မြောက်ဥက္ကလာပမြို့နယ်တွင် မီနီဘတ်စ်ကားမှအရှိန်မထိန်းနိုင်ဘဲ AYA ဘဏ်အဆောက်အဦးအားဝင်တိုက်ပြီး မောင်းနှင်ထွက်ပြေး

မြောက်ဥက္ကလာပမြို့နယ်တွင် မီနီဘတ်စ်ကားမှအရှိန်မထိန်းနိုင်ဘဲ AYA ဘဏ်အဆောက်အဦးအားဝင်တိုက်ပြီး မောင်းနှင်ထွက်ပြေး

ရန်ကုန်မြို့၊မြောက်ဥက္ကလာပမြို့နယ်၊ဝေဘာဂီရပ် ကွက်၊သုဓမ္မာလမ်းပေါ်ရှိ AYA ဘဏ်အဆောက်အဦးအား ဇွန် ၁၅ ရက်ညပိုင်းက မီနီဘတ်စ်ကားတစ်စီးမှ ဝင်တိုက်မိခဲ့ပြီးနောက် မောင်းနှင်ထွက်ပြေးသွားခဲ့သည်ဟု တွဲလက်ကူမယ်”ဌ”လူငယ်ပရဟိ တအဖွဲ့မှ သိရသည်။

ယင်းနေ့ည ၁၂ နာရီ ၂၀ မိနစ်ခန့်က AYA ဘဏ်ခွဲ(၄၃)အဆောက်အဦးတံခါး၊ဘဏ်ရှေ့၌ကာရံထားသည့် သံပန်းများနှင့်ဘဏ်ရှေ့ရှိကား ၂ စီးတို့အား မီနီဘတ်စ်(အဝါရောင်)ကားမှ အရှိန်မထိန်းနိုင်ဘဲ ဝင်တိုက်မိခဲ့ပြီးနောက် ကားမောင်းသူမှာနောက်ပြန်ဆုတ်၍ မောင်းနှင်ထွက်ပြေးသွားခဲ့သည်။

ဖြစ်စဥ်၌ ဘဏ်ရှေ့၌ကာရံထားသည့် သံပန်းများအားတိုက်မိရာမှ ဘဏ်၏ညစောင့်တာဝန်ကျဝန် ထမ်း ၂ ဦးအနက် ဦးသက်နိုင်စိုး(၄၂)နှစ်ခန့်သည် သံပန်းနှင့်ရိုက်မိ၍ ဦးခေါင်း၌ကွဲရှဒဏ်ရာရရှိခဲ့သဖြင့် မေဓာဝီဆေးရုံသို့ပို့ဆောင်ခဲ့ကြောင်း သိရသည်။

ဦးခေါင်းကွဲရှဒဏ်ရာရရှိသူအား မေဓာဝီဆေးရုံမှ ဒဏ်ရာအား ၇ ချက်ချုပ်ပေးခဲ့ရပြီး ကျောရိုးအားဓာတ်မှန်ရိုက်ကာ လိုအပ်သည့်ကုသမှုများပြုလုပ်ပေးခဲ့ကြကြောင်း သိရသည်။

ဖြစ်စဥ်မှ AYA ဘဏ်အဆောက်အဦးအားဝင်တိုက်ပြီးနောက် မောင်းနှင်ထွက်ပြေးသွားသည့် မီနီဘတ်စ်ကားမောင်းသူအား ဥပဒေအရအရေးယူနိုင်ရန် စုံစမ်းစစ်ဆေးလျက်ရှိကြောင်း သိရသည်။