တရုတ်နိုင်ငံတွင် အပ်ငွေပြန်လည်ရရှိရန်ဆန္ဒပြသည့်လူအုပ်ကြီးကိုလုံခြုံရေး နှင့် ရဲများက အင်အားသုံး ဖြိုခွင်း
ဟောင်ကောင်၊ ဇူလိုင် ၁၁
ဇူလိုင်လ ၁၀ ရက်တနင်္ဂနွေနေ့၌တရုတ် အာဏာပိုင်များသည် ဘဏ်များတွင် အပ်နှံထားသောငွေ များကို ပြန်လည်ထုတ်ယူနိုင်ရန်အတွက် ငြိမ်းချမ်းစွာ ဆန္ဒပြနေသော ငွေအပ်နှံသူ တစ်ထောင်ကျော်ကို အင်အားသုံးကာ ဖြိုခွဲခဲ့ကြောင်း သိရသည်။
ပြီးခဲ့သည့် ဧပြီလ၌ တရုတ်အာဏာပိုင်များသည် တရုတ်နိုင်ငံအလယ်ပိုင်း ဟဲနန် ပြည်နယ်ရှိ ကျေးလက်ဘဏ်လေးခုမှ ဒေါ်လာသန်းပေါင်းများစွာသော အပ်ငွေဘဏ်အကောင့်များအားဝန်ဆောင်မူရပ်နားထားသည်။ ငွေဆုံးရှုံးမည်ကို ပူပန်နေသော ငွေအပ်နှံသူများသည် လွန်ခဲ့သောနှစ်လကတည်းက ဟဲနန် ပြည်နယ်မြို့တော် ကျန်းဇို တွင် ဆန္ဒထုတ်ဖော်မှုများစွာ ပြုလုပ်ခဲ့သော်လည်း သက်ဆိုင်ရာများက မသိကျေးကျွန်ပြုခဲ့သည်။
ထို့ကြောင့် တနင်္ဂနွေနေ့၌ တရုတ်နိုင်ငံတစ်ဝှမ်းမှ ငွေအပ်နှံသူ တစ်ထောင် ကျော်သည် နိုင်ငံ၏ ဗဟိုဘဏ်ဖြစ်သော ကျန်းဇို ဘဏ်ခွဲ၏ အပြင်ဘက်တွင် စုရုံးကာ အကြီးမားဆုံးသော ဆန္ဒပြမှုတစ်ရပ်ကို စတင်ခဲ့ကြောင်း ဆန္ဒပြသူများက CNN သို့ ပြောကြားခဲ့သည်။
အဆိုပါ ဆန္ဒပြလူအုပ်ကြီးသည် အာဏာပိုင်များကြားဖြတ်ဟန့်တားခြင်းကို ရှောင်ရှားရန်အတွက် နံနက်အစော ၄ နာရီကတည်းက ဘဏ်ရှေ့တွင် စုရုံးနေခဲ့ခြင်းဖြစ်သည်။
ရာနှင့်ချီသော ရဲများနှင့် လုံခြုံရေးများသည်လည်း လမ်းတစ်ဖက်တချက်၌ ဆန္ဒပြသူများအား စောင့်ကြည့်နေခဲ့သည်။ဆန္ဒပြသူများသည် လုံခြုံရေးများကို ရေဘူးခွံများ၊ ပစ္စည်းအသေးစားများနှင့် ပစ်ပေါက်ခဲ့သဖြင့်နံနက် ၁၁ နာရီတွင် ဆန္ဒပြသူများရှိရာ လှေကားပေါ်သို့ ရဲများ ရုတ်တရတ် ပြေးတက်လာပြီး ၎င်းတို့နှင့် ထိပ်တိုက်ရင်ဆိုင်ခဲ့သည်ဟု သိရသည်။
ထို့နောက် ဆန္ဒပြသူ ဒါဇင်ပေါင်းများစွာကို ဘတ်စ်ကားများပေါ်သို့ ဆွဲတင်ခဲ့ပြီး မြို့အနှံ့ရှိ ယာယီ ထိန်းသိမ်းရေးစခန်းများသို့ ပို့ဆောင်ခဲ့ကြောင်း ထို့နေရာသို့ ပို့ဆောင်ခံရသူများမှ သိရသည်။
ဒဏ်ရာရသူအချို့ကိုလည်း ဆေးရုံသို့ပို့ဆောင်ပေးခဲ့၍ အများစုကို ညနေပိုင်း၌ ထိန်းသိမ်းရေးစခန်းများမှ ပြန်လွတ်ပေးခဲ့ကြောင်း သိရသည်။
တနင်္ဂနွေနေ့ည၌ ဟဲနန် ဘဏ်လုပ်ငန်းစည်းကမ်းထိန်းသိမ်းရေးက သက်ဆိုင်ရာဌာနများသည် ကျေးလက်ဘဏ် လေးခုရှိ ငွေအပ်နှံထားသူများ၏ ငွေကြေးဆိုင်ရာ အချက်အလက်များကို စစ်ဆေးနေပြီး မကြာမီကာလအတွင်း ထိုပြဿနာကို ဖြေရှင်းမည့် အစီအစဉ်တစ်ရပ်ကို ကြေငြာသွားမည်ဖြစ်ကြောင်း ထုတ်ပြန်ခဲ့သည်။
Source: CNN
