ဒေါ်အောင်ဆန်းစုကြည်နှင့်ဦးအောင်ဆန်းဦးတို့၏ ခြံအမှတ် (၅၄) မြေနေရာပိုင်ဆိုင်မှု အထူးအယူခံ ပြည်ထောင်စုတရားလွှတ်တော်ချုပ် ကြားနာမည်
နိုင်ငံတော်အတိုင်ပင်ခံပုဂ္ဂိုလ်ဟောင်းဒေါ်အောင်ဆန်းစုကြည်နှင့် အကိုဖြစ်သူ ဦးအောင်ဆန်းဦးတို့၏ ရန်ကုန်မြို့ ခြံအမှတ် (၅၄) မြေနေရာပိုင်ဆိုင်မှု အထူးအယူခံလျောက်ထားမှုကို ပြည်ထောင်စုတရားလွှတ်တော်ချုပ်က ကြားနာစစ်ဆေးသွားရန်ရှိနေသည်။
ရန်ကုန်မြို့၊ တက္ကသိုလ်ရိပ်သာလမ်း ၊ ခြံအမှတ် (၅၄) မြေနေရာပိုင်ဆိုင်မှုနှင့်ပတ်သက်သော အမှုအတွက် အယူခံတရားလို ဦးအောင်ဆန်းဦး၏ အထူးအယူခံလျှောက်ထားမှုအပေါ် ယခုလ ဇွန်၂၇ ရက်နေ့၌ ကြားနာစစ်ဆေးသွားမည်ဖြစ်ကြောင်း ပြည်ထောင်စုတရားလွှတ်တော်ချုပ်က ထုတ်ပြန်ကြေညာထားသည်။
အဆိုပါအမှုတွင် အယူခံတရားပြိုင်အဖြစ် ဒေါ်အောင်ဆန်းစုကြည်ဖြစ်ပြီး၊ အမှုလိုက်ပါဆောင်ရွက်မည့် တရားလွှတ်တော်ရှေ့နေများမှာ ဒေါ်စန်းမာလာညွှန့်၊ ဦးကျော်စိန်လွင်နှင့် ဦးသန်းလွင်တို့ဖြစ်ကြောင်း ထုတ်ပြန်ချက်တွင်ဖော်ပြထားသည်။
အယူခံတရားလို အဖြစ်လျာက်ထားသည့် ဦးအောင်ဆန်းဦးဘက်မှလိုက်ပါဆောင်ရွက်မည့် တရားလွှတ်တော်ရှေ့နေမှာ ဦးအေးလွင်ဖြစ်ကြောင်းသိရသည်။
အမှုအား နေပြည်တော်ရှိ ပြည်ထောင်စုတရားလွှတ်တော်၊ အထူးအယူခံတရားရုံး၌ နံနက် ၉နာရီ မိနစ် ၃၀အချိန်တွင် ကြားနာသွားမည်ဖြစ်ပြီး၊ အမှုအတွက် ပြောင်းလဲမှုရှိပါက ထပ်မံကြေညာသွားမည်ဖြစ်ကြောင်း ထုတ်ပြန်ထားသည်။
ယင်း ခြံအမှတ် ၅၄ အမှုနှင့်ပတ်သက်၍ ပြီးခဲ့သော ၂၀၁၆ ခုနှစ်အတွင်းက ဦးအောင်ဆန်းဦးနှင့်ဒေါ်အောင်ဆန်းစုကြည်တို့မောင်နှမ နှစ်ဦးအား ခြံမြေနေရာကို တစ်ဝက်စီယူ ခွဲယူရန် ရန်ကုန်အနောက်ပိုင်းခရိုင်တရားရုံးက အမိန့်ချမှတ်ပေးခဲ့ပြီးဖြစ်သည်။
အဆိုပါ အမိန့်ချမှတ်မှုတွင် ခြံအတွင်းရှိ နှစ်ထပ်တိုက်အပါ မြေနေရာအား ဒေါ်အောင်ဆန်းစုကြည် ပိုင်ဆိုင်ပြီး၊ တစ်ထပ်တိုက်အပါ မြေနေရာအား ဦးအောင်ဆန်းဦးပိုင်ဆိုင်ကြောင်း တရားရုံးက ဆုံးဖြတ်ချက်အမိန့်ချမှတ်ခဲ့ခြင်းဖြစ်သည်။
ယင်းအပေါ်ဦးအောင်ဆန်းဦးက မြေနေရာပိုင်ဆိုင်မှုနှင့်ပတ်သက်၍ ကျေနပ်မှုမရှိသောကြောင့် ပြည်ထောင်စု တရားလွှတ်တော်ချုပ်သို့ အယူခံတက်ခဲ့ရာ ပလပ်ခံရပြီးနောက် ၎င်းက အထူးအယူခံတက်ရန်လျောက်ထားခဲ့သည့်အမှုတစ်မှုလည်းဖြစ်သည်။
