အာဆီယံ အထူး ကိုယ်စားလှယ် နှင့် NCA-S EAO အဖွဲ့ ခုနစ်ဖွဲ့ တွေ့ဆုံ ဆွေးနွေးပြီးနိုင်ငံရေးအကြပ်အတည်းအတွက် အချက် ၄ ချက် ဖော်ဆောင်ပေးရန် တိုင်းရင်းသားလက်နက်ကိုင်အဖွဲ့များ တိုက်တွန်း
မြန်မာနိုင်ငံ၏ လက်ရှိ နိုင်ငံရေးအကြပ်အတည်းကို ကျော်လွှားနိုင်ရေးအတွက် အချက် ၄ ချက်ကို အလေးထားဖော်ဆောင်ပေးရန် NCA လက်မှတ်ရေးထိုးထားသော တိုင်းရင်းသားလက်နက်ကိုင်အဖွဲ့ (၇)ဖွဲ့က မြန်မာနိုင်ငံဆိုင်ရာ အာဆီယံအထူးကိုယ်စားလှယ်ထံ ယနေ့ ဇူလိုင် ၁ ရက်တွင် တိုက်တွန်းလိုက်သည်။
မြန်မာနိုင်ငံဆိုင်ရာ အာဆီယံအထူးကိုယ်စားလှယ် အနေဖြင့် မြန်မာနိုင်ငံသို့ ဒုတိယအကြိမ်လာရောက်သည့် ယခု ခရီးစဉ်အတွင်း တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ်(NCA) လက်မှတ်ရေးထိုး ထားသော တိုင်းရင်းသားလက်နက်ကိုင်တော်လှန်ရေးအဖွဲ့အစည်း (၇)ဖွဲ့နှင့် ယနေ့ ဇူလိုင် ၁ ရက်နေပြည်တော် ၌ တွေ့ဆုံစဉ် ယင်းသို့ တိုက်တွန်းလိုက်ခြင်းဖြစ်သည်။
အဆိုပါ အချက် ၄ ချက်သည် ညှိုနှိုင်းအဖြေရှာနိုင်သော နိုင်ငံရေးအခင်းအကျင်းတစ်ရပ် ဖြစ်ပေါ်လာရေးအတွက် ကူညီပေးရန်၊ သက်ဆိုင်ရာ ပါ၀င်သင့် ပါ၀င်ထိုက်သူများအားလုံးနှင့် တွေ့ဆုံနိုင်ရေးအတွက် အစွမ်းကုန်ကြိုးပမ်းပေးရန်၊ အားလုံး လက်ခံနိုင်သော အရပ်သားများအား ကာကွယ်ပေးနိုင်သည့် ယန္တရားဖော်ဆောင်ရေးနှင့် လူသားချင်းစာနာထောက်ထားမှုဆိုင်ရာ အထောက်အပံံ့များကို သက်ဆိုင်သူများအားလုံး ခွဲခြားဆက်ဆံမှုမရှိဘဲလွတ်လပ်စွာလက်ခံရရှိနိုင်ရေး ကူညီဆောင်ရွက်ပေးရန် နှင့် လက်ရှိ နိုင်ငံရေး ပဋိပက္ခဖြေရှင်းရေးနှင့် ရေရှည်လုပ်ငန်းများဖြစ်သော ပြန်လည်ထူထောင်ရေး၊ ဖွံ့ဖြိုးရေးအစီအစဉ်များတွင် အာဆီယံအနေဖြင့် NCA အသိသက်သေနိုင်ငံများ အပါအဝင် နိုင်ငံတကာအဖွဲ့အစည်းများနှင့် ပူးပေါင်းဆောင်ရွက်ပေးရန် တို့ကို တိုက်တွန်းလိုက်ခြင်းဖြစ်သည်။
အာဆီယံအထူးကိုယ်စားလှယ်ကလည်း ၎င်းအနေဖြင့် အပစ်အခတ်ရပ်စဲရေး၊ လူသားချင်းစာနာမှု အကူအညီပေးနိုင်ရေးနှင့် အမှတ်တကယ် ဒုက္ခရောက်သူများထံ အကူအညီများရောက်ရှိရေးနှင့် နိုင်ငံရေးဆွေးနွေးပွဲဖြစ်မြောက်ရေးတို့ကို ဖော်ဆောင်နိုင်ရေး ကြိုးပမ်းသွားမည်ဟု ပြောကြားခဲ့သည်။
Photo Credit- Tai Freedom
