ကိုဗစ်ကူးစက်မှု ဆက်လက်မြင့်တက်လာနိုင်ကြောင်း ဂျပန်ဝန်ကြီးချုပ်သတိပေး
တိုကျို၊ဇူလိုင် ၁၄
ကိုဗစ်လှိုင်းသစ်သည် နိုင်ငံတစ်ဝှမ်းတွင် လျင်မြန်စွာပျံ့နှံ့နေပုံရပြီး မကြာမီလာမည့်ပိတ်ရက်ရှည်နှင့် နီးကပ်လာသော နွေရာသီကျောင်းပိတ်ရက်များကြောင့် ပြည်သူများအနေဖြင့်အထူးသတိထားရန် ဂျပန်ကကြာသပတေးနေ့တွင်သတိပေးခဲ့သည်။
ဂျပန်တွင်ယခုနှစ်အစောပိုင်းကတည်းက ကိုဗစ်ကူးစက်မှုမတွေ့ခဲ့ရသော်လည်း မကြာသေးမီကကူးစက်မှုအသစ်များ ပြန်ရှိလာခဲ့သည်။ဗုဒ္ဓဟူးနေ့တွင် ကူးစက်မှုပေါင်း ၁၆,၈၇၈ ဦးရှိပြီး ဖေဖော်ဝါရီလမှစ၍ယခုအချိန်ထိအမြင့်ဆုံးကူးစက်မှုဖြစ်သည်။တစ်နိုင်ငံလုံးအတိုင်းအတာဖြင့်လည်း ကူးစက်မှု ၉၀,၀၀၀ ကျော်သို့မြင့်တက်လာခဲ့ပြီး ယနေ့အထိ ၁၆,၆၆၂ ရှိလာပြီဖြစ်သည်။
ဝန်ကြီးချုပ်ဟောင်း ရှင်ဇိုအာဘေးလုပ်ကြံခံရပြီး၊လက်ရှိအာဏာရပါတီ၏ တနင်္ဂနွေနေ့က အောင်ပွဲအပြီးပထမဆုံးပြုလုပ်သည့် သတင်းစာရှင်းလင်းပွဲတွင် ဝန်ကြီးချုပ် ဖူမီရိုကီရှီဒါက သတိကိုအမြင့်ဆုံးထားပြီးသွားလာလှုပ်ရှားရန် ပြောကြားခဲ့သည်။
“ကိုဗစ်ရောဂါဟာ လက်ရှိမှာတစ်နိုင်ငံလုံးပျံ့နေတဲ့အပြင် အသက်အရွယ်မရွေး ကူးစက်နေတာဖြစ်ပါတယ်၊ အထူးသဖြင့် အသက် ၂၀ နဲ့ ၃၀ ကြားအရွယ်တွေမှာ ကာကွယ်ဆေးထိုးနှုန်းကနည်းနေသေးတာမို့ Booster ဆေးတွေကို သေသေချာချာဂရုစိုက်ထိုးနှံဖို့ ပြည်သူတွေကို တိုက်တွန်းလိုပါတယ်” ဟုဝန်ကြီးကဆိုသည်။
“လာမယ့်နွေရာသီ အားလပ်ရက်တွေမှာအားလုံးရဲ့ကြားမှာ အပြန်အလှန်ထိတွေ့ဆက်ဆံမှုတွေ တိုးလာမှာကြောင့် ကူးစက်မှုတွေထပ်ရှိလာနိုင်ပါတယ်” ဟုလည်း၎င်းကဆိုသည်။
“ဒါကြောင့် နောက်ဆက်တွဲအဆင့်တွေမှာ ပြည်သူတွေအတွက် လေးကြိမ်မြောက် ဆေးထိုးနိုင်အောင်ဆောင်ရွက်သွားမှာဖြစ်ပြီး၊မီးရထားဘူတာရုံနဲ့ လေဆိပ်လိုနေရာတွေမှာပါ အခမဲ့စမ်းသပ်စစ်ဆေးတဲ့နေရာတွေကိုထည့်သွင်းသွားပါမယ်” ဟုဆိုခဲ့သည်။
သို့သော် အပြင်းဖျားပြီးသေဆုံးမှု နည်းပါးနေသေးတာကြောင့် ယခုအချိန်တွင် သွားလာလှုပ်ရှားရန် ကန့်သတ်ချက်များမလိုအပ်သေးကြောင်း ၎င်းကဆက်လက်ပြောသည်။တိုကျိုတွင်မူ ကိုဗစ်သတိပေးချက်အဆင့်ကို အမြင့်ဆုံးသို့မြှင့်တင်ခဲ့သည်။ ယခုထပ်မံတွေ့ရှိသော ရောဂါကူးစက်မှု ထက်ဝက်ကျော်သည် BA.5 မျိုးကွဲများဖြစ်ကြောင်း သိရှိရသည်။
“မနက်ဖြန်မှာ ဒီနှစ်နွေရာသီအတွက် ဆောင်ရွက်ရမယ့်အစီီအစဥ်တွေကို ဆုံးဖြတ်ဖို့ အစည်းအဝေးတစ်ရပ် ကျင်းပပါမယ်” ဟု တိုကျိုအုပ်ချုပ်ရေးအဖွဲ့ဝင် Yuriko Koike က ကြာသပတေးနေ့ အစောပိုင်းအစည်းအဝေးတစ်ခုတွင် ပြောကြားခဲ့ပြီး အဆိုပါအစည်းအဝေးသည် ကျွမ်းကျင်သူများ၏သဘောထားနှင့် တစ်နိုင်ငံလုံးဆိုင်ရာအလားအလာကို ချိန်ဆပေးမည်ဖြစ်ကြောင်းထပ်မံပြောကြားခဲ့သည်။
ထို့ပြင်ပြီးခဲ့သည့်သောကြာနေ့က ကျင်းပခဲ့သော မဲဆွယ်စည်းရုံးပွဲ၌ သေဆုံးခဲ့သည့် မစ္စတာအာဘေးအား ဂုဏ်ပြုသောအားဖြင့်လည်း ကီရှီဒါကဆောင်းဦးတွင် နိုင်ငံတော် ဈာပနကို ကျင်းပမည်ဖြစ်ကြောင်း၊၎င်း၏ နိုင်ငံတကာဆိုင်ရာ အရေးပါကျော်ကြားမှုဂုဏ်သတင်း နှင့် ဂျပန်နိုင်ငံအတွက်စွမ်းစွမ်းတမံဆောင်ရွက်ခဲ့မှုများကို ရောင်ပြန်ဟပ်စေရန် ဆောင်းဦးရာသီတွင် ပြုလုပ်ရခြင်းဖြစ်ကြောင်းလည်းပြောကြားခဲ့သည်။
Source – Reuters
