အခေါက်ရွှေ ဝယ်ယူစုဆောင်းသူများနေ၍ ရွှေဈေးမတည်မငြိမ်ဖြစ်နိုင်ဟု သုံးသပ်

အခေါက်ရွှေ ဝယ်ယူစုဆောင်းသူများနေ၍ ရွှေဈေးမတည်မငြိမ်ဖြစ်နိုင်ဟု သုံးသပ်

ရန်ကုန်ရွှေဈေးကွက်တွင် အခေါက်ရွှေ ဝယ်ယူစုဆောင်းသူများနေ၍ ရွှေဈေး မတည်မငြိမ် ဖြစ်နိုင်ကြောင်း ရွှေလုပ်ငန်းရှင်များက သုံးသပ်နေကြသည်။

သင်္ကြန်ပြီး နောက်ပိုင်း ရန်ကုန်ရွှေဈေးကို တစ်ကျပ်သားလျှင် သိန်း ၂၀ ကျော် ၇ သောင်းဖြင့် ဈေးဖွင့်ခဲ့ခြင်း ဖြစ်ပြီး ဧပြီလ ၂၁ ရက်တွင် တစ်ကျပ်သားလျှင် သိန်း ၂၀ ၈ သောင်း ၆ ထောင် ဖြစ်လာကာ ယနေ့ ဧပြီလ ၂၃ ရက်တွင် သိန်း ၂၀ ကျော် ၇ သောင်းဖြင့် ဈေးပိတ်ခဲ့သည်။

ယင်းအပြင် မြန်မာနိုင်ငံတော် ဗဟိုဘဏ်က အမေရိကန်ဒေါ်လာငွေလဲနှုန်းကို တစ်ဒေါ်လာလျှင် ၁၈၅၀ ကျပ် ဟု သတ်မှတ်ထားခဲ့သော်လည်း ရန်ကုန်တိုင်းဒေသကြီးအတွင်းရှိ ရွှေဈေးကွက်တွင် ယင်းသတ်မှတ်ဈေးဖြင့် ရောင်းချခြင်းမျိုး မပြုလုပ်ဘဲ ရွှေဝယ်သူများက လက်ရှိအပြင်ဒေါ်လာပေါက်ဈေးဖြင့်သာတွက်ချက်၍ ဈေးပေးဝယ်ယူကြကြောင်းလည်း သိရသည်။

“ဈေးကွက်မှာက အခုရက်ပိုင်းမှာ ရွှေပြန်လာရောင်းသူ သိပ်မရှိဘူး၊ဝယ်သူတွေပဲ ရှိတယ်။ ကမ္ဘာ့ရွှေဈေးက တစ်အောင်စကို ၁၉၃၀ ဖြစ်နေတော့ ပြည်တွင်းမှာက တစ်ဒေါ်လာကို ၁၈၅၀ ကျပ်ဆိုတော့ တော်တော် ကွာတယ်လေ။ဒါကြောင့် ဝယ်သူတွေကလည်း ၁၈၅၀ နဲ့ပဲ ဆိုတာကို ထည့်မပြောကြဘူး၊ရောင်းသူကလည်း အဲဒီဈေးနဲ့ ဘယ်ရောင်းမလဲဗျာ”ဟု ရွှေအရောင်းအဝယ် ပြုလုပ်နေသူ တစ်ဦးက ပြောသည်။

ရန်ကုန်တိုင်းဒေသကြီးရွှေလုပ်ငန်းရှင်အသင်းအနေဖြင့် သင်္ကြန်အပြီး ဧပြီလ ၁၈ ရက်တွင် ရွှေဈေး မဖွင့်နိုင်ခဲ့ဘဲ ဧပြီလ ၂၀ ရက်ကျမှသာ ဖွင့်သည့်ဈေးကို တရားဝင် ထုတ်ပြန်ပေးထားခဲ့ကြောင်း၊အဆိုပါ အသင်းအနေဖြင့် ရွှေအရောင်းအဝယ်ကို ထိန်းထိန်းသိမ်းသိမ်းဆောင်ရွက်ကြရန်လည်း အစည်းအဝေးပြုလုပ်ကာ အသင်းသားများအား ပြောဆိုထားကြောင်းလည်း သိရသည်။

သင်္ကြန်မတိုင်ခင်မီက အခေါက်ရွှေတစ်ကျပ်သားကို ငွေကျပ်သိန်း ၂၀၄၈၀၀၀ ဖြင့်ရောင်းချခဲ့ခြင်းဖြစ်ကြောင်းလည်း သိရသည်။