အမရပူရမြို့နယ်ရှိ အမှိုက်ပုံမီးလောင်မှုအား တစ်နာရီခွဲခန့်ကြာငြိမ်းသတ်ပြီးချိန်၌ မီးထိန်းနိုင်ခဲ့
မန္တလေးတိုင်း၊အမရပူရမြို့နယ်၊တောင်အင်းမြောက်အင်းသုဿန်တွင် ဇူလိုင် ၁၈ ရက်(ယနေ့) နံနက် ၁၀ နာရီ ၃၄ မိနစ်ခန့်က အမှိုက်ပုံမီးလောင်ခဲ့ကြောင်း မြန်မာနိုင်ငံမီးသတ်တပ်ဖွဲ့ဌာနချုပ်မှ သိရသည်။
မီးလောင်မှုဖြစ်ပွားကြောင်း သတင်းအရ မန္တ လေးတိုင်းအတွင်းရှိ မီးသတ်စခန်းများမှ မီးငြှိမ်းသတ်ကား ၅ စီး၊ရေသယ်ကား ၁၆ စီးတို့ဖြင့်သွားရောက်ငြိမ်းသတ်ခဲ့ကြသည်။
ထို့ပြင် နံနက် ၁၁ နာရီ ၄၀ မိနစ်၌ မန္တလေးမြို့ တော်စည်ပင်မှ မီးငြှိမ်းသတ်ကား ၁ စီး၊ရေသယ်ကား ၅ စီးတို့ထပ်မံရောက်ရှိလာကာငြိမ်းသတ်ခဲ့ကြသည်။
အလားတူ ကြက်ခြေနီအဖွဲ့ဝင်များ၊လူမှုကူညီရေးအသင်းများမှလည်း မီးသတ်တပ်ဖွဲ့ဝင်များနှင့်အ တူပူးပေါင်း၍ ဝိုင်းဝန်းငြိမ်းသတ်ခဲ့ကြသဖြင့် မွန်းတည့် ၁၂ နာရီ ၁၀ မိနစ်၌ မီးထိန်းနိုင်ခဲ့ကြောင်း မြန်မာနိုင်ငံမီးသတ်တပ်ဖွဲ့ဌာနချုပ်မှ သိရသည်။
“အမှိုက်ပုံမီးလောင်တယ် သတင်းရလို့သွားကူငြိမ်းခဲ့ပါတယ် အမှိုက်ပုံလောင်တာဆိုတော့ အနံ့ အသက်ကတော့ အတော်ဆိုးတယ် အဲဒီနားက ရပ် ကွက်တွေထဲကတစ်ချို့ဆိုရင် မီးလောင်တဲ့အနံ့ကော မီးခိုးငွေ့တွေကောရတော့ နေရတာခေါင်းမူးတာတွေဖြစ်တယ်လို့ သိရတယ် မီးကတော့ ထိန်းထားနိုင်တဲ့အဆင့်ကိုရောက်နေပါပြီ”ဟု ဝိုင်းဝန်းငြိမ်းသတ်ပေးနေသည့် လူမှုကူညီရေးအသင်းဝင်တစ်ဦးကပြောသည်။
