အိမ်နီးနားချင်းများ ရေချိုးနေသည်ကို ဗီဒီယိုချောင်းရိုက်ခဲ့သော အမျိုးသား ထောင်ဒဏ်ချမှတ်ခံရ
စင်္ကာပူ၊ ဇွန် ၁၆ ရက်
စင်္ကာပူနိုင်ငံ၌ အိမ်နီးနားချင်း ၃ ဦး၏ ရေချိုးနေသည့် ဗီဒီယိုကို ခိုး၍ ရိုက်ကူးခဲ့သောအမျိုးသားတစ်ဦးအား ဇွန်လ ၁၆ ရက် ကြာသပတေးနေ့တွင် ၁၆ ပတ်ကြာ ထောင်ဒဏ်ချမှတ်ခဲ့ကြောင်း သိရသည်။ ထိုအမျိုးသမီး ၃ ဦးတွင် ၈ နှစ်အရွယ် မိန်းကလေးတစ်ဦးပါ ပါဝင်ခဲ့ကြောင်းသိရသည်။
အဆိုပါအမျိုးသားသည် ၎င်းအမျိုးသမီးတို့၏ကွန်ဒိုအခန်း လူသွားလမ်းဘက်မှ ချောင်းရိုက်ခဲ့ကြောင်း သိရသည်။
အသက် ၂၂ နှစ်အရွယ် တော့ခ်ကျီရှန်အား တစ်ပါးသူ၏ လိင်ပိုင်းဆိုင်ရာ ကိစ္စခိုးကြည့်မှုဖြင့် စွဲချက်နှစ်ခုတင်ခဲ့ရာ ပြစ်မှုထင်ရှားကြောင်း တွေ့ရှိခဲ့သည်။ အခြားစွဲချက် သုံးခုကိုလည်း စီရင်ချက်ချရန် ဆုံးဖြတ်နေကြောင်း သိရသည်။
ကျူးလွန်ခံခဲ့ရသူများဖြစ်သည့် အသက် ၈ နှစ်၊ ၂၆ နှစ် နှင့် ၄၃ နှစ်အရွယ် အမျိုးသမီးသုံးဦး၏ အမည်များကိုမူ စင်္ကာပူနိုင်ငံ၏ gag order သတင်းအချက်အလက်များကို အများပြည်သူသို့ ထုတ်ဖော်ခြင်းကိုတားမြစ်ထားသည့်ညွှန်ကြားချက်အရ ထုတ်ဖော်ခြင်း မရှိခဲ့ချေ။
တော့ခ်သည် မတ်လ ၇ ရက် နေ့၌ အသက် ၂၆ အရွယ် အမျိုးသမီးတစ်ဦး ရေချိုးနေသည်ကို အိမ်သာပြတင်းပေါက်မှ လက်ကိုင်ဖုန်းဖြင့် ရိုက်ကူးနေစဉ် ၎င်းအမျိုးသမီးမှ သတိထားမိသွား၍ အဖေနှင့် အစ်ကိုအား အော်ဟစ် အကူအညီတောင်းခဲ့သည်။
ထို့နောက် အဆိုပါအမျိုးသမီး၏ အဖေနှင့် အစ်ကို ရောက်မလာမီ တော့ခ်သည် ရိုက်ကူးထားသည့် ဗီဒီယိုအား ချက်ချင်းဖျက်ပစ်ခဲ့သည်။
ယင်းအမျိုးသမီး၏ အဖေနှင့် အစ်ကို ရောက်လာချိန်တွင် တော့ခ်သည် လူနှစ်ဦး အမြန်ထွက်သွားသည်ကို မြင်လိုက်သည်ဟု ပြောဆိုကာ လိမ်ညာခဲ့ကြောင်း သိရသည်။
ရဲများ လာရောက်စစ်ဆေးချိန်မှ တော့ခ်သည် အမှန်အတိုင်း ဝန်ခံခဲ့သည်။
ရဲများသည် တော့ခ်၏ ဖုန်းအား သိမ်းဆည်းရမိခဲ့ပြီး ညစ်ညမ်းသော ဗီဒီယို ၁၄ ခုအား တွေ့ရှိခဲ့သည်။
၎င်းဖုန်း၌ ၂၀၂၁ ခုနှစ် ဖေဖော်ဝါရီ ၉ ရက်တွင် ရှစ်နှစ်အရွယ် မိန်းကလေးတစ်ဦး ရေချိုးနေသည်ကို ရိုက်ကူးထားသည့် ဗီဒီယိုနှစ်ခုလည်း တွေ့ရှိခဲ့ကြောင်း သိရသည်။
Source: CNA
