနှင့် မြန်မာ-တရုတ် နယ်စပ်ဒေသ ကပ်ရောဂါတိုက်ဖျက်ရေးကိုလည်း အင်တိုက်အားတိုက်ကူညီပြီး တရုတ်နိုင်ငံ၏ ကူညီမှုအောက်တွင် နေပြည်တော် ကူးစက်ရောဂါ ကာကွယ်ထိန်းချုပ်ရေးစင်တာ (CDC) တည်ဆောက်ပြီးစီးအောင် ဆောင်ရွက်သွားမည်ဖြစ်ကြောင်း ထပ်မံပြောကြား ခဲ့သည်။
