အမေရိကန်နှင့် အပြည်ပြည်ဆိုင်ရာ စွမ်းအင်ဌာနကအာရှနိုင်ငံများအား စွမ်းအင် ကုန်ကြမ်း ထုတ်လုပ်ပို့ဆောင်ရေး မျိုးစုံရှိဖို့တိုက်တွန်း
ဆစ်ဒနီ၊ ဇူလိုင် ၁၂ ရက်
အမေရိကန်နှင့် နိုင်ငံတကာ စွမ်းအင်အေဂျင်စီတို့က အာရှနိုင်ငံများအား တရုတ်နှင့် ရုရှား နိုင်ငံများ၏ စွမ်းအင်နှင့် အရေးပါသော တွင်းထွက်ပစ္စည်းများကိုသာ မမှီခိုရန် တိုက်တွန်းခဲ့သည်။
အပြည်ပြည်ဆိုင်ရာ စွမ်းအင်ဌာန (IEA) အမှုဆောင်ဒါရိုက်တာ ဖာတီ ဘီရိုနှင့် အမေရိကန် စွမ်းအင်ဝန်ကြီး ဂျန်နီဖာ ဂရန်ဟောမ် တို့က ရုရှားအပေါ် ပိတ်ဆို့အရေးယူမှုများမှ ဖြစ်ပေါ်လာသော လက်ရှိစွမ်းအင်အကျပ်အတည်းကြောင့် အင်ဒို-ပစိဖိတ်နိုင်ငံများအား ရုပ်ကြွင်းလောင်စာဆီမှ အခြားစွမ်းအင်များဆီသို့ ပြောင်းလဲအသုံးပြုဖို့ပိုအာရုံစိုက်စေလိုကြောင်း ပြောကြားခဲ့သည်။
သို့ရာတွင် ထိုသို့ပြောင်းလဲရန်အတွက် အာရှနိုင်ငံများသည် တရုတ်၏ နေရောင်ခြည်စွမ်းအင်သုံး နည်းပညာနှင့် ရုရှား၊ ကွန်ဂိုဒီမိုကရကန်တစ် သမ္မတနိုင်ငံကဲ့သို့သော နိုင်ငံများ၏ အရေးပါသော ဓာတ်သတ္တု တွင်းထွက်ပစ္စည်းများအပေါ် မှီခိုအားထားခြင်းမှ ရုန်းထွက်ရန် လိုအပ်မည် ဖြစ်သည်။ ၎င်းဓာတ်သတ္တု တွင်းထွက်များသည် လျှပ်စစ်ကားများနှင့် ဘက်ထရီများထုတ်လုပ်ရာတွင် လိုအပ်သည့်အရာများဖြစ်သည်။
အဆိုပါဆွေးနွေးပွဲကို ဩစတြေးလျအစိုးရနှင့် IEA တို့က ပူးတွဲကျင်းပလျက်ရှိကြောင်း သိရသည်။
တရုတ်နိုင်ငံသည် ယခုလက်ရှိ ကမ္ဘာလုံးဆိုင်ရာ နေရောင်ခြည်သုံးနည်းပညာအတွက် လိုအပ်သော ကုန်ကြမ်းထောက်ပံ့မှု ၈၀ ရာခိုင်နှုန်းကို ပိုင်ဆိုင်ထားပြီး ၂၀၂၅ ခုနှစ်တွင် ၉၅ ရာခိုင်နှုန်းအထိ တိုး၍ ပိုင်ဆိုင်လာမည်ဖြစ်ကြောင်း ဘီရိုက ပြောကြားခဲ့သည်။
၎င်းနှင့် ဂရန်ဟောမ် တို့က ရုရှားမှ လောင်စာစွမ်းအင်ထောက်ပံ့မှု ဆုံးရှုံးခြင်းကို သင်ခန်းစာယူ၍ နည်းပညာ သို့မဟုတ် လောင်စာတစ်ခုအတွက် နိုင်ငံတစ်နိုင်ငံအပေါ်ကိုသာ မှီခိုနေခြင်းကို ရှောင်ရှားသင့်ကြောင်း ပြောကြားခဲ့သည်။
ဂရန်ဟောမ် နှင့် သြစတြေးလျစွမ်းအင်ဝန်ကြီး ခရစ် ဘိုဝမ် တို့သည် နှစ်နိုင်ငံအကြား စွမ်းအင်သုတေသနလုပ်ငန်းတွင် အတူတကွလုပ်ဆောင်ရန်အပါအဝင် ဟိုက်ဒရိုဂျင်ထုတ်လုပ်ရန်အတွက် ရေရှည်စွမ်းအင် သိုလှောင်မှုနှင့် အီလတ်ထရိုလိုင်ဇာ ပစ္စည်းများ၏ ကုန်ကျစရိတ်များကို လျှော့ချရန် သဘောတူညီချက်တစ်ရပ်ကို အင်္ဂါနေ့တွင် လက်မှတ်ရေးထိုးခဲ့သည်။
Source: CNA
