ဖေဖေါ်ဝါရီလ ၁ ရက်နောက်ပိုင်း တိုက်ပွဲနဲ့ လုံခြုံရေးအခြေအနေတွေကြောင့် တိုင်းနဲ့ ပြည်နယ် ၉ ခု က ပြည်သူ ၂သန်းကျော် နေရပ်စွန့်ခွာထွက်ပြေးနေကြရ
ရန်ကုန်၊အောက်တိုဘာ ၁၈ရက်
ချင်း၊ ကချင်၊ ကယား၊ ကရင်၊ မွန်၊ ရှမ်းပြည်နယ်တို့နဲ့ မကွေး၊ စစ်ကိုင်း၊ တနင်္သာရီတိုင်းဒေသကြီးတွေမှာ ၂၀၂၁ ခုနှစ်၊ ဖေဖေါ်ဝါရီလ ၁ ရက်နေ့နောက်ပိုင်း တိုက်ပွဲနဲ့ လုံခြုံရေးအခြေအနေတွေကြောင့် ပြည်သူ ၂၁၈,၉၀၀ ခန့်ဟာ နေရပ်စွန့်ခွာထွက်ပြေးနေကြရတယ်လို့ ဒီကနေ့ညနေမှာထုတ်ပြန်လိုက်တဲ့ ကုလသမဂ္ဂရဲ့ လူသားချင်းစာနာမှုဆိုင်ရာ အကျဉ်းချုပ်သတင်းလွှာ ကဖော်ပြပါတယ်။
လက်ရှိမှာတော့ တပ်မတော်နဲ့ ဒေသခံပြည်သူ့ကာကွယ်ရေးတပ်ဖွဲ့တွေ တိုင်းရင်းသားလက်နက်ကိုင်တပ်ဖွဲ့တွေ အကြား တိုက်ပွဲတွေကြောင့် မြန်မာနိုင်ငံအရှေ့တောင်ပိုင်း၊ အထူးသဖြင့် ကယားပြည်နယ်နဲ့ တနင်္သာရီတိုင်းဒေသကြီးရဲ့ လုံခြုံရေးအခြေအနေဟာ ဆိုးရွားလျက်ရှိနေတယ်လို့လည်း အကျဉ်းချုပ်သတင်းလွှာကဖော်ပြပါတယ်။
ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး (UNHCR) က အောက်တိုဘာလ ၁၁ ရက်နေ့ ကိန်းဂဏန်းတွေကိုကိုးကားပြီး ဖေဖေါ်ဝါရီလ ၁ ရက်နေ့နောက်ပိုင်း အရှေ့တောင်ပိုင်းဒေသတွေမှာ တိုက်ပွဲရှောင်ဦးရေ စုစုပေါင်း ၁၅၅,၀၀၀ ခန့်ရှိတယ်လို့ ခန့်မှန်းပါတယ်။
အဲ့ဒီ တစ်သိန်းခွဲကျော်ထဲမှာ ကယားပြည်နယ်က ၈၅,၈၀၀၊ ရှမ်းပြည်နယ်တောင်ပိုင်းက ၁၃,၇၀၀၊ ကရင်က ၄၉,၃၀၀၊ မွန်ပြည်နယ်က ၃,၀၀၀နဲ့ တနင်္သာရီတိုင်းဒေသကြီးက ၃,၂၀၀ခန့်တို့ပါဝင်ပါတယ်။
ချင်းပြည်နယ်မှာ တိုက်ပွဲတွေ လတ်တလောမဖြစ်ပွားသေးသော်လည်း တိုက်ပွဲများ ပြန်လည်ဖြစ်ပွားမည်ကို စိုးရိမ်နေမှုနဲ့ စားနပ်ရိက္ခာပြတ်တောက်မှုတွေကြောင့် မြို့နယ်တချို့မှာ အိုးအိမ်စွန့်ခွာထွက်ပြေးမှုတွေ ရှိနေတာရှိပြီး မြို့နယ် ၅ ခုမှာ လတ်တလောနေရပ်စွန့်ခွာလာသူ ၂၁,၄၂၁ ကျော်ရှိနေပြီး မူလနေထိုင်ရာနေရာများသို့ ပြန်သွားသူအချို့ရှိပါတယ်။
ဒါ့အပြင် မကွေးက မြို့နယ် ၃ ခုမှာ လူဦးရေ ၁၂,၃၂၁ ခန့်နဲ့ စစ်ကိုင်းက မြို့နယ် ၅ ခုမှာ ၇,၁၂၃ ဦးတို့ အပါအဝင် အဆိုပါတိုင်းဒေသကြီးမှာ ၁၉,၅၀၀ ခန့်ဟာ နေရပ်စွန့်ခွာထွက်ပြေးရလျက်ရှိပါတယ်။ အရပ်သားပိုင်အိမ်များ မီးလောင်ဖျက်ဆီးခံရမှုတွေဟာလည်း လူသားချင်းစာနာမှုဆိုင်ရာ အခြေအနေတွေကို ဆိုးရွားစေတယ်လို့ ကုလသမဂ္ဂရဲ့ လူသားချင်းစာနာမှုဆိုင်ရာ အကျဉ်းချုပ်သတင်းလွှာ ကဖော်ပြပါတယ်။
ဆက်ပြီး သတင်းလွှာက နိုင်ငံတဝှမ်း မြန်မာနိုင်ငံက လူသားချင်းစာနာမှုအခြေအနေတွေဟာ ဆက်လက်ဖြစ်ပွားနေတဲ့ တိုက်ပွဲတွေ၊ လုံခြုံရေးအခြေအနေတွေနဲ့ ကိုဗစ်-၁၉ ရောဂါကြောင့် စိုးရိမ်ရဆဲဖြစ်ကာ စုစုပေါင်း လူဦးရေ ၃ သန်းဟာ အကူအညီနဲ့ အကာအကွယ်ပေးရေးအစီအစဉ်တွေကို လိုအပ်ဆဲဖြစ်နေတယ်လို့ ဆိုပါတယ်။
နိုင်ငံမှာ၂၀၂၁ ခုနှစ်မတိုင်ခင်က တိုက်ပွဲတွေကြောင့် စုစုပေါင်း လူဦးရေ ၃၇၀,၀၀၀ ခန့်ဟာ ယာယီစခန်းတွေမှာ နေထိုင်ကြရဆဲအခြေအနေမှာ ရှိနေပါသေးတယ်။
