မော်လိုက်မြို့နယ်တွင် ကျောင်းထိုင်ဘုန်းကြီးတစ်ပါး အသတ်ခံရ
စစ်ကိုင်းတိုင်းဒေသကြီး၊မော်လိုက်မြို့နယ်၊တပ်ကုန်း ကျေးရွာရှိ ဘုန်းတော်ကြီးကျောင်းမှ သက်တော်(၅၇)နှစ်၊ဝါတော်(၃၀)ဝါရှိ ကျောင်းထိုင်ဘုန်းကြီးတစ်ပါးအား မေလ၃ရက်နေ့နံနက်၁နာရီခွဲက လက်နက်ကိုင်သူအချို့က ဖမ်းဆီးခေါ်ဆောင်၍ ကျောင်းပြင်ပတွင် အသတ်ခဲ့ကြောင်း ဒေသခံများထံမှ သိရသည်။
“အခုလ၃ရက်နေ့ မနက်အစောကြီးမှာ ရွာကို လက်နက်ကိုင်တွေရောက်လာပြီး ရွာဘုန်းကြီးကျောင်းက ကျောင်းထိုင်ဆရာတော်ကို ကျောင်းအပြင်မှာ သေနတ်နဲ့ပစ်သတ်သွားကြတာပါ။ကျောင်းမှာ သီတင်းသုံးနေတဲ့အခြားသံဃာတော်နှစ်ပါးကတော့ အချိန်မီရှောင်နိုင်လိုက်တော့ကံကောင်းသွားပါတယ်´´ဟုဒေသခံတစ်ဦးကပြောသည်။
ဖြစ်စဉ်မှာ စစ်ကိုင်းတိုင်းဒေသကြီး၊ မော်လိုက်မြို့ နယ်၊ တပ်ကုန်းကျေးရွာရှိ ဘုန်းတော်ကြီးကျောင်းသို့ မေလ၃ရက်နေ့နံနက်၁နာရီခွဲက လက်နက်ကိုင်အဖွဲ့တစ်ဖွဲ့ ရောက်ရှိလာပြီး ကျောင်းထိုင်ဆရာတော်ဖြစ်သူ ဘဒ္ဒန္တဓမ္မပီယ(၅၇)နှစ် ဝါတော် (၃၀)ဝါအား ကျောင်းအပြင် သို့ ဖမ်းဆီးခေါ်ဆောင်ကာ သေနတ်များဖြင့် ဝိုင်းဝန်းပစ်ခတ်ခဲ့သဖြင့် ဆရာတော်တွင် သေနတ်ထိမှန်ဒဏ်ရာများရရှိကာ အခင်းဖြစ်နေရာ၌ ပျံလွန်တော်မူခဲ့ပြီး ဆရာတော်နှင့်အတူ ဘုန်းတော်ကြီးကျောင်းတွင် သီတင်းသုံးနေထိုင်လျက်ရှိသော ဘဒ္ဒန္တသူရိယ(၄၄)နှစ် ဝါတော်(၂၄)ဝါနှင့်ဘဒ္ဒန္တဉာဏိက(၃၅)နှစ် ဝါတော်(၁၆)ဝါတို့မှာ ထွက်ပြေးတိမ်းရှောင်ခဲ့ရကြောင်း သိရသည်။
