အာဆီယံအထူးကိုယ်စားလှယ် မြန်မာနိုင်ငံသို့ ထပ်မံလာရောက်ရန်ရှိ
ကမ္ဘောဒီယားဒုတိယဝန်ကြီးချုပ်လည်းဖြစ်၊ နိုင်ငံခြားရေးဝန်ကြီးလည်းဖြစ်တဲ့ မြန်မာနိုင်ငံဆိုင်ရာ အာဆီယံအထူးကိုယ်စားလှယ် Prak Sokhonn ဟာ လာမယ့်ဇွန်လထဲမှာ မြန်မာနိုင်ငံကို ထပ်မံလာရောက်ဖို့ရှိတယ်လို့ နိုင်ငံတကာသတင်းမီဒီယာတွေရဲ့ ဖော်ပြချက်အရသိရပါတယ်။
အာဆီယံအထူးကိုယ်စားလှယ်ဟာ ပြီးခဲ့တဲ့ မတ်လ ၂၁ရက်ကနေ ၂၃ရက်နေ့အထိ နေပြည်တော်နဲ့ရန်ကုန်ကို ပထမအကြိမ်လာပြီးနောက် ၂လကျော်အကြာမှာပဲ ဒုတိယအကြိမ်ထပ်မံလာရောက်ဖို့ စီစဉ်တာဖြစ်ပါတယ်။
ဗီအိုအေသတင်းကတော့ အာဆီယံအထူးကိုယ်စားလှယ်ဟာ သူ့ရဲ့ မြန်မာပြည် ခရီးစဉ်မှာ အပြုသဘောရလဒ် ထွက်လာဖို့ မျှော်မှန်းထားတယ်လို့ ကမ္ဘောဒီယားနိုင်ငံ The Phnom Penh Post သတင်းစာရဲ့ ရေးသားချက်ကို ကိုးကားဖော်ပြပါတယ်။
အာဆီယံအထူးကိုယ်စားလှယ်ဟာ သူ့ရဲ့ မြန်မာပြည်ပထမခရီးစဉ်အတွင်း ဗိုလ်ချုပ်မှုးကြီးမင်းအောင်လှိုင်၊ နိုင်ငံခြားရေးဝန်ကြီး ဦးဝဏ္ဏမောင်လွင်၊ နစက ငြိမ်းချမ်းရေးအဖွဲ့ခေါင်းဆောင် ဒုတိယဗိုလ်ချုပ်ကြီးရာပြည့်တို့အပြင် ဦးကိုကိုကြီးဦးဆောင်တဲ့ ပြည်သူ့ပါတီနောက်ပြီး ရှမ်းတိုင်းရင်းသားများဒီမိုကရေစီအဖွဲ့ချုပ်တို့အပြင် နိုင်ငံတကာ သံတမန်တွေနဲ့ တွေ့ဆုံခဲ့တာရှိပါတယ်။
အမျိုးသားဒီမိုကရေစီအဖွဲ့ချုပ်က ဒေါ်စုစုလွင်နဲ့ တွေ့ဆုံဖို့ကနဦးအပိုင်းမှာ စီစဉ်ခဲ့တာရှိပေမယ့် နောက်ပိုင်း မတွေ့ဖြစ်ခဲ့တာကိုတွေ့ရပါတယ်။
အခုတစ်ခေါက် အာဆီယံအထူးကိုယ်စားလှယ်ရဲ့ ခရီးစဉ်မှာ ဒေါ်အောင်ဆန်းစုကြည်နဲ့ ရောတွေ့ဖြစ်ဖို့ရှိလာမလား၊အမျိုးသားဒီမိုကရေစီအဖွဲ့ချုပ်တာဝန်ရှိသူတွေနဲ့ တွေ့ဆုံဖြစ်မလားဆိုတာကတော့ စောင့်ကြည့်ရမှာပါ။
နစကဘက်ကတော့ အမှုရင်ဆိုင်နေရဆဲ ပုဂ္ဂိုလ်တွေနဲ့ တွေ့ဆုံဖို့ရာ မဖြစ်နိုင်ဘူးလို့ ထုတ်ဖော်ပြောကြားထားတာလည်း တစ်ဖက်မှာ ရှိနေပါတယ်။
The Phnom Penh Postက အာဆီယံအထူးကိုယ်စားလှယ်ရဲ့ အခု ဒီတခေါက်ခရီးစဉ်မှာတော့ အကြမ်းဖက်မှုရပ်ဆိုင်းရေး၊ ထိတွေ့ဆက်ဆံမှုတွေရှိရေး၊ ကိုဗစ်ကပ်ရောဂါ ကာကွယ်ဆေး၊ လူသားချင်းစာနာကူညီမူနဲ့ အပြုသဘောဆောင်ရေးတို့ကို အလေးပေးသွားမယ်လို့ ရေးသားထားတာရှိပါတယ်။