စင်္ကာပူသို့ ကြက်သားတင်ပို့မှု ပိတ်ပင်ထားခြင်းကိုရုတ်သိမ်းပေးရန် မလေးရှား မွေးမြူရေး လုပ်ငန်းရှင်များတောင်းဆို
မလေးရှား ကြက်မွေးမြူရေး လုပ်ငန်းရှင်များက ကြက်သားတင်ပို့မှု တားမြစ်ထားချက်ကို ရုတ်သိမ်းပေးရန် မလေးရှားအစိုးရကိုတောင်းဆိုထားသည်။ခွင့်မပြုပါက စင်ကာပူဈေးကွက်ကို ဆုံးရှုံးလိမ့်မည်ဟုဆိုသည်။
ပြည်တွင်းဈေးကွက်တွင် ရောင်းလိုအား တည်ငြိမ်နေပြီဖြစ်ကြောင်းလည်း ၎င်းတို့ကပြောကြားခဲ့သည်။ ဇွန် ၁ ရက်မှ စတင်အသက်ဝင်ခဲ့သည့် ပို့ကုန်တားမြစ်ချက်ကို အဆုံးသတ်ပေးရန်အတွက် အစိုးရနှင့် ဆွေးနွေးနေကြောင်း မလေးရှားမွေးမြူရေးလုပ်ငန်းရှင်များအသင်းများအသင်း (FLFAM) ၏ အကြံပေးအရာရှိ Jeffry Ng က ပြောကြားခဲ့သည်။
စင်္ကာပူဖောက်သည်များနှင့် နှစ်ပေါင်းများစွာ ဆက်ဆံရေးကိုပျိုးထောင်ထားကာ စာချုပ်များ ချုပ်ဆိုထားသောကြောင့် လုပ်ငန်းရှင်များကပူပန်နေသည်ဟု ၎င်းက ဆိုသည်။
မလေးရှားတွင် ရောင်းလိုအားနှင့် ဈေးနှုန်းပြဿနာများကြောင့် တစ်လလျှင် ကြက် ၃.၆ သန်းအထိ တင်ပို့ခွင့် ပိတ်ပင်ထားသည်။ ထုတ်လုပ်မှုစရိတ် မြင့်တက်လာခြင်း၊ ရောဂါကူးစက်မှုနှင့် ရာသီဥတုအခြေအနေတို့သည် ကြက်ခြံများ၏ လုပ်ငန်းလည်ပတ်မှုကို ထိခိုက်စေသည့် အကြောင်းရင်းများဖြစ်သည်။
စင်ကာပူသည်ကြက်သားတင်သွင်းမှု၏ သုံးပုံတစ်ပုံခန့်ကိုမလေးရှားမှ တင်သွင်းနေရာမှ အင်ဒိုနီးရှားမှ ကြက်များကိုပြောင်းလဲ ဝယ်ယူသွားမည်ဟု ကြေညာခဲ့သည်။
စင်ကာပူနိုင်ငံသို့ ကြက်များတင်ပို့ရန် အသိအမှတ်ပြုထားသော နိုင်ငံပေါင်း ၂၀ကျော်စာရင်းတွင် အင်ဒိုနီးရှားသည် ရင်းမြစ်အသစ်အဖြစ် ထည့်သွင်းခံလာရပြီဖြစ်ကြောင်း စင်ကာပူစားနပ်ရိက္ခာအေဂျင်စီ (SFA) က ဇွန် ၃၀ ရက်တွင် ပြောကြားခဲ့သည်။
Johor ကြက်မွေးမြူသူများအသင်း အတွင်းရေးမှူး Lau Ka Leng က တင်ပို့မှုခွင့်မပြုပါက မွေးမြူရေး လုပ်ငန်းရှင်များသည် ၎င်းတို့၏ စင်္ကာပူဖောက်သည်များ ဆုံးရှုံးမည်ကို စိုးရိမ်နေကြကြောင်း CNA သို့ ပြောကြားခဲ့သည်။
“ဈေးကွက်တစ်ခု ဆုံးရှုံးသွားရင် ပြန်ရဖို့က လွယ်မှာ မဟုတ်ဘူး” ဟု၎င်းက ဆက်လက်ပြောသည်။
မွေးမြူရေးလုပ်နေသောဂျိုဟိုးပြည်နယ်တွင် ကြက်ခြံပေါင်း ၇၀၀ ရှိသည်။
Source: cna
