ဥရောပစီးပွားရေး၊ယူရိုငွေနှင့်ရုရှားဓာတ်ငွေ့အခန်းကဏ္ဍ
ယူရိုငွေသည် ၂၀၂၂ ခုနှစ်အစပိုင်းမှစကာ ၁၂ ရာခိုင်နှုန်းနီးပါးကျဆင်းသွားပြီးအဓိကမှာ ရုရှား – ယူကရိန်းစစ်ပွဲနှင့် စွမ်းအင်စျေးကွက်၏ နောက်ဆက်တွဲလှုပ်ရှားမှုများကြောင့်ဖြစ်သည်ဟု ပညာရှင်များကသုံးသပ်ကြသည်။
ယူရိုငွေသည် အနှစ် ၂၀ အတွင်း ပထမဆုံးအကြိမ်အဖြစ် အမေရိကန်ဒေါ်လာအောက်သို့ ကျဆင်းသွားပြီးနောက် အနည်းငယ်ပြန်တက်လာသော်လည်း ဥရောပစွမ်းအင် အကျပ်အတည်းတိုးမြင့်လာမှုသည် ယူရိုငွေကြေးကို သိသိသာသာကျဆင်းသွားစေနိုင်သေးသည်။
“အခုလိုယူရိုတန်ဖိုးကျဆင်းရခြင်းရဲ့ ၇၅ ရာခိုင်နှုန်းကျော်ဟာ ယူကရိန်းစစ်ကနေဖြစ်ပေါ်လာတဲ့စွမ်းအင်အကျပ်အတည်းကြောင့်ဖြစ်ပြီး ကျန်တာကတော့ တင်းမာတဲ့ US Fed ကြောင့်လို့ထင်ပါတယ်” ဟု Evercore ISI မှ အကြီးတန်းမန်နေးဂျင်းဒါရိုက်တာ James West က ပြောကြားခဲ့သည်။
ထို့အပြင် ဥရောပသည် ယခုအချိန်တွင်ဆောင်းရာသီအတွက်စွမ်းအင်လိုအပ်ချက် အကျပ်အတည်းကိုဦးတည်နေပြီဖြစ်ရာ အခြေနေတွေပိုဆိုးရန်သာရှိသည်ဟု ၎င်းကထပ်မံပြောကြားသည်။
ရုရှားသမ္မတ ဗလာဒီမာပူတင်ကလည်း အနောက်အုပ်စုက ပိတ်ဆို့မှုကိုဆက်လက်လုပ်ဆောင်နေပါက အကျိုးဆက်အနေဖြင့်ကပ်ဘေးသာဖြစ်ပေါ်နိုင်ကြောင်းအသိပေးထားသည်။
အနောက်အုပ်စု၏ပိတ်ဆို့ဒဏ်ခတ်မှုအားလက်တုံ့ပြန်ရန် ပူတင်အနေဖြင့် စွမ်းအင်ထောက်ပံ့မှုကိုလက်နက်သဖွယ်အသုံးချဖို့စိတ်အားထက်သန်မှာဖြစ်ကြောင်းစွမ်းအင်လုပ်ငန်းစုကသတိပေးထားသည်။
ရုရှားက ဂျာမဏီသို့ ဓာတ်ငွေ့ပေးပို့မှုများကို ၆၀ ရာခိုင်နှုန်း ဖြတ်တောက်ခဲ့သည်။ဥရောပသည် ဓာတ်ငွေ့လုံးဝပြတ်တောက်သွားနိုင်သည့် အခြေနေအတွက်ကြိုတင်ပြင်ဆင်နေကြသည်။
ထိုအခြေအနေဖြစ်လာသည့်အခါ “ဂျာမဏီအနေဖြင့် သိပ်မကြာခင် စီးပွားရေးကျဆင်းမှုနှင့် စွမ်းအင်စျေးနှုန်းများ မြင့်တက်မှုဆီသို့ ဦးတည်သွားလိမ့်မည်” ဟု Deutsche Bank မှ FX သုတေသနအကြီးအကဲ George Saravelos ကပြောကြားခဲ့သည်။ထိုသို့ဖြစ်လာပါက ယူရိုသည်ရှေ့လျှောက်ဆက်လက်ကျဆင်းဖို့သာရှိသည် ဟုလည်းဖော်ပြထားသည်။
ဓါတ်ငွေ့ မပေးခြင်းနှင့် ယူရိုငွေအားပျော့လာခြင်းတို့သည် ဆက်စပ်လျက်ရှိသည်။”တစ်နည်းအားဖြင့်တော့ ဒါဟာရုရှားနဲ့ပတ်သက်တယ်ဆိုတာအားလုံးသိပါတယ်” ဟုငွေကြေးအဖွဲ့ UBP မှ ဒါရိုက်တာ Olivier Konzeoue ကဆိုသည်။
Source – Business Insider
