၈၈မျိုးဆက်ကျောင်းသားခေါင်းဆောင်တစ်ဦးဖြစ်သည့် ဦးမြအေးတွင် အပြစ်မရှိကြောင်းလျှောက်လဲချက်ပေး
ပုဒ်မ ၅၀၅(ဂ)နဲ့ စွဲချက်တင်ခံထားရတဲ့ ၈၈မျိုးဆက်ကျောင်းသားခေါင်းဆောင်တစ်ဦးဖြစ်တဲ့ ဦးမြအေးရဲ့ ရှေ့နေတွေဟာ ဒီကနေ့ ဖေဖော်ဝါရီ၂၂ရက်က အင်းစိန်ထောင်အတွင်းပြုလုပ်တဲ့ အထူးတရားရုံးတရားခွင်မှာ ဦးမြအေးမှာ အပြစ်မရှိတဲ့အကြောင်း လျှောက်လဲချက်ပေးခဲ့ကြတယ်လို့ ရှေ့နေအသိုင်းအဝိုင်းကနေသိရပါတယ်။
ရှေ့နေတစ်ဦးက“ပြီးခဲ့တဲ့ ရုံးချိန်းမှာ ကိုမြအေးက သူ့မှာ အပြစ်မရှိတဲ့အကြောင်း ကိုယ်တိုင်သက်သေထွက်ဆိုခဲ့ပြီးဖြစ်ပါတယ်။ဒီနေ့ ရုံးချိန်းမှာတော့ ကိုမြအေးရဲ့ ရှေ့နေတွေက ကိုမြအေးမှာ အပြစ်မရှိတဲ့အကြောင်းလျှောက်လဲချက်ထပ်ပေးပါတယ်”လို့ ပြောပါတယ်။
ရှေ့နေတွေက ဦးမြအေးမှာ အပြစ်မရှိတဲ့အတွက် ပြန်လွှတ်ပေးဖို့ တရားသူကြီးကို လျှောက်လဲခဲ့ကြပါတယ်။
၂၀၂၁ ဖေဖော်ဝါရီ ၁ရက်နေ့ကတည်းက ဖမ်းဆီးထိန်းသိမ်းခံထားရတဲ့ ၈၈မျိုးဆက်ကျောင်းသားခေါင်းဆောင်တစ်ဦးဖြစ်တဲ့ ဦးမြအေးဟာ ဖမ်းဆီးထိန်းသိမ်းခံရပြီး ၁နှစ်ကျော်အကြာ ဖေဖော်ဝါရီ ၈ရက်နေ့မှာပဲ အင်းစိန်ထောင်အထူးတရားရုံးက ၅၀၅(ဂ)နဲ့ စွဲချက်တင် အမိန့်ချလိုက်တာပါ။
အပြီးသတ်အမိန့်ကို လာမယ့် မတ်လ(၈)ရက်နေ့မှာ ချမှတ်ဖို့ ရှိတယ်လို့ သိရပါတယ်။
ဦးမြအေးဟာ ဖမ်းဆီးထိန်းသိမ်းခံရပြီး ၂လကျော်အကြာမှာပဲ၂၀၁၄ ခုနှစ်တုန်းက ဦးမြအေး ပေးပို့ခဲ့တဲ့ အီးမေးလ် တစ်စောင်နဲ့ ပတ်သက်ပြီး ဒီအီးမေးလ်ဟာ ပြစ်မှုကျူးလွန်အောင် လှုံ့ဆော်ရာရောက်တယ်ဆိုတဲ့ မှတ်ချက်နဲ့ ဒုရဲမှူးတစ်ဦးက တရားလိုလုပ်ကာ ပုဒ်မ၅၀၅(ဂ)နဲ့ အမှုဖွင့်ခဲ့တာပါ။
၁နှစ်ကျော်ကြာအောင်ထိန်းသိမ်းခံနေရဆဲဖြစ်တဲ့ ဦးမြအေးဟာ လက်ရှိမှာ ခြေထောက်ရောင်နေတဲ့ ဝေဒနာကို ခံစားနေပြီး ပြီးခဲ့တဲ့ ၂၀၂၁ ၁၀လပိုင်းလောက်ကတော့ ကျန်းမာရေးအခြေအနေကြောင့် ပြင်ပဆေးရုံတက်ကုသခဲ့ရတဲ့ အခြေအနေရှိခဲ့ပါတယ်။
ဦးမြအေးကို စွဲဆိုထားတဲ့အမှုဟာ အမြင့်ဆုံး ထောင်ဒဏ် နှစ်နှစ် အထိ ချမှတ်နိုင်တဲ့ ရာဇသတ်ကြီးဥပဒေပုဒ်မ – ၅၀၅ (ဂ) ဖြစ်တယ်လို့ သိရပါတယ်။
