အင်္ဂလန်၌ ကိုဗစ်အလွန်ကာလတွင် ကျောင်းသားများ စိတ်ကျန်းမာရေးပြဿနာများပိုခံစားနေရ
လန်ဒန်၊ဇွန် ၂၈
ကိုဗစ်ကပ်အလွန်၌ အင်္ဂလန်တက္ကသိုလ်များမှ ကျောင်းသားများသည် စိတ်ကျန်းမာရေးပြဿနာများ ပိုမိုကြုံတွေ့နေရကြောင်း အစီရင်ခံစာတခုဖော်ပြထားသည်။
ကပ်ရောဂါသည် စိုးရိမ်ပူပန်မှုနှုန်းကို ပိုမိုဆိုးရွားစေရုံသာမက တက္ကသိုလ်ကျောင်းသားလူငယ်များတွင် ရုန်းကန်ရမှုများလည်း သိသိသာသာမြင့်တက်လာကြောင်း ကျွမ်းကျင်သူများ၏ပြောကြားချက်အရသိရသည်။
National Union of Students ၏ သုတေသနပြုချက်အရ “ကျောင်းသားအများစုသည် စိုးရိမ်ပူပန်မှုများဖြင့် ဝန်ထုပ်ဝန်ပိုး ဖြစ်နေကြရသည်” ဟု အဆိုပါအဖွဲ့၏ ဥက္ကဌ Larissa Kennedy ကဆိုပြီး ယခုကဲ့သို့ ကျောင်းသားများ၏ စိတ်ကျန်းမာရေးအကျပ်အတည်း ဖြစ်နေရခြင်းအပေါ်သူမအနေဖြင့် အလွန်စိုးရိမ်မိကြောင်းလည်းပြောကြားခဲ့သည်။
မကြာသေးမီက Humen စိတ်ကျန်းမာရေးပရဟိတအဖွဲ့၏ သုတေသနပြုချက်အရ ကျောင်းသားငါးဦးအနက်နှစ်ဦးသည်ပြဿနာများကြုံတွေ့နေရဟုယူဆခဲ့ကြကြောင်းတွေ့ရှိရသည်။
ကျောင်းသား ၇,၃၈၅ ဦးကိုစစ်တမ်း ကောက်ယူခဲ့ရာ ထက်ဝက်နီးပါးသည် စိတ်ကျန်းမာရေးပြဿနာများခံစားနေရပြီး ၎င်းတို့၏ တက္ကသိုလ်ပညာသင်ကြားရေးအပေါ် အပျက်သဘောသက်ရောက်မှုမျိုးရှိသည်ဟုဆိုကြသည်။
ယလုလိုဖြစ်ရခြင်းသည် စာမေးပွဲဖိအားနှင့် နေထိုင်စရိတ်အကျပ်အတည်းများကြောင့်ဖြစ်သဖြင့် အဆိုးရွားဆုံးအခြေနေမဖြစ်ခင် ထောက်ပံ့မှုများကိုစောစောစီးစီးပေးအပ်သင့်သည် ဟုလည်း Kennedy ကဆိုသည်။
အမျိုးသားကျန်းမာရေးဝန်ဆောင်မှုဌာန (NHS) နှင့် တက္ကသိုလ်စိတ်ကျန်းမာရေးဝန်ဆောင်မှုဌာနအကြား ကွာဟချက်နီးကပ်စေရန်အတွက် အင်္ဂလန်အစိုးရက ပေါင်သုံးသန်းထောက်ပံ့မည့်အကြောင်း ပြီးခဲ့သည့်အပတ်ကကြေငြာခဲ့သည်။
သို့သော် ထိုပမာဏသည် အင်္ဂလန်၏ကျောင်းသားပမာဏနှင့်နှိုင်းယှဉ်ပါက ကျောင်းသားတစ်ဦးလျှင် (၁) ပေါင်သာရရှိမည်ဖြစ်သဖြင့် သမုဒ္ဒရာထဲကရေတစ်စက်သာ ဖြစ်နေသည်ဟု Kennedy ကသတိပေးခဲ့သည်။
ကျောင်းသားပေါင်း ၃,၇၀၆ ဦး၏ ကျောင်းထွက်နှုန်းများကိုလည်းသတိထားသင့်သည်ဟုအကြံပြုထားကြသည်။
Source – WioNews
