ပြန်လည်အသက်ဝင်တော့မည့်ဂျပန်နိုင်ငံခရီးသွားလုပ်ငန်း
တိုကျို ၊ ဇွန် ၇
နှစ်နှစ်ကျော်ရပ်နားထားခဲ့ရသည့် ဂျပန်နိုင်ငံ၏ ခရီးသွားလုပ်ငန်းကို ကန့်သတ်ချက်များဖြင့် တဖြည်းဖြည်းချင်းပြန်လည်ဖွင့်လှစ်နေပြီဖြစ်ကြောင်း တာဝန်ရှိသူများက ဇွန်လ ၇ ရက်နေ့ကဆိုသည်။
ဂျပန်သို့ဝင်ရောက်လာသည့် ခရီးသည်များအနေဖြင့် နှာခေါင်းစည်းမဖြစ်မနေတပ်ဆင်ခြင်း၊ပုဂ္ဂလိကဆေးဘက်ဆိုင်ရာအာမခံထားခြင်းတို့လုပ်ရမည်ဖြစ်သလို၎င်းတို့နေထိုင်စဉ်ကာလတစ်လျှောက်လည်း စောင့်ကြပ်ကြည့်ရှုခြင်းခံရမည်ဖြစ်သည်။
ဇွန်လ (၁၀) ရက် ပထမဆုံးပြန်လည်ဖွင့်လှစ်သည့်အချိန်တွင် ပက်ကေ့ခ်ျခရီးစဉ်ဖြင့်ဝင်ရောက်သူများကိုသာ ခွင့်ပြုမည်ဖြစ်ပြီး ဧည့်သည်နှင့်အတူလိုက်ပါမည့် ဧည့်လမ်းညွှန်များအနေဖြင့်လည်း နှာခေါင်းစည်းကိုစနစ်တကျဝတ်ဆင်ရမည် ဟု ဂျပန်ခရီးသွားလုပ်ငန်းအေဂျင်စီ (JTA) မှဆိုသည်။
“ခရီးစဉ်တစ်လျှောက်လုံးမှာ ဧည့်လမ်းညွှန်တွေအနေနဲ့ ခရီးသည်တွေကို ရောဂါပိုးကူးစက်နိုင်တဲ့ အပြုအမူမျိုးတွေမပြုမိအောင်သတိပေးနေဖို့လိုပါတယ်၊နှာခေါင်းစည်း ချွတ်တာ၊တပ်တာတွေကစလို့ပေါ့” ဟူ၍လည်း JTA ၏ လမ်းညွှန်ချက်တွင်ထည့်သွင်းထားသည်။
ကပ်ရောဂါစတင်ချိန်မှစ၍ ဂျပန်နိုင်ငံသည် တင်းကျပ်သော ပြည်ဝင်ခွင့်စည်းမျဉ်းများချမှတ်ခဲ့ကာ နိုင်ငံသားမဟုတ်သူအားလုံးနီးပါးကို ပြည်ဝင်ခွင့်ပိတ်ထားခဲ့သည်။
ပြီးခဲ့သည့်လမှစကာ ခရီးသွားကိုယ်စားလှယ်အယောက် ၅၀ ပါဝင်သော စမ်းသပ်ခရီးစဉ်များကို ပြုလုပ်ခဲ့ပြီး ၎င်းတို့ထဲမှတစ်ဦးတွင် COVID 19 ရှိကြောင်းစစ်ဆေးတွေ့ရှိခဲ့ရသည်။
“ခရီးသွားတွေအနေနဲ့ အဆောက်အဦထဲမှာနေလို့ နှာခေါင်းစည်းတပ်ထားရတာပြဿနာမဟုတ်ပေမဲ့ ဒါကိုနှစ်ဆယ့်လေးနာရီလုံးဝတ်ထားဖို့ဆိုတာကတော့ အတော်ကိုကသီ့ကအောက်နိုင်ပါတယ်” ဟု ဩစတေးလျခရီးသွားကိုယ်စားလှယ်တစ်ဦးဖြစ်သူ James Jang ကဆိုသည်။ဧည့်လမ်းညွှန်များကိုအချိန်ပြည့် ငှားရမ်းထားရခြင်းကလည်းကုန်ကျစရိတ်ကိုပိုများစေသည်ဟု မစ္စတာ Jang ကဆိုသည်။
ကပ်ရောဂါမတိုင်မီ ၂၀၁၉ ခုနှစ်တွင် ခရီးသွား ၃၁.၉ သန်းကျော် ဂျပန်ကိုလာရောက်ပြီး ဂျပန်ယန်း ၄.၈၁ ထယီလီယံရရှိခဲ့သည်။
Source – Reuters/ng
