ရခိုင်ပြည်သူများ ကျီးလန့်စာစား အခြေအနေမျိုးရောက်နေဟု ဒေါက်တာ အေးမောင်ပြော
ရခိုင်ပြည်နယ်အတွင်း တပ်မတော်နှင့် AA တို့အကြား စစ်ရေး တင်းမာမှုများ ဖြစ်ပေါ်နေပြီး ပြည်သူလူထုအနေဖြင့် ကျီးလန့်စာစားဘဝသို့ ရောက်နေကြောင်း ရခိုင့်ဦးဆောင်ပါတီ ဥက္ကဋ္ဌ ဒေါက်တာ အေးမောင်က ပြောကြားလိုက်သည်။
” လက်ရှိ အခင်းအကျင်းသည် ကျီးလန့်စာစား ဖြစ်နေတယ်။ အုပ်ချုပ်ရေး ယန္တရားနှစ်ခုရဲ့အရွှေ့ဟာ တော် တော် ကြမ်းတယ်ပေါ့ဗျာ။ လက်ရှိအနေအထားက သူကဖမ်းလိုက် ကိုယ်က စီစစ်လိုက်ပေါ့ဗျာ။ ဖမ်းလိုက် တရားစွဲလိုက်ပေါ့။ ခံရတဲ့သူကတော့ သိသာတာပေါ့ဗျာ “ဟု ဒေါက်တာ အေးမောင်က ပြောသည်။
ရခိုင်ပြည်နယ်အတွင်း တပ်မတော်က စစ်ရေးအရ တပ်အင်အားတိုးချဲ့မှုများ လုပ်ဆောင်လာသည့်နောက်ပိုင်း AA နှင့် တပ်မတော်အကြား စစ်ရေး တင်းမာမှုများ ဖြစ် လာကာ ဖမ်းဆီးမှုများ၊ စစ်ဆေးမှုများနှင့် ပစ်ခတ်မှုများ ခပ်စိပ်စိပ် ဖြစ်ပေါ်လာသည့်အပေါ် ဒေသခံများအနေဖြင့် စိုးရိမ်မှုများ မြင့်တက်နေခြင်းဖြစ်သည်။
ဇွန်လ (၂၃) ရက်က စစ်တွေမြို့ပေါ်တွင် ရေတပ်မှ(၃)ပွင့်နှင့် အရာရှိ တစ်ဦးအပါအဝင် တပ်သား တစ်ဦးကို AA က ဖမ်းဆီး ခေါ်ဆောင်သွားသည့်အပြင် ပြီးခဲ့သည့် ရက် ပိုင်းများအတွင်းကလည်း မြောက်ဦး၊ ကျောက်တော်၊ ပု ဏ္ဏားကျွန်းနှင့် ရမ်းဗြဲဖက်မှ စစ်သားတစ်ချို့နှင့်ရဲတပ်ဖွဲ့ဝင်တစ်ချို့ကို ဖမ်းဆီးထားခြင်း ဖြစ်သည်။
ယင်းသို့ ဖမ်းဆီးသွားပြီးနောက်ပိုင်း တပ်မတော်က စစ်တွေမြို့ပေါ်တွင် ပိတ်ဆို့ စစ်ဆေးမှုများလုပ်ဆောင်ကာ ညပိုင်းတွင် ပစ် ခတ်မှုများ ဖြစ်ပေါ်ခဲ့ကြောင်း သိရသည်။
” အင်အားပြိုင်ကြတာပေါ့ဗျာ။ မြို့ပေါ်မှာတောင် လာဖမ်းရသလားဆိုတဲ့ ရာဇ အိန္ဒြေပေါ့။ ကျေးလက်မှာ ဖြစ်တာမဟုတ်ဘူးလေ။ အုပ်ချုပ်ရေး တိုက်ရိုက်ထိတွေ့တဲ့ နေရာမှာ ဖမ်းတာဆီးတာ လုပ်လာတဲ့အခါကျတော့ သူတို့ဘက်က ကျယ်ကျယ်ပြန့်ပြန့်စဉ်းစားပြီးတော့ မြို့ပေါ်မှာ ရှိတဲ့ လူငယ်လူရွယ်တွေကို ဖမ်းတာဆီးတာ လုပ်လာတာပေါ့” ဟု ဒေါက်တာ အေးမောင်က ပြောသည်။
အဆိုပါ ဖြစ်စဉ် ဖြစ်ပွားပြီး နောက်ပိုင်း စစ်တွေမြို့မှပြေး ဆွဲနေသည့် ရေကြောင်းလိုင်း ခရီးစဥ်အချို့နှင့် အဝေးပြေးယာဉ်လိုင်းအချို့ကိုလည်း ယနေ့ ဇွန်လ ၂၄ ရက်နေ့မှစကာ တပ်မတော်မှ သွားလာခွင့် ပိတ်ပင်ခဲ့ကြောင်း ဒေ သခံများထံမှ သိရသည်။
” ကျွန်တော်ဆိုရင် ရန်ကုန်သွားမလို့လေ။ လေယျာဉ်လက် မှတ်တွေပါ စီစဉ်ထားတာ။ အခု ရွှေပြည်တန်က မထွက်ဘူးလေ။ မနက်ဖြန်လည်း မသေချာဘူးတဲ့။ စစ်တွေဖက်ကနေ ဒီဖက်ကို မထွက်ရဘူး။ စစ်တွေဖက်က မလာတော့ ကျွန်တော်တို့ ဘက်ကလည်း သွားလို့မရဘူးပေါ့” ဟု မင်းပြားမြို့နယ်မှ ခရီးစဉ်ဖျက်လိုက်ရသည့် ဒေသခံတစ်ဦးက ပြောသည်။
ထို့အပြင် စစ်တွေမြို့မှ စာမေးပွဲပြီး၍ အိမ်ပြန်ကြမည့် တ က္ကသိုလ် ကျောင်းသားများလည်း လက်ရှိတွင် အိမ်ပြန်ခွင့်မရဘဲ စစ်တွေမြို့တွင်သာ ပိတ်မိနေသေးကြောင်းလည်း ၎င်းက ပြောသည်။
အဆိုပါ ဖြစ်စဉ်များနှင့် ပတ်သက်၍ တပ်မတော်မှ ဖမ်း ဆီးထားသည့် ရခိုင် ဒေသခံများကို ပြန်လွတ်ပေးပါက AA အနေဖြင့် ၎င်းတို့ ဖမ်းဆီးထားသည့် တပ်မတော်သားများနှင့် ရဲတပ်ဖွဲ့ဝင်များကို ပြန်လွှတ်ပေးမည်ဟု ပြောကြားထားသော်လည်း ညှိနှိုင်းမှု အဆင်မပြေဖြစ်ခဲ့ကြောင်း ဒေသခံသတင်းရင်းမြစ်များက ပြောဆိုကြသည်။ ထိုကိစ္စကိုAA ဘက်မှ တရားဝင် ထုတ်ဖော်ပြောကြားထားခြင်းတော့ မရှိသေးပေ။
Photo Credit -DMG
